Edukashon basá riba Beibel por kambia bida di hende. Ban konsiderá dos ehèmpel: Ricardo i Andres.

RICARDO: Mi a djòin un gang ora mi tabatin 15 aña. Mi amigunan nobo tabatin un influensia grandi riba mi. De echo, mi meta den bida tabata pa pasa dies aña den prizòn! Esei por zona straño. Pero, den mi bario nan tabata respetá i atmirá esnan ku a bai será. I ami kier a bira meskos ku nan.

Mi tabata hiba un bida inmoral, usa droga i mi tabata un persona violento. Un anochi mi tabata enbolbí den un tiroteo. Mi a pensa ku nan lo mata mi, pero mi a logra skapa. Despues di esei, mi a kuminsá pensa ta kiko mi ta hasiendo ku mi bida i mi a tuma e desishon pa hasi kambio. Pero kon lo mi por logra esei? Serka ken mi por haña yudansa?

Mayoria di mi famia tabata infelis. Nan bida tabata yen di problema. Pero e famia di un di mi tionan tabata diferente. Mi tabata sa ku nan ta bon hende i ku nan ta biba segun prinsipio di Beibel. Asta nan siña mi ku Dios su nòmber ta Yehova. Un poko tempu despues di e tiroteo, mi a hasi orashon na Yehova. Mi a yam’é na su nòmber i mi a pidié pa yuda mi. Pa mi sorpresa, e siguiente dia, un Testigu di Yehova a bati na mi porta! I despues, el a kuminsá studia Beibel ku mi.

No muchu tempu despues, mi a enfrentá un reto grandi. Mi eks-amigunan tabata pidi mi kada biaha pa mi pasa tempu ku nan. Aunke no tabata fásil, mi tabata bisa nò. Mi tabata determiná pa sigui studia Beibel. I mi ta masha kontentu ku mi a tuma e desishon ei! Mi bida a kambia kompletamente i mi a haña berdadero felisidat.

Mi ta kòrda ku mi a yega di hasi orashon i a bisa Dios ku un tempu mi tabata kier a pasa dies aña den prizòn pa haña rèspèt komo miembro di un gang. Pero, awor mi a pidié pa permití mi sirbié komo un predikadó di tempu kompleto sikiera pa dies aña pa mi por siña otro hende tokante Beibel. Dios a kontestá mi orashon i mi tin 17 aña komo un predikadó di tempu kompleto. I e bon ta ku nunka mi no a bai prizòn.

Mayoria di mi eks-amigunan sí a bai será pa hopi aña. Otronan ta morto. Pero, ora mi wak bèk, mi ta masha gradisidu na mi famia ku ta Testigu. Nan tabata dispuesto pa ta diferente i pa biba segun prinsipio di Beibel. Mi a siña respetá nan mas ku kualke miembro di e gang. Riba tur kos, mi ta masha gradisidu na Yehova kende a siña mi e mihó manera di biba.

 ANDRES: Mi a nase i krese den un bario pober, yen di droga, asesinato, ekstorshon i prostitushon. Mi tata tabata un alkohóliko i adikto na kokaina. Mi tata i mi mama semper tabata pleita i asta bringa ku otro.

Na un edat yòn, mi a kuminsá bebe alkohòl i usa droga. Mi a pasa mayoria di mi tempu riba kaya. Mi tabata hòrta i despues bende e kosnan ku mi a hòrta. Ora mi a bira mas grandi, mi tata kier a sera un amistat ku mi pero el a hasi esaki na un manera robes. El a siña mi kon pa pasa droga i otro merkansia ilegal di kontrabanda pa despues bende nan. Den un poko tempu mi a gana hopi plaka. Un dia, polis a bini na mi kas i a arestá mi. Mi a ser sentensiá na sinku aña di prizòn pa intento di asesinato.

Un mainta, nan a anunsiá den e loutspiker di prizòn ku Testigunan di Yehova lo a bai duna un diskurso tokante Beibel, i nan a invitá tur e prezunan pa bin skucha. Mi a bai tende e diskurso. Loke nan a bisa tabata zona lógiko i mi a kuminsá studia Beibel ku e Testigunan. Nan no a purba di suavisá loke Beibel ta bisa, sino mas bien nan a mustra mi Dios su normanan moral haltu.

Mi a realisá ku mi no por a hasi kambio sin haña yudansa, spesialmente ora e otro prezunan a kuminsá menasá mi pasobra nan no tabata gusta ku mi ta studia Beibel. P’esei mi a hasi orashon na Yehova i a pidié pa duna mi forsa i sabiduria. Yehova a yuda mi, i en bes di laga miedu dominá mi, mi a haña kurashi pa papia ku e prezunan tokante Beibel.

Ora e momento a yega pa mi sali fo’i prizòn, mi tabata asina nèrvioso ku mi kier a keda un tiki mas den prizòn. Miéntras ku mi tabata saliendo, algun prezu tabata zuai man yama ayó. Algun di nan asta a bisa mi yen di kariño: “Bai kas trankilo, pastor.”

Mi no ke pensa mes kon mi bida lo tabata si mi no a laga Dios eduká mi. Mi ta hopi gradisidu ku Dios ta stima mi i no a mira mi komo un kaso pèrdí. *