1. Despues ku Adam ku Eva a peka, kiko Yehova a revelá tokante nos enemigu?

ADAM tabata sa ku kolebra no por papia. Pues, ora el a haña sa ku un kolebra a papia ku Eva, lo e por a pensa ku ta un spiritu a papia ku Eva. (Gén. 3:1-6) Adam ku Eva no tabata sa kasi nada tokante e spiritu ei. Apesar di esei, konsientemente Adam a djòin e persona deskonosí ei i a desobedesé Yehova, su Tata selestial. (1 Tim. 2:14) Mesora Yehova a revelá algun informashon tokante e enemigu akí i a primintí ku un dia lo e destruí e kriatura ei. Ademas, Yehova a duna e spièrtamentu ku, pa un tempu, e spiritu ei ku a papia mediante e kolebra lo a oponé tur hende ku ta stima Dios.—Gén. 3:15.

2, 3. Dikon Yehova no a duna masha informashon tokante Satanas promé ku yegada di e Mesías?

² Debí na su sabiduria, Yehova a skohe pa nunka revelá nòmber di e angel ei ku a rebeldiá kontra dje. * Es mas, despues di e rebelion den Hòfi di Eden, Yehova a warda un 2.500 aña pa revelá ken e angel rebelde ei tabata. (Yòb 1:6) E angel rebelde ei a bira konosí komo Satanas. “Satanas” ta un título ku ta nifiká  “Opositor.” E título ei ta aparesé solamente den tres buki di e Skritura Hebreo, esta, Promé Krónikanan, Yòb i Zakarías. Pero dikon Yehova no a duna masha informashon tokante e enemigu akí promé ku yegada di e Mesías?

³ Aparentemente, Yehova no kier a hala muchu atenshon na Satanas. P’esei, Yehova no a inkluí hopi detaye tokante Satanas i tokante su obranan den e Skritura Hebreo. E motibu prinsipal pakiko Yehova a laga skirbi e Skritura Hebreo tabata pa yuda hende identifiká e Mesías i siguié. (Luk. 24:44; Gal. 3:24) Despues di yegada di e Mesías, Yehova a usa e Mesías i su disipelnan pa revelá hopi di e kosnan ku nos sa di Satanas i di e angelnan ku a djòin Satanas. * I esei tabata na su lugá pasobra ta Hesus i su ko-gobernantenan ungí Yehova lo usa pa destruí Satanas i su siguidónan.—Rom. 16:20; Rev. 17:14; 20:10.

4. Dikon nos no mester tin demasiado miedu di Diabel?

⁴ Apòstel Pedro a deskribí Satanas e Diabel komo “un leon ku ta grita,” i Huan a yam’é “kolebra” i “dragon.” (1 Ped. 5:8; Rev. 12:9) Pero nos no mester tin demasiado miedu di Satanas, pasobra su poder ta limitá. (Lesa Santiago 4:7.) Nos tin protekshon di Yehova, di Hesus i di e angelnan fiel. Ku nan yudansa, nos por resistí nos enemigu. No opstante, ta bon pa nos haña kontesta di tres pregunta importante: Kuantu influensia Satanas tin? Kon Satanas ta purba di influensiá hende? Satanas su poder tin límite? P’esei, laga nos trata e preguntanan akí i mira ki lès nos por siña for di nos análisis.

5, 6. Dikon e gobièrnunan humano no por trese e kambionan ku humanidat tin mas mester di dje?

⁵ Un gran kantidat di angel a djòin Satanas den su rebelion. Promé ku e Diluvio, Satanas a logra pone algun di e angelnan ei kai den tentashon pa nan tene relashon seksual ku hende muhé. Beibel ta deskribí na un manera simbóliko loke Satanas a hasi, bisando ku e dragon a lastra un terser parti di e streanan di shelu huntu kuné. (Gén. 6:1-4; Hudas 6; Rev. 12:3, 4) Ora e angelnan ei a bandoná e famia selestial, nan a rechasá Yehova i a skohe pa Satanas dirigí nan. Pero nan no ta djis un grupo di demoño desorganisá. Satanas a lanta su propio reino, imitando asina e Reino di Dios. Satanas a hasi su mes rei, a organisá e demoñonan, a duna nan outoridat i a hasi nan gobernante di mundu.—Efe. 6:12.

⁶ Satanas ta usa su organisashon invisibel pa dirigí tur gobièrnu humano. Nos por tin sigur di esei pasobra ora Satanas a mustra Hesus “tur e reinonan di e tera habitá,” el a bisa Hesus: “Lo mi duna bo outoridat riba tur e reinonan akí i nan gloria, pasobra esei a keda entregá na mi, i mi ta dun’é na ken ku mi ke.” (Luk. 4:5, 6) Ta bèrdat ku, apesar di Satanas su influensia, hopi gobièrnu ta hasi bon kos pa nan pueblo, i tin gobernante ku tin bon intenshon. No opstante, niun gobièrnu humano ni niun gobernante no por trese e kambionan ku humanidat tin mas mester di dje.—Sal. 146:3, 4; Rev. 12:12.

7. Kon Satanas ta usa religion falsu i e sistema komersial pa gaña hende? (Wak e promé plachi.)

⁷ Fuera di e gobièrnunan, Satanas i su demoñonan ta usa religion falsu i e sistema komersial pa gaña “henter e tera habitá.” (Rev. 12:9) Satanas ta usa religion  falsu pa plama mentira tokante Yehova. I Diabel ta buska tur manera pa laga mas tantu hende posibel lubidá e nòmber di Dios. (Yer. 23:26, 27) Esei ta pone ku hopi hende di kurason sinsero ta adorá demoño sin ku nan sa, pensando ku ta Dios nan ta adorá. (1 Kor. 10:20; 2 Kor. 11:13-15) Satanas ta usa e sistema komersial tambe pa plama mentira. Por ehèmpel, e ta laga hende kere ku plaka i kos material ta hasi nan felis. (Pro. 18:11) Hende ku ta kere e mentira ei ta pasa henter nan bida ta sirbi “Rikesa” en bes di Dios. (Mat. 6:24) Ku tempu, nan amor pa kos material ta kaba ku nan amor pa Dios.—Mat. 13:22; 1 Huan 2:15, 16.

8, 9. (a) Ki dos lès nos ta siña for di e ehèmpel di Adam, di Eva i di e demoñonan? (b) Dikon ta importante pa nos sa ku ta Satanas ta goberná e mundu akí?

⁸ Nos ta siña dos lès importante for di e ehèmpel di Adam, di Eva i di e demoñonan. Di promé, ta dos opshon so hende tin. Sea nos ta skohe pa ta leal na Yehova òf nos ta skohe e banda di Satanas. (Mat. 7:13) Di dos, e personanan ku skohe e banda di Satanas no ta haña masha benefisio. Adam ku Eva por a determiná pa nan mes loke ta bon i loke ta malu. I e demoñonan a haña un grado di poder pa influensiá e gobièrnunan. (Gén. 3:22) Pero e supuesto benefisionan ku Satanas ta primintí ta kosta nos karu.—Yòb 21:7-17; Gal. 6:7, 8.

⁹ Awor, dikon ta importante pa nos sa ku ta Satanas ta goberná e mundu akí? Esei ta yuda nos tin un punto di bista balansá di gobièrnu humano i ta motivá nos pa prediká e bon notisia. Nos sa ku Yehova ke pa nos respetá tur gobièrnu. (1 Ped. 2:17) Yehova ke pa nos obedesé e leinan ku e gobièrnunan ta pone basta e leinan akí no ta bai kontra su normanan. (Rom. 13:1-4) Di otro banda, nos sa tambe ku nos mester keda neutral i ku nos no mester apoyá ningun partido òf lider polítiko. (Huan 17:15, 16; 18:36) Nos sa ku Satanas ta purba di pone hende lubidá e nòmber di Dios i ta purba di daña Yehova su reputashon. Esei ta duna nos mas motibu ainda pa siña otro hende e bèrdat tokante nos Dios. Nos ta orguyoso di por karga e nòmber di Dios i di por usa su nòmber. Amor pa Yehova ta muchu mas presioso ku plaka òf kos material.—Isa. 43:10; 1 Tim. 6:6-10.

10-12. (a) Kiko Satanas a usa pa pone algun angel kai den tentashon? (b) Kiko nos por siña for di loke a pasa ku e angelnan ei?

¹⁰ Satanas ta usa diferente método pa influensiá hende pa nan hasi su boluntat.  I su métodonan ta funshoná. Tin biaha, e ta usa trampa pa pone hende kai den tentashon. I tin biaha, su atakenan ta direkto.

¹¹ Promé, laga nos wak kon Satanas a pone un kantidat konsiderabel di angel kai den trampa. Probablemente, el a opservá e angelnan pa basta tempu pa el a haña sa kon lo e por a gana nan na su banda. Algun angel a kai den su trampa i a tene relashon seksual ku hende muhé. E angelnan ei a engendrá yu gigante. Nan yunan tabata kruel i violento i tabata dominá hende. (Gén. 6:1-4) Podisé Satanas a logra gana e angelnan ei na su banda hinkando nan den tentashon pa tene relashon seksual ku hende i primintiendo nan poder pa dominá hende. Podisé Satanas tabata ke stroba yegada di e ‘simia di e muhé.’ (Gén. 3:15) Sea kual sea e kaso, Yehova a trese e Diluvio i a frustra e plannan di Satanas i di e demoñonan.

¹² Kiko nos por siña for di e insidente akí? Na promé lugá, nos no mester minimisá e peliger di inmoralidat seksual i di egoismo. E angelnan ku a djòin Satanas a sirbi Yehova míles di miónes di aña den shelu. Apesar ku nan tabata biba den un ambiente saludabel, nan a laga mal deseo kria rais den nan kurason i poderá di nan. Kisas, nos tambe tin dékada ta sirbi Yehova fielmente. Nos tambe por laga mal deseo kria rais den nos kurason maske nos ta den un ambiente spiritualmente limpi. (1 Kor. 10:12) Ta p’esei ta masha importante pa nos analisá nos mes i evitá tur pensamentu inmoral i eliminá tur rastro di orguyo for di nos kurason.—Gal. 5:26; lesa Kolosensenan 3:5.

13. (a) Ki otro trampa Satanas ta usa? (b) Kon nos por evitá di kai den e trampa ei?

¹³ Un otro trampa ku Satanas tin éksito kuné ta kuriosidat pa kos okulto. Satanas ta usa religion falsu i e industria di entretenimentu pa lanta interes di hende den demonismo. Pelíkula, wega elektróniko òf otro tipo di entretenimentu ta presentá spiritismo komo algu fasinante. Kon nos por evitá di kai den e trampa akí? Nos no por spera ku e organisashon di Yehova ta publiká un lista di entretenimentu aseptabel i inaseptabel. Kada un di nos mester entrená nos konsenshi na armonia ku e normanan di Dios pa nos por tuma bon desishon. (Heb. 5:14) Si nos amor pa Dios “ta sin hipokresia,” manera apòstel Pablo a konsehá nos, nos lo tuma bon desishon. (Rom. 12:9) P’esei, ora di skohe entretenimentu nos mester puntra nos mes: ‘Loke mi ta skohe ta hasi mi un hipókrita? Kiko mi studiantenan di Beibel òf mi rebishitanan lo  pensa di mi si nan mira e tipo di entretenimentu ku mi ta skohe?’ Ora nos ta kumpli ku loke nos ta siña otro hende, nos lo tin ménos chèns di kai den trampa di Satanas.—1 Huan 3:18.

14. (a) Den ki manera Satanas ta ataká nos direktamente? (b) Kon nos por para firme kontra e atakenan ei di Satanas?

¹⁴ Laga nos wak awor algun di e atakenan direkto ku Satanas sa lansa kontra nos pa pone nos bira desleal na Yehova. Por ehèmpel, e por influensiá e gobièrnunan pa nan prohibí nos trabou di prediká. E por influensiá nos koleganan di trabou òf nos kompañeronan di skol pa nan hasi bofon di nos debí ku nos ta biba segun e normanan moral di Beibel. (1 Ped. 4:4) E por influensiá nos famianan, kendenan tin bon intenshon, pa desanimá nos di asistí na nos reunionnan. (Mat. 10:36) Kiko nos por hasi pa para firme kontra e atakenan akí? Promé, nos mester ta prepará pa spera kualke atake direkto di Satanas pasobra Satanas tin un guera kontra nos. (Rev. 2:10; 12:17) Di dos, nos mester tene e berdadero kuestion na mente: Satanas a insinuá ku nos ta sirbi Yehova solamente ora kos ta bai bon ku nos i ku nos lo stòp di sirbi Yehova ora nos ta bou di preshon. (Yòb 1:9-11; 2:4, 5) Por último, nos mester pidi Yehova duna nos forsa pa para firme. Kòrda ku Yehova lo no bandoná nos nunka.—Heb. 13:5.

15. Satanas por fòrsa nos hasi algu kontra nos boluntat? Splika.

¹⁵ Satanas no por fòrsa nos hasi nada kontra nos boluntat. (Sant. 1:14) Hopi hende ta hasi boluntat di Satanas sin ku nan sa. Pero ora un hende haña e bèrdat, e mester skohe na ken su banda e ke ta. (Echo. 3:17; 17:30) Si nos ta determiná pa hasi Dios su boluntat, Satanas no por pone nos kibra nos lealtat na Dios.—Yòb 2:3; 27:5.

16, 17. (a) Menshoná algun kos mas ku Satanas i su demoñonan no por hasi. (b) Dikon nos no mester tin miedu di hasi orashon na bos haltu na Yehova?

¹⁶ Tin mas kos ku Satanas i su demoñonan no por hasi. Por ehèmpel, niun kaminda Beibel no ta bisa ku nan por lesa nos mente òf kurason. Ta Yehova i Hesus so tin e kapasidat ei. (1 Sam. 16:7; Mar. 2:8) Kiko si nos ta hasi orashon na bos haltu? Nos mester tin miedu ku Satanas òf su demoñonan ta skucha nos orashon i usa loke nos ta bisa kontra nos? Nò. Dikon nò? Nos ta laga e echo ku Satanas ta mira nos pone nos haña miedu di sirbi Yehova? Nò. Di igual manera, nos no mester tin miedu di hasi orashon na bos haltu djis pasobra Satanas por skucha nos. De echo, Beibel ta papia di hopi sirbidó di Dios ku tabata hasi orashon na bos haltu, i no tin ningun indikashon ku nan tabatin miedu ku Diabel por a skucha nan. (1 Rei. 8:22, 23; Huan 11:41, 42; Echo. 4:23, 24) Si nos ta hasi tur nos esfuerso pa nos echonan i nos palabranan ta na armonia ku Dios su boluntat, nos por tin sigur ku Yehova lo no permití Diabel hasi nos daño permanente.—Lesa Salmo 34:7.

¹⁷ Pues, ta importante pa nos konosé nos enemigu. Pero nos no mester tin demasiado miedu di dje. Aunke nos ta imperfekto, nos por vense Satanas ku yudansa di Yehova. (1 Huan 2:14) Si nos oponé Satanas, lo e hui for di nos. (Sant. 4:7; 1 Ped. 5:9) Ta parse ku Satanas ta gusta oponé e hóbennan. Kiko nan por hasi pa por para firme kontra Diabel? E siguiente artíkulo lo kontestá e pregunta ei.