Obesidat Realmente Ta un Problema?

“Obesidat serka adolesentenan ta manera un epidemia.”—S. K. Wangnoo, spesialista prinsipal di endokrinologia, Hospital Indraprastha Apollo, Delhi, India.

MANERA e komentario ariba ta indiká, hopi famia di klase medio na India a kambia pa un estilo di bida ku ta kousa obesidat serka tinernan. E epidemia aki ta plamando den hopi nashon segun ku mas i mas hende ta hasi ménos ehersisio i ta bira adikto na junk food. Un spesialista riba tereno di medisina pa adolesente a deklará: “E siguiente generashon [na Gran Bretaña] lo ta . . . esun mas obeso den historia di humanidat.” E korant Guardian Weekly a informá: “Un tempu obesidat tabata prinsipalmente un problema di hende adulto. Awor Gran Bretaña tin un generashon hóben kende nan kustumber di kome i nan estilo di bida sintá, ta hibando nan na problemanan ku a presentá pa promé bes na Merka. Obesidat riba largu plaso ta pone ku nan tin mas chèns di desaroyá enfermedatnan manera diabétis, malesa di kurason i kanser.”

E eskritornan di e buki Food Fight (Bringa ku Kuminda) ta deklará: “Kome i bebe di mas a tuma e lugá di malnutrishon komo mundu su problema prinsipal di kuminda.” Don Peck a skirbi den The Atlantic Monthly: “Aworakí tin un nuebe mion merikano ku ‘obesidat ku por hiba na enfermedat,’ lokual ke men ku nan tin un ekseso di peso di 45 kilo òf mas.” Problemanan di salú relashoná ku peso ta hiba na un 300.000 morto prematuro pa aña na Merka, “mas ku kualke otro kos ku eksepshon di humamentu.” Peck a konkluí: “Djis aki, obesidat kisas ta surpasá tantu hamber komo malesa kontagioso i ta bira e problema mas urgente relashoná ku salú general di e poblashon mundial.” Pues, akaso nos por permití nos mes e luho di pasa por haltu di e menasa di obesidat? Dr. Walter C. Willet a skirbi den e buki Eat, Drink, and Be Healthy (Kome, Bebe i Sea Salú) ku “tin dos faktor di mas importante ku lo afektá bo salú den futuro: na promé lugá, si bo ta huma òf nò. Na di dos lugá, e sifra ku bo ta mira ora bo subi bo balansa den baño.” Aki e palabra klave ta bo salú den futuro.

Kon Bo Ta Definí Obesidat?

Ki ora nan ta konsiderá ku un persona ta obeso (òf, demasiado gordo) i ku no ta simplemente un tiki peso di mas e tin? E Klínika Mayo na Rochester (Minnesota, Merka) ta deklará: “Básikamente, un persona ta obeso ora ku e tin demasiado sobrepeso debí na muchu vèt di kurpa.” Pero kon bo ta determiná ki ora un persona tin sobrepeso? Tin tabèlnan ku ta indiká peso a base di estatura, i nan por duna hende un idea si ta djis sobrepeso nan tin òf ku nan a yega na e nivel di ta obeso. (Wak e tabèl na página 5.) Sin embargo, e tabèlnan aki no ta tene kuenta ku diferensianan den komposishon di kurpa. Klínika Mayo ta bisa: “Vèt di kurpa, en bes di solamente e peso di un persona ta un mihó indikashon di su salú.” Por ehèmpel, un atleta probablemente tin mas peso debí ku e tin hopi múskulo òf wesu pisá. Kiko ta e kousanan básiko di sobrepeso òf di obesidat? E siguiente artíkulo lo trata e pregunta ei.