E Kueba di Ninichi

DI UN ESKRITOR DI SPIÈRTA! NA MEXICO

PARÁ riba un tapeit di miónes di “ninichi” di kueba, un merikano spesialisá den eksplorashon di kueba no por a keda sin deklará: “Dios, danki ku bo a duna mi bida pa mira e maravia aki!” E tabata di bishita na e Kueba di Ninichi den zùitost di Mexico, un ret di kueba ku ta midi 529 meter largu i 17 meter hundu. Den e kueba bo por mira formashonnan espektakular di baranka. Komo ku nos a tende di e kueba, nos kier a mir’é ku nos mes wowonan.

E kueba ta keda riba tereno di un rancho privá, pues nos tabata afortuná ku nos konosé e esposa di e doño. Ora nos a pasa dor di un buraku pa yega na e sala di ninichi, nos a mira aproksimadamente 200 mion pèrla òf ninichi di kueba. Nan a forma un tapeit di 12 centimeter diki i di aproksimadamente 50 meter largu. Ningun hende por keda sin yena su man ku e pèrlanan i laga esnan mas chikí—tamaño di bonchi—basha dor di su dedenan. Esnan di mas grandi ta tamaño di un apelsina chikí. Si pa kuriosidat bo hala e ninichinan un banda pa yega na e flur sólido, lo bo ripará ku e ta formá di un kapa di pèrla lizu pegá na otro.

Kon ninichi òf pèrla di kueba ta forma? Awa ta lèk duru i forma plas. E lèkmentu aki ta pone e plafòn i muraya di e kueba lèk un mineral ku yama kalsit, i e kalsit aki ta kubri un pida materia straño, manera santu, fragmento di wesu òf asta pida rietje. Di e manera aki, segun ku pokopoko ta agregá mas kalsit, un pèrla ta forma.

Ounke e hendenan lokal konosé e kueba aki pa años, ta poko tempu pasá numa spesialistanan djafó, fasiná pa e gran kantidat di pèrla, a bishit’é. Aktualmente, hende ta hasiendo esfuerso pa investigá e kueba ekstraordinario aki i konserb’é.

Lugánan manera e Kueba di Ninichi ta rekordá nos di e palabranan di Salmo 111:2: “Grandi ta e obranan di [Yehova]; tur esnan ku tin delisia den nan ta studia nan.”