Telefon Selular—Amigu òf Enemigu?

DI UN ESKRITOR DI SPIÈRTA! NA OUSTRALIA

ALGUN aña pasá, nan tabata yama telefon selular “portable” òf “mobil,” pero esei no tabata un deskripshon korekto. Telefon tabata “portable” (portátil òf movibel) solamente si bo tabatin hopi forsa òf si bo a instalá un den bo outo, ya ku nan baterianan tabata sumamente pisá. E telefonnan ei tabata mas grandi ku kaha di sapatu, i nan a kosta míles di dòler.

Awe tin alrededor di 1,35 mil mion telefon selular. Den algun pais mas ku mitar di e poblashon tin selular. Mayoria di nan ta pas den bo plant’i man, i tin biaha bo por haña nan asta grátis. * E revista oustraliano The Bulletin ta informá: “Tin kasi mes tantu di e aparatonan aki den uso [ku e kantidat kombiná di] aparato di televishon i di kòmpiuter personal.” Den mas ku 20 pais, tin awor mas telefon selular ku tin liñanan di telefon fiho. Un eksperto di e industria ta deskribí telefon selular komo no simplemente un maravia di teknologia sino tambe “un fenómeno sosial.”

Ki efekto telefonnan selular tin riba sosiedat? Nan ta amigu òf enemigu, es desir, nan ta benefisioso òf perhudisial?

Un Gran Benefisio pa Negoshi

E oumento drástiko den benta di telefon selular ta un gran benefisio pa hopi negoshi. Un kompania grandi a deklará: “E merkado di telefon selular ta e kategoria mas grandi di produktonan elektróniko pa konsumidó.” Ku otro palabra, aworakí hende ta gasta mas plaka na telefon selular ku na kualke otro aparato elektróniko den pasado.

Por ehèmpel, na Oustralia mas ku 15 mion di e 20 mion habitantenan tin un telefon selular. E klientenan di solamente un di e tantísimo kompanianan di telefon ku tin den e pais ei a hasi 7,5 mil mion yamada di telefon selular den un aña resien. Mundialmente, telefonnan selular ta generá míles di miónes di florin pa aña pa kompanianan di telekomunikashon. Ta fásil pa komprondé dikon negoshinan grandi ta mira telefon selular komo un amigu.

Kreando un Idioma Nobo

Hopi di e miónes di mensahenan ku ta ser interkambiá entre e aparatonan sofistiká aki no ta den forma di abla, sino den forma di palabra skirbí. En bes di papia na telefon, un kresiente kantidat di usadó di telefon selular—foral hóbennan—ta usa e servisio ku yama Short Message Service (Servisio di Mensahe Kòrtiku; SMS). E servisio aki ta permití nan (pa un suma relativamente chikí) taip i manda mensahenan breve pa otro. Komo ku pa komuniká den e manera aki bo mester taip un mensahe riba e teklanan chikititu di e telefon, fanátikonan di SMS ta usa un  forma abreviá di idioma ku ta kombiná lèter ku number pa krea zonidu di palabra. * Apesar di e inkumbiniensia di formulá i taip un mensahe, na kontraste ku papia ku e resipiente, hende ta interkambiá tur luna rònt di 30 mil mion mensahe mundialmente.

Over di kiko tur e mensahenan aki ta bai? Un estudio britániko a deskubrí ku 42 porshento di hóbennan entre 18 pa 24 aña ta usa SMS pa flirt, 20 porshento ta usa e forma shik aki di komunikashon pa pidi un persona di e sekso opuesto pa bai sali ku nan, i 13 porshento a yega di usa SMS pa pone fin na un relashon.

Algun analista di tendensianan sosial ta preokupá ku e manera mankaron di usa ortografia i di formulá frase den mensahenan di SMS ta perhudikando e abilidat di lesa i skirbi di hóbennan. Tin otro personanan ku no ta di akuerdo ku esei, i nan ta bisa ku e fenómeno di SMS ta “kreando interes pa skirbi den un generashon nobo.” Un bosero di un empresa ku ta produsí un dikshonario oustraliano a bisa e korant Sun-Herald: “No ta hopi biaha nos ta haña e oportunidat pa desaroyá henter un estilo nobo [di idioma] . . . e kombinashon di manda mensahe skirbí [SMS] i internet ta nifiká ku hóbennan ta skirbiendo hopi mas tantu. [Nan] mester por ta ekspresá nan mes sufisiente fásil i kla pa por siña e estilo i dominá e palabranan popular i e símbolonan . . . di e manera di skirbi en partikular aki.”

Algun Desaroyo Desfaborabel

Miéntras ku telefon selular ta un hèrmènt útil pa sosialisá i pa hasi negoshi, pa hopi empleado e aparatonan aki lo por parse tin biaha mas manera un kadena ku un amigu; nan ta sinti nan mará na nan ofisina. Un sondeo a revelá ku 80 porshento di empleado den ramo di propaganda i 60 porshento di trahadó den konstrukshon ta sinti nan preshoná pa ta disponibel tur momentu, sea pa nan dunadó di trabou òf pa kliente. E preshon ku hende ta sinti pa kontestá un yamada di telefon selular sin importá unda nan ta òf kiko nan ta hasiendo, ta kreando loke un investigadó ta yama un “kultura di interupshon.” Konsekuentemente, ingenieronan a desaroyá un tipo di material di konstrukshon pa usa den restorant i teater ku por blòkia e señalnan di telefon selular.—Wak e kuadro “Algun Sugerensia pa Uso di Selular.”

Mas ku djis krea interferensia iritante, e aparatonan aki ku ta tur kaminda, tin e potensial di bira un enemigu públiko. Un estudio kanades a deskubrí ku usamentu di selular miéntras ku bo ta kore outo ta mesun peligroso ku kore outo bou di influensia di alkohòl. Profèser Mark Stevenson, di e Sentro di Investigashon di Leshon na Universidat di Western Oustralia, ta splika ku ta hopi mas difísil tene un kòmbersashon na telefon ku djis tene un kòmbersashon ku un persona den outo. Apesar di e peligernan i e echo ku na algun lugá polis por but shofùrnan ku tin telefon den man, un sondeo resien a revelá ku 1 di kada 5 shofùr oustraliano ta manda mensahe di SMS i un tersera parti ta bèl òf risibí yamada ku nan selular den man miéntras ku nan ta tras di stür.

E peliger di uso inapropiá di selular ta eksistí tambe durante biahe ku avion. Ounke e sistema eléktriko den avionnan mas nobo ta ser protehá kontra di señalnan di selular, ainda tin avion den servisio ku segun informe ta  vulnerabel pa interferensia. New Scientist ta informá: “Den tèstnan abordo di dos avion, Outoridat Sivil di Aviashon di Gran Bretaña [CAA] a konfirmá ku radiashon di telefon selular ta interferí ku ekipo elektróniko ku ta krusial pa un avion bula safe.” Identifikando un menasa importante ku telefonnan ta forma, un bosero di CAA a bisa: “Mas leu un telefon selular ta for di un mast di telefon, mas potensia e ta saka. Pues segun ku e avion ta subi despues di despegue, e señal di e selular ta bira mas potente, i asina e ta oumentá e nivel di interferensia na un momentu krítiko di un vuelo.” Un estudio oustraliano a revelá ku aparatonan elektróniko personal, entre nan telefon selular, a kousa vários insidente kaminda avionnan komersial a haña problema durante vuelo debí ku pasaheronan a ignorá e atvertensia pa paga e aparatonan ei tanten ku nan ta na bordo.

Telefon Selular i Kanser

Un kontroversia ku ainda ta reina ta si e frekuensianan di radio ku telefon selular i e mastnan di telefon ta saka, por kousa kanser den hende. Debí ku ta sientos di miónes di hende ta usa e aparatonan aki, asta si ta solamente un porsentahe chikí lo mester desaroyá problema di salú, esei lo nifiká un peliger grandi pa salubridat. P’esei desénas di estudio sientífiko profundo a investigá e efekto di radiashon di telefon selular riba tehido bibu. Na ki konklushon nan a yega?

E Grupo di Eksperto Independiente Relashoná ku Telefon Selular (IEGMP) a publiká un informe ku ta bisa: “E Grupo di Eksperto ta kere ku a base di e evidensia aktualmente disponibel, no tin motibu pa e poblashon general preokupá pa e uso di telefon selular.” New Scientist tambe a informá: “Apesar di e historianan pa spanta hende den e último añanan, mayoria di evidensia te ku awor ta parse di indiká ku ser eksponé na e frekuensia di radio di telefon selular no tin mal efekto riba salú. Estudionan ku a demostrá ku tabatin un efekto, a resultá difísil pa reprodusí.”

Pero komo ku e duda ta keda tokante e efektonan di telefon selular riba salú, kompanianan ta sigui hinka miónes di florin den mas investigashon. Tanten ku no haña un kontesta definitivo, IEGMP ta rekomendá lo siguiente: “Usa telefon [selular] pa un periodo mas kòrtiku posibel. Usa telefon ku tin nivelnan abou di índise di apsorbashon spesífiko di energia (SAR). Usa esnan ku tin spiker òf earphone i otro aparatonan basta ku a keda probá ku nan ta redusí SAR.” * E Grupo di Eksperto ta rekomendá tambe ku “mester deskurashá mucha bou di dieseis aña di usa telefon selular,” ya ku e sistema nervioso di mucha ku ta desaroyando lo hasi nan “mas vulnerabel pa peliger di salú ku ainda no a ser identifiká.”

Ounke ataká pa kontroversia, telefon selular ta hasiendo un impakto profundo tantu riba tereno ekonómiko komo sosial. Meskos ku su primunan elektróniko—televishon i kòmpiuter personal—telefon selular tin e potensial pa ta sea un esklabo útil òf un doño eksigente. E poder pa determiná si e ta bira un amigu òf enemigu, literalmente ta den man di e usadó.

[Nota]

[Kuadro/Plachi na página 19]

ALGUN SUGERENSIA PA USO DI SELULAR

1. Baha bo stèm si bo ta usando bo telefon den un lugá públiko. E mikrofon di e telefon ta hopi sensitivo, i probablemente hende rondó di bo no ta interesá den bo kòmbersashon privá.

2. Paga e telefon òf pon’é na silensio òf na e funshon di vibra ora bo ta na reunionnan religioso, di negoshi òf den sine òf na otro evenemento públiko òf den un restorant.

3. No usa un telefon di tene den man ora bo ta tras di stür.

[Plachi na página 18]

Mundialmente, hende ta manda rònt di 30 mil mion mensahe skirbí tur luna

[Plachi na página 20]

Usa un selular tras di stür por ta mesun peligroso ku kore outo bou di influensia di alkohòl