HOPI mamífero, òf zoogdier, di awa friu tin un kapa diki di vèt bou di nan kueru pa yuda tene nan kurpa kayente. Pero zeeotter, òf nutria di laman, tin un otro manera pa tene su kurpa kayente: ku su lana diki.

Pensa un ratu riba lo siguiente: E lana di zeeotter ta mas diki ku di kualke otro mamífero. Nan tin 155.000 kabei pa kada centimeter kuadrá. Ora un zeeotter ta landa, su kurpa ta retené un kapa di aire entre su lana i su kueru. E aire ta tene su kurpa kayente ya ku awa friu no por mishi ku su kueru.

Sientífikonan ta pensa ku nos por siña hopi di e zeeotter su lana. Nan a tèst yas ku lana artifisial di diferente largura i distansia for di otro pa chèk kua ta wanta kayente mihó. Investigadónan a yega na e konklushon ku “mas serka di otro e kabeinan ta i mas largu nan ta, mas seku e kabeinan ta keda.” Na moda di papia anto, e zeeotter por gaba ku e tin un kapa di lana masha efisiente mes.

Investigadónan ta spera ku nan estudionan lo yuda nan diseñá i produsí tela nobo ku no ta laga awa pasa dor di dje. Esaki por pone ku algun hende por kuminsá puntra nan mes si no ta mas mihó pa hende ku ta sambuyá den awa friu bisti wetsuit ku lana meskos ku di zeeotter.

Kiko bo ta pensa? E lana di zeeotter ku ta tene su kurpa kayente a bini di evolushon òf di kreashon?