E Punto di Bista Bíbliko

Dios Ta Tur Kaminda?

DIOS ta ser deskribí apropiadamente komo omnipotente i omnisapiente, esta, ku e ta todopoderoso i ku e sa tur kos. Sin embargo, algun hende ku ke purba deskribí e grandesa di Dios mas aleu, ta agregá un di tres palabra: omnipresente. Nan ta kere ku Dios ta presente tur kaminda na e mesun momentu.

Ounke Beibel no ta menshoná ningun di e palabranan deskriptivo aki, siñansa bíbliko klaramente ta apoyá e dos proménan. (Génesis 17:1; Hebreonan 4:13; Revelashon 11:17) Dios realmente ta omnipotente, i e ta omnisapiente den e sentido ku nos no por skonde nada p’e. Pero e ta omnipresente? Dios ta tur kaminda, òf e ta un persona ku tin un lugá spesífiko di biba?

Unda Dios Ta?

Vários versíkulo di Beibel ta menshoná “shelu” komo Dios su “lugá di biba.” (1 Reinan 8:39, 43, 49; 2 Krónikanan 6:33, 39) Sin embargo, un relato di Beibel ta deskribí e magnitut di Yehova Dios ku e siguiente palabranan: “Di bèrdat Dios lo biba riba tera serka hende? Mira, shelu i e shelu di shelunan no por kontené bo.”—2 Krónikanan 6:18.

Beibel ta bisa: “Dios ta Spiritu.” (Juan 4:24) P’esei, e ta biba den un region spiritual independiente di e universo físiko. Ora Beibel ta menshoná “shelu” komo Dios su lugá di biba, e ta referí na e echo ku kaminda Dios ta biba ta hopi mas elevá na komparashon ku e ambiente físiko ku nos ta biba aden. Loke ta mas importante, Beibel ta siña nos ku Dios su lugá di biba ta klaramente distinto for di e universo físiko, ounke a la bes e ta un lugá masha spesífiko.—Jòb 2:1, 2.

Dios Ta un Persona

Hesus a papia di Yehova su lugá di biba ora el a bisa su disipelnan: “Den kas di mi Tata tin hopi lugá-di-biba. . . . Mi ta bai pa prepará un lugá pa boso.” (Juan 14:2) Unda Hesus a bai? Ku tempu el a “drenta . . . den shelu mes, awor pa aparesé den e presensia di Dios pa nos.” (Hebreonan 9:24) E relato aki ta siña nos dos faktor importante tokante Yehova Dios. Promé, e tin un lugá literal di biba, i di dos, e ta un  persona i no simplemente un forsa indefinibel ku ta biba tur kaminda.

Ta p’esei Hesus a siña su disipelnan hasi orashon di e manera aki: “Nos Tata ku ta den shelu.” Nan mester a dirigí nan orashon na un persona, Yehova, kende ta na ún lugá, esta, e lugá spiritual deskribí komo “shelu” den Beibel. (Mateo 6:9; 12:50) E siñansa aki tabata na armonia ku e manera ku e pueblo di Dios a ser siñá pa hasi orashon pa mas ku 1.500 aña. E eskritonan di mas bieu inspirá dor di Dios ta kontené e siguiente orashon: “Wak abou for di bo habitashon santu, for di shelu, i bendishoná bo pueblo.”—Deuteronomio 26:15.

Dios Su Spiritu Santu Ku Ta Yega Tur Kaminda

Ounke semper Beibel ta indiká ku Dios tin un lugá spesífiko di biba, hopi bes e ta bisa di e spiritu santu ku e ta tur kaminda. E salmista David a puntra: “Na unda mi por bai for di bo spiritu? Òf na unda mi por hui bai for di bo presensia?” (Salmo 139:7) Tekstonan manera esaki a konfundí algun hende i podisé nan ta yega n’e konklushon ku Dios ta omnipresente. Pero ora nos konsiderá e konteksto di e versíkulo aki i di otro teksto, ta bira bisto ku Yehova su spiritu santu—òf su poder den akshon—por ser ekstendé di Yehova su lugá fiho pa kualke otro lugá den e universo físiko.

Meskos ku un tata ta saka su man pa yega na su yunan pa konsolá nan i apoyá nan, Yehova por saka su man—òf spiritu santu—pa yega te na kualke parti di e region spiritual òf di e universo físiko pa kumpli ku Yehova su propósito. P’esei e salmista por a bisa: “Si mi tuma ala di mardugá, si mi bai biba den e partinan mas alehá di laman, ayanan tambe bo man lo guia mi, i bo man drechi lo kohe mi tene.”—Salmo 139:9, 10.

Bo Por Ta Amigu di Dios

Humildemente i amorosamente Yehova Dios a permití hende deskribí é i su lugá di biba usando términonan humano ku mas aptamente ta laga komprondé unda e ta biba i ki klase di persona e ta. Di e manera aki i tambe den otro manera, ta komo si fuera e ta “humiá su mes pa mira e kosnan ku ta den shelu i riba tera.” (Salmo 113:6) Pero tòg, apesar di esei hende lo no por tin un komprondementu kompletu di Dios su naturalesa.

Yehova simplemente ta demasiado magnífiko, demasiado grandi i demasiado maravioso pa wòrdu deskribí plenamente ku términonan humano. Pues, ounke e Skritura ta papia di Dios su lugá di biba komo un sitio spesífiko, ta simplemente imposibel pa hende komprondé e dimenshon spiritual ei kompletamente.—Salmo 139:6.

Sin embargo, tòg ta un gran konsuelo ku te na sierto grado nos ta komprondé Yehova su berdadero naturalesa, i ku nos ta realisá ku e no ta un forsa impersonal i indefinibel ku ta den tur kos den universo. Mas bien, e ta un persona ku un lugá spesífiko di biba i un personalidat definí ku ta ser karakterisá pa amor i ternura. E konosementu ei ta habri kaminda pa e oportunidat di mas grandi ku kualke hende por tin: e chèns di tin un amistat personal i pa semper ku e Soberano Todopoderoso di universo.—Santiago 4:8.