Un meta ta mas ku djis un soño òf algu ku bo ta deseá pa kumpli. Pa alkansá bo meta, bo mester plania, ta fleksibel i traha duru.

Meta por ta di plaso kòrtiku (por tuma dia òf siman pa logra), di plaso mediano (luna) i di plaso largu (un aña òf mas). Metanan ku ta di plaso largu por ser lográ ora bo pone metanan di plaso kòrtiku i mediano.

Ora bo alkansá bo metanan, esei por yuda bo haña mas konfiansa den bo mes, fortalesé bo amistat ku otro hende i haña mas felisidat.

Konfiansa den bo mes: Ora bo pone metanan chikitu i logra kumpli ku nan, bo ta haña mas konfiansa den bo mes pa traha riba metanan ku ta mas difísil pa alkansá. Bo ta asta sinti mas konfiansa pa enfrentá retonan di tur dia, manera preshon di pareu.

Amistat: Hende gusta di ta rònt di otro hende ku tin metanan, esta, esnan ku sa kiko nan ke i ta traha duru pa logra esei. Ademas, un di e mihó maneranan pa fortalesé un amistat ta ora bo ta traha ku un otro persona pa alkansá e mesun meta.

Felisidat: Ora bo pone un meta i bo alkans’é, bo ta sinti bo bon i felis.

“Mi gusta pone meta. Metanan ta laga mi keda okupá i ta duna mi gana pa sigui traha pa alkansá nan. I ora mi logra alkansá mi meta, ta dushi pa wak bèk i bisa: ‘Wauw, mi a logra!’”—Christopher.

PRINSIPIO DI BEIBEL: “Si bo keda warda te ora e bientu i klima ta nèt bon, nunka lo bo no planta ni kosechá nada.”—Eklesiástes 11:4, Today’s English Version.

Sigui e konsehonan akí pa pone meta i alkansá nan.

Skohe bo metanan. Traha un lista di meta ku lo bo ke logra. I skohe kua lo bo ke traha riba dje promé, di dos, di tres, etcetera.

Plania. Hasi lo siguiente pa kada meta:

• Pone e fecha ku lo bo ke kumpli ku bo meta.

• Pone e pasonan ku lo bo tuma riba papel.

• Pensa ki problemanan bo por enfrentá i kon bo por resolvé nan.

Apliká. No warda te ora bo tin tur detaye pa kuminsá. Puntra bo mes, kiko ta e promé kos ku mi por hasi pa alkansá mi meta? Despues hasié. Wak bo progreso segun ku bo ta logra kada paso.

PRINSIPIO DI BEIBEL: “E plannan di hende balente siguramente ta kondusí na abundansia [òf ta duna bon resultado].”—Proverbionan 21:5.