E palabra disiplina por nifiká guia òf siña. Tin biaha, esei por enserá korigí mal kondukta di un yu. Pero mayoria di biaha e ta nifiká siña bo yu prinsipionan ku por yud’é tuma bon desishon ora e bira adulto.

Den e último dékadanan, kasi no tin disiplina mas den algun famia pasobra mayornan tin miedu ku si nan korigí nan yunan, esei lo tin un mal efekto riba nan balor propio. No opstante, mayornan sabí ta pone regla rasonabel pa nan yunan i ta siña nan pa apliká e reglanan akí.

“Yunan tin mester di sa kiko tin mag i kiko no tin mag, ya ku esei lo yuda nan krese i bira adultonan maduro. Sin disiplina, yunan ta manera un boto sin timon, ku finalmente lo pèrdè rumbo i asta noufragá.”—Pamela.

Sea konsistente. Si bo yu no ta sigui bo reglanan, splik’é ku su akshonnan lo tin konsekuensia. Pero si e ta obedesé, elogi’é pa esei.

“Regularmente mi ta elogiá mi yunan pa nan obedensia apesar di e echo ku nos ta biba den un mundu kaminda kasi no tin hende obediente mas. Si bo elogiá nan, lo ta mas fásil pa nan aseptá korekshon ora esei ta nesesario.”—Christine.

PRINSIPIO DI BEIBEL: “Kiko ku un hende sembra, esei lo e kosechá tambe.”—Galationan 6:7.

Sea rasonabel. Ora bo ta disipliná bo yu, tene kuenta ku su edat, su abilidat i e gravedat di loke el a hasi. Un straf hopi biaha ta mas efektivo ora e tin di haber ku e malu ku el a hasi. Por ehèmpel, si e no sigui bo reglanan enkuanto uso di telefòn, e konsekuensia lo por ta ku temporalmente e no tin mag di usa su telefòn òf e tin mag di us’é pa sierto kos so. Pero na mes momento purba di no rabia pa algu di ménos importansia djis pasobra esei a iritá bo.

“Ami ta purba saka afó si mi yu a desobedesé mi deliberadamente òf sin ku e por a yuda. Tin un diferensia entre hasi algu robes bes tras bes pa motibu di un problema di karakter ku bo mester korigí i un fout pa kua bo mester djis hala su atenshon.”—Wendell.

PRINSIPIO DI BEIBEL: “No iritá boso yunan pa nan no desanimá.”—Kolosensenan 3:21.

Sea amoroso. Ora un yu sa ku su mayornan ta disiplin’é prinsipalmente pasobra nan ta stim’é, ta hopi mas fásil pa e yu aseptá nan disiplina i sigui e reglanan ku nan a pone.

“Ora nos yu hòmber hasi fout, nos ta bis’é ku nos ta orguyoso di dje pa tur e bon desishonnan ku el a tuma den pasado. I nos ta splik’é ku e fout ku el a hasi no ta daña su reputashon si e hasi e kambionan nesesario i ku nos ta kla pa yud’é.”—Daniel.

PRINSIPIO DI BEIBEL: “Amor tin pasenshi i ta bondadoso.”—1 Korintionan 13:4.