1. Menshoná algu ku ta hasi hende diferente for di bestia.

YEHOVA a duna hende algu ku ta hasi nos diferente for di bestia: nos konsenshi. Kon nos por sa ku Adam ku Eva tabatin un konsenshi? Despues ku nan a peka, nan a bai skonde. Esei a indiká ku nan konsenshi tabata molestiá nan.

2. Den ki sentido nos konsenshi por ta manera un kompas? (Wak e promé plachi.)

² Nos konsenshi ta un sentido interno di loke ta bon i malu ku por guia nos. Nos por kompará konsenshi ku un kompas. Un hende ku su konsenshi no ta bon entrená ta manera un barku ku ta nabegá ku un kompas dañá. Ta masha fásil pa bientu i koriente di laman kita e barku ei for di su rumbo. Di otro banda, un kompas ku ta funshoná bon por yuda e kapitan tene e barku riba su ruta. Di mes manera, si nos konsenshi ta bon entrená, e ta un bon guia pa nos.

3. Kiko por sosodé si nos konsenshi no ta bon entrená?

³ Si nos konsenshi no ta bon entrená, lo e no spièrta nos ku algu ta malu. (1 Tim. 4:1, 2) Un konsenshi asina por asta konvensé  nos ku loke ta malu ta bon. (Isa. 5:20) Hesus a bisa su siguidónan: “Lo yega e ora ku esnan ku mata boso lo kere ku di e forma ei nan ta rindi un sirbishi sagrado na Dios.” (Huan 16:2) Esei tabata loke e hendenan ku a mata disipel Esteban tabata pensa. (Echo. 6:8, 12; 7:54-60) Atraves di historia, e fanátikonan religioso ku ta kometé krímennan horibel asina ta pretendé di sirbi Dios. Pero en realidat, nan ta kibra e leinan di Dios. (Éks. 20:13) Ta bisto ku nan konsenshi no ta un bon guia.

4. Kon nos por hasi sigur ku nos konsenshi ta un bon guia?

⁴ Awor, kon nos por hasi sigur ku nos konsenshi ta un bon guia? E leinan i prinsipionan ku tin den e Palabra di Dios ta “probechoso pa siña hende, pa reprendé, pa korigí [i] pa disipliná den hustisia.” (2 Tim. 3:16) P’esei, pa nos por entrená nos konsenshi pa e ta na armonia ku Dios su manera di pensa i un bon guia pa nos, nos mester studia Beibel diligentemente, meditá riba loke e ta bisa i apliká su konseho den nos bida. Laga nos wak kon e leinan i prinsipionan di Yehova por yuda nos entrená nos konsenshi.

5, 6. Ki benefisio nos ta haña ora nos obedesé e leinan di Dios?

⁵ Pa nos por benefisiá di e leinan di Dios, nos mester hasi mas ku djis lesa nan òf sa nan. Nos mester siña stima nan i respetá nan. Beibel ta bisa ku nos mester odia loke ta malu i stima loke ta bon. (Ámos 5:15) Kon nos por hasi esei? Nos mester mira kosnan manera Yehova ta mira nan. Pa ilustrá esaki, imaginá ku bo tin problema pa drumi. Bo dòkter ta rekomendá bo pa kome mas salú, hasi mas ehersisio i kambia algun kustumber. Bo ta sigui su konseho i bo ta haña bon resultado! Probablemente, lo bo keda masha kontentu ku bo dòkter a yuda bo mehorá bo kalidat di bida.

⁶ Den un manera similar, nos Kreador a duna nos lei ku ta protehá nos for di e konsekuensianan di piká, i yuda nos mehorá nos kalidat di bida. Por ehèmpel, pensa kuantu benefisio nos ta haña ora nos ta obedesé e leinan ku Beibel ta duna tokante mentira, engaño, hòrtamentu, inmoralidat seksual, violensia i spiritismo. (Lesa Proverbionan 6:16-19; Rev. 21:8) Segun ku nos ta mira e benefisionan di obedesé Yehova, nos ta haña mas amor i apresio pa Yehova i su leinan.

7. Kon e relatonan di Beibel por yuda nos?

⁷ Nos no tin nodi di pasa den doló pa nos siña ku desobedensia na Dios ta malu. Den Beibel, nos por siña di fayonan ku otro hende a kometé. Proverbionan 9:9 ta bisa: “Duna instrukshon na un hende sabí, i e lo bira mas sabí ainda.” Sin duda, nos ta haña e mihó instrukshon for di Yehova ora nos ta lesa relatonan di Beibel i ta meditá riba nan. Por ehèmpel, pensa riba e doló ku Rei David a sinti despues ku el a desobedesé Yehova i a kometé adulterio ku Bètsabé. (2 Sam. 12:7-14) Segun ku nos ta lesa e relato akí i meditá riba dje, nos por puntra nos mes: ‘Kon Rei David por a evitá tur e doló di kabes ku el a hañ’é kuné debí ku el a kometé adulterio ku Bètsabé? Si mi haña mi ku un tentashon similar, lo mi tin e forsa pa resistié? Lo mi hui manera Yosef òf lo mi entregá manera David?’ (Gén. 39:11-15) Ora nos ta meditá riba e mal konsekuensianan di  piká, nos por fortalesé nos determinashon pa odia loke ta malu.

8, 9. (a) Ku kiko nos konsenshi ta yuda nos? (b) Ki efekto e prinsipionan di Yehova tin riba nos konsenshi?

⁸ Ta fásil pa nos keda leu for di práktikanan ku Dios ta odia. Sinembargo, Beibel no ta duna un lei spesífiko pa tur situashon. Den situashonnan asina, kon nos por sa kiko ta agradá Dios? Nos tin ku usa nos konsenshi bíblikamente entrená.

⁹ Debí na Yehova su amor pa nos, el a duna nos prinsipionan ku por guia nos konsenshi. El a bisa: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana.” (Isa. 48:17, 18) Ora nos ta rasoná riba e prinsipionan di Beibel i ta permití nan influensiá nos kurason, nos ta korigí, guia i moldia nos konsenshi. Esei na su turno ta yuda nos tuma desishon sabí.

10. Kiko ta un prinsipio, i kon Hesus a usa prinsipio pa siña hende?

¹⁰ Un prinsipio ta un bèrdat fundamental òf un doktrina ku ta guia nos manera di pensa òf nos kondukta. Pa nos komprondé un prinsipio, nos tin ku komprondé e manera di pensa di e Dunador di lei i e motibu pakiko el a duna nos sierto leinan. Durante Hesus su sirbishi riba tera, el a siña su disipelnan algun bèrdat básiko pa yuda nan mira kiko ta e konsekuensianan di sierto aktitut i akshon. Por ehèmpel, el a siña nan ku renkor por hiba na violensia i ku pashon no kontrolá por hiba na adulterio. (Mat. 5:21, 22, 27, 28) Pa nos konsenshi ta bon entrená, nos mester usa e prinsipionan di Dios komo guia. Di e manera ei, nos lo tuma desishon ku ta duna gloria na Dios.—1 Kor. 10:31.

11. Kon konsenshi di rumannan por diferensiá for di otro?

¹¹ Dos kristian ku tin konsenshi bíblikamente entrená por yega na konklushon diferente tokante mesun asuntu. Laga nos tuma komo ehèmpel e uso di alkohòl. Beibel no ta kondená uso moderá di alkohòl. Pero sí e ta spièrta nos kontra bebementu di mas i buracheria. (Pro. 20:1; 1 Tim. 3:8) Esei ta nifiká ku un ruman ku ta bebe alkohòl na un manera moderá no mester tene kuenta ku nada otro? Nò! Maske ku su konsenshi ta permitié bebe, e mester tene kuenta ku otro hende su konsenshi.

12. Kon e palabranan na Romanonan 14:21 por yuda nos tene kuenta ku konsenshi di otro ruman?

¹² Pablo a mustra ku kristiannan mester tene kuenta ku konsenshi di otro hende. El a bisa: “Ta mihó pa no kome karni ni bebe biña ni hasi nada ku ta pone bo ruman trompeká.” (Rom. 14:21) Lo bo ta dispuesto pa keda sin hasi algu ku bo tin derecho di hasi pa bo no trompeká un ruman ku su konsenshi ta diferente for di esun di bo? Sin duda! Tuma por ehèmpel un ruman hòmber ku ántes tabata bebe di mas. Despues ku el a haña e bèrdat, el a disidí ku e no ta bebe alkohòl mas. Abo lo no ke hasi nada pa pone e ruman ei bolbe na su kustumber di ántes, no ta bèrdat? (1 Kor. 6:9, 10) P’esei, si un ruman no ke bebe alkohòl, nos no mester fòrs’é, pasobra esei no ta amoroso!

13. Kiko Timoteo a hasi pa yuda otro hende aseptá e bon notisia?

¹³ Tempu ku e hóben Timoteo tabatin  mas o ménos 20 aña, el a laga nan sirkunsid’é, aunke esaki lo a hasi hopi doló. E tabata sa ku sirkunsishon tabata importante pa e hudiunan ku e tabata bai prediká na dje. Meskos ku Pablo, e no tabata ke pone ningun hende trompeká. (Echo. 16:3; 1 Kor. 9:19-23) Abo ta manera Timoteo? Bo ta dispuesto pa hasi sakrifisio pa bienestar di otro hende?

14, 15. (a) Kiko nos tin ku hasi pa alkansá madures kristian? (b) Ki relashon tin entre amor i madures?

¹⁴ Tur kristian mester hasi nan bèst pa no keda pegá na “e kosnan fundamental tokante Kristu.” Mas bien, nos tin ku “hasi esfuerso pa alkansá madures.” (Heb. 6:1) Pero, esei no ta sosodé di su mes, nos tin ku “hasi esfuerso” kontinuo. Sí, pa alkansá madures, nos tin ku sigui oumentá nos konosementu i komprondementu di Beibel. P’esei, bes tras bes nos ta ser animá pa lesa Beibel tur dia. (Sal. 1:1-3) Esei ta bo meta? Ora bo ta lesa Beibel tur dia, lo bo komprondé e leinan i prinsipionan di Yehova mihó.

¹⁵ E lei di mas importante pa kristiannan ta e lei di amor. Hesus a bisa su disipelnan: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:35) Santiago, Hesus su ruman hòmber parti di mama, a yama amor “e lei noble.” (Sant. 2:8) Pablo a bisa: “Amor ta kumplimentu di lei.” (Rom. 13:10) E echo ku Beibel ta pone énfasis riba amor no ta straño, pasobra “Dios ta amor.” (1 Huan 4:8) Pa Dios, amor ta mas ku un sintimentu. E ta demostrá su amor ku echo. Huan a skirbi: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje.” (1 Huan 4:9) Pues, ora nos ta demostrá ku nos ta stima Yehova i su Yu, nos rumannan i otro hende, nos ta demostrá ku nos ta kristiannan maduro.—Mat. 22:37-39.

16. Dikon prinsipio lo bira mas importante pa bo segun ku bo ta progresá pa alkansá madures?

 ¹⁶ Segun ku bo ta progresá pa alkansá madures kristian, prinsipio lo bira mas importante pa bo. Dikon? Pasobra, un lei ta aplikabel den un situashon spesífiko miéntras ku bo por usa un prinsipio den vários situashon. Por ehèmpel, un mucha chikitu no ta komprondé e peliger di mal kompania. P’esei, un mayor ku disernimentu ta pone regla pa protehá su yu. (1 Kor. 15:33) Pero segun ku e mucha ta madurá i su kapasidat di pensa ta desaroyá, e ta siña rasoná a base di e prinsipionan di Beibel. I esei lo yud’é tuma bon desishon ora di skohe amigu. (Lesa 1 Korintionan 13:11; 14:20.) Mas nos rasoná a base di e prinsipionan di Beibel, mas konfiabel nos konsenshi ta bira ya ku lo e ta na armonia ku e pensamentunan di Dios.

17. Dikon nos por bisa ku nos tin loke nos mester pa tuma desishon sabí?

¹⁷ Nos tin tur loke nos mester pa tuma desishon ku ta agradá Yehova. Si nos ta hasi bon uso di e leinan i prinsipionan ku nos ta haña den Beibel, nos lo ta “plenamente kompetente, kompletamente prepará pa tur bon obra.” (2 Tim. 3:16, 17) P’esei, buska prinsipio di Beibel pa bo por “komprondé kiko ta e boluntat di Yehova.” (Efe. 5:17) Hasi bon uso di e publikashonnan basá riba Beibel ku nos organisashon ta perkurá, manera Guia pa Buska Informashon den Publikashonnan di Testigunan di Yehova, Watchtower Library, BIBLIOTEKA ONLINE Watchtower i JW Library app. E publikashonnan akí ta prepará pa yuda nos saka lo mihó for di nos estudio personal i nos Adorashon Komo Famia.

18. Ki bendishon nos ta haña ora nos ta kumpli ku Dios su leinan i prinsipionan?

¹⁸ Ora nos ta kumpli ku Yehova su leinan i prinsipionan, e ta bendishoná nos manera Salmo 119:97-100 ta bisa. Einan Beibel ta bisa: “O kuantu mi ta stima bo lei! E ta mi meditashon henter dia. Bo mandamentunan ta hasi mi bira mas sabí ku mi enemigunan, pasobra semper nan ta ku mi. Mi tin mas komprondementu ku tur mi siñadónan, pasobra bo testimonionan ta mi meditashon. Mi ta komprondé mas ku e bieunan, pasobra mi a warda bo preseptonan.” Sí, ora nos ta tuma tempu pa ‘meditá’ riba e leinan i prinsipionan di Dios, nos lo haña mas sabiduria i komprondementu. I ku esfuerso diligente nos por logra “e pleno estatura di Kristu” segun ku nos ta usa Dios su leinan i prinsipionan pa entrená nos konsenshi.—Efe. 4:13.