Nos universo ta bon organisá. Segun un artíkulo ku a sali den e revista Astronomy, “e Galaksianan no ta bentá unda ku ta, nan ta bon organisá.” Kon esei ta posibel? Sientífikonan ta kere ku esei ta posibel pa motibu di un materia invisibel ku ta konosí komo dark matter. E supstansia akí ta manera un forsa invisibel ku ta tene e galaksianan na nan lugá.

Dikon nos universo ta asina bon organisá? Bo ta kere ku e universo lo tabata asina bon organisá si no tabatin un Kreador? Laga nos wak kiko defuntu Allan Sandage a bisa. E ta ser konsiderá “un di e mihó astrónomonan di siglo 20,” i e tabata kere den Dios.

El a bisa: “Mi no ta kere ku un struktura asina bon organisá a originá for di káos. Algu mester a organis’é.”

 Nos universo ta eksaktamente manera e mester ta pa sostené bida. Por ehèmpel, pensa riba e forsa ku ta sòru pa solo kima na un velosidat konstante. Si e forsa ei tabata mas suak, solo nunka lo por a forma. Si e forsa tabata mas fuerte, solo lo a kima kompletamente i disparsé.

Tin hopi forsa den e universo ku ta eksaktamente manera nan mester ta pa bida por eksistí. Eskritor di siensia Anil Ananthaswamy a bisa ku si un di e forsanan ei tabata funshoná na un manera diferente, “strea, planeta i galaksia nunka lo por a ser formá. Bida lo tabata imposibel.”

Nos universo tin un lugá di biba ideal pa hende. Planeta Tera tin e atmósfera ideal, e kantidat di awa nesesario i un luna ku tamaño perfekto pa tene Tera na su lugá. National Geographic ta bisa: “E manera kompliká ku geologia, ekologia i biologia ta hinká den otro ta hasi e baranka straño akí [Tera] e úniko lugá ideal . . . ku hende por biba ariba.” *

Un eskritor a bisa ku nos sistema solar ta leu for di tur otro strea den nos galaksia. Pero esei mes ta loke ta hasi bida riba Tera posibel. Si nos tabata biba mas serka di otro strea—sea meimei di nos galaksia òf na rant—nos lo no por a biba riba Tera pasobra lo tabatin muchu hopi radiashon. En bes di esei, Tera ta den e parti di e galaksia ku por sostené bida.

Basá riba su konosementu sientífiko di universo i su leinan, e físiko Paul Davies a konkluí: “Mi no por kere ku nos eksistensia den e universo akí ta un simpel koinsidensia, un aksidente den historia, un suseso kósmiko inesperá. . . . Nos eksistensia tin un propósito.” Davies no a siña hende ku Dios a krea e universo i bida humano. Pero, ta parse ku nos universo i Tera a ser diseñá pa sostené bida. Kiko abo ta pensa? Akaso ta parse asina pasobra di bèrdat nan a ser diseñá?