Pordoná ta nifiká ku bo no ta keda karga renkor pa e ofensa ku a ser kometé. Pero esei no ta nifiká ku bo mester hasi komo si fuera ta algu chikitu a sosodé òf ku nunka nada no a pasa.

PRINSIPIO DI BEIBEL: “Sigui soportá otro i pordoná otro libremente, asta si un di boso tin motibu pa keha un otro.”—Kolosensenan 3:13.

“Ora bo ta stima un hende, bo ta pasa por alto di su imperfekshonnan i ta mira e esfuerso ku e persona ta hasi pa mehorá.”—Aaron.

Pasobra si bo karga renkor, bo por kousa daño físiko i emoshonal na bo mes, i na bo matrimonio.

“Un biaha mi kasá a pidi mi despensa pa algu ku el a hasi ku a hùrt mi masha hopi mes. Tabata duru pa mi pordon’é. Finalmente mi a logra pordon’é, pero ta duel mi ku mi no a pordon’é mas lihé pasobra esei a kousa tenshon innesesario den nos matrimonio.”—Julia.

PUNTRA BO MES:

E siguiente biaha ku bo kasá hùrt bo pa motibu di algu ku el a bisa òf hasi, puntra bo mes:

• Mi ta muchu sensitivo?

• E ofensa ta asina grandi ku e mester pidi mi pordon, òf ta algu ku mi por djis pasa por alto di dje?

PAPIA KU OTRO TOKANTE LO SIGUIENTE:

• Kuantu tempu ta dura pa nos pordoná otro?

• Kiko nos por hasi pa pordoná otro mas lihé?

ALGUN SUGERENSIA

• Ora bo kasá hùrt bo, no pensa ku el a hùrt bo pa malu.

• Purba hustifiká e komportashon di bo kasá; no lubidá ku “nos tur ta trompeká hopi biaha.”—Santiago 3:2.

“Ta fásil pa pordoná si boso tur dos ta fout, pero ta mas difísil pa pordoná ora ta parse ku un di boso dos so ta fout. Bo mester ta realmente humilde pa bo pordoná.”—Kimberly.

PRINSIPIO DI BEIBEL: “Sea lihé pa drecha asuntu.”—Mateo 5:25.