PA HÓBENNAN
10: Konfiabel
LOKE ESAKI TA NIFIKÁ
Un hende konfiabel ta gana konfiansa di su mayornan, amigunan i doño di trabou. Nan ta sigui regla, ta kumpli ku nan promesanan i semper ta papia bèrdat.
DIKON ESEI TA IMPORTANTE?
Den mayoria kaso, e kantidat di libertat ku bo ta haña ta dependé di e konfiansa ku bo a gana atraves di tempu.
“E mihó manera pa gana e konfiansa di bo mayornan ta ora ku na tur momento bo ta demostrá ku bo ta un persona maduro i responsabel, no solamente ora bo ta ku nan.”—Sarahi.
PRINSIPIO DI BEIBEL: “Sigui pone boso mes na prueba pa demostrá ki tipo di hende boso ta.”—2 Korintionan 13:5.
LOKE BO POR HASI
Si bo ke gana mas konfiansa di otro hende òf si bo ke pa nan konfia bo atrobe, e siguiente konsehonan por yuda bo.
Sea onesto. Si bo ta un persona ku ta gaña, masha lihé hende lo stòp di konfia bo. Di otro banda, si bo ta un persona onesto i habrí, spesialmente ora bo hasi fout, bo por gana konfiansa di otro hende.
“Ta fásil pa ta onesto ora kos ta bai bon. Pero ora bo ta onesto den kosnan ku por duna un mal impreshon di bo, hende lo konfia bo mas.”—Caiman.
PRINSIPIO DI BEIBEL: “Nos ke komportá nos mes na un manera onesto den tur kos.”—Hebreonan 13:18.
Sea responsabel. Segun un enkuesta na Merka, 78 porshento di e profeshonalnan di rekurso humano ta mustra ku un di e tres kosnan di mas importante ku un kompania ta ferwagt di un trahadó ta pa e ta responsabel. Si bo bira responsabel, esei lo yuda bo ora bo ta un adulto.
“Mi mayornan ta ripará ku mi ta responsabel ora mi ta hasi mi trabounan di kas sin ku nan mester keda kòrda mi. Mas responsabel mi ta, mas nan ta konfia mi.”—Sarah.
PRINSIPIO DI BEIBEL: “Mi tin sigur ku lo bo hasi esei . . . Mi sa ku lo bo hasi asta mas di loke mi ta bisa.”—Filemon 21.
Mustra pasenshi. Dikon? Pasobra ta fásil pa ripará ora hóbennan ta krese i bira fuerte. Pero ta tuma tempu pa un hende ripará ku nan ta birando maduro i responsabel.
“Ta tuma tempu i esfuerso pa gana e konfiansa di bo mayornan i di otro hende. Bo no por spera ku hende lo konfia bo djis pasobra bo tabata responsabel un biaha.”—Brandon.
PRINSIPIO DI BEIBEL: “Bisti . . . pasenshi.”—Kolosensenan 3:12.
Otro Artíkulo Interesante
PINTAMENTU RIBA BÒRCHI
Kon Mi Por Papia ku Mi Mayornan?
Kon bo por papia ku bo mayornan si bo no tin ègt gana di papia?
