Bo a tuma tempu pa lesa e edishonnan di e aña akí di E Toren di Vigilansia? Wèl, wak si bo por kontestá e siguiente preguntanan:

Kon nos mester trata e kristiannan ungí?

Nos ta balorá nan fe; pero nos no ta duna nan demasiado atenshon. Nos ta evitá di halsa nan. (Hudas 16) Nos no ta puntra nan tokante nan speransa.—w20.01, pág. 29.

Kiko mester konvensé bo ku Yehova sa ku bo ta eksistí?

Beibel ta bisa ku Yehova sa di bo promé ku bo a nase. I e ta skucha bo orashonnan. E sa kiko bo ta pensa i sinti. Loke bo ta hasi por lag’é sintié kontentu òf tristu. (1 Kró. 28:9; Pro. 27:11) El a hala bo serka dje.—w20.02, pág. 12.

Ki ora nos mester papia i ki ora nos mester keda ketu?

Nos ta kontentu pa papia tokante Yehova. Nos ta bisa algu ora nos mira un ruman ta bai kometé un eror grave. Ora un ruman mester di konseho, ansiano ta dun’é esei. Pero, nos no ta papia tokante detaye di nos trabou di prediká na un pais unda nos obra ta prohibí. Ni nos no ta revelá asuntu konfidensial.—w20.03, pág. 20-21.

Ki diferensia tin entre e dalakochinan na Yoël kapítulo 2 i esnan na Revelashon kapítulo 9?

Yoël 2:20-29 ta bisa ku Dios lo hala e dalakochinan leu i lo hasi restitushon pa nan daño. Despues di esei, Dios lo basha su spiritu. Esei a kumpli ora Babilonia a invadí Herúsalèm i a kumpli tambe mas despues. Revelashon 9:1-11 ta deskribí e ungínan ku ta manera dalakochi den nos tempu segun ku nan ta proklamá Dios su huisio kontra e mundu malbado. I e hendenan ku ta apoyá e mundu ei ta sinti nan masha inkómodo.—w20.04, pág. 3-6.

Ken ta e rei di nort aworakí?

Rusia i su aliadonan. Nan a ataká e pueblo di Dios ora nan a prohibí e trabou di prediká i a demostrá ku nan ta odia e Testigunan. E rei di nort a bin ta bringa kontra e rei di zùit.—w20.05, pág. 13.

Akaso e nuebe kualidatnan menshoná na Galationan 5:22 i 23 ta e lista kompleto di e aspektonan di “fruta di spiritu”?

Nò. Spiritu santu ta yuda nos produsí otro bon kualidatnan, manera hustisia. (Efe. 5:8, 9)—w20.06, pág. 17.

Ki peliger tin den pone kos tokante bo mes riba ret sosial?

Loke bo ta pone por duna e impreshon ku bo no ta humilde, ma ku bo ta broma tokante bo mes.—w20.07, pág. 6-7.

Kiko nos por siña for di piskadó ábil?

Nan ta piska na e lugá i ora ku nan tin mas chèns di haña piská. Nan sa kon pa usa nan kosnan di piska korektamente. I nan tin kurashi pa traha bou di kondishon ku ta kambia diripiente. Nos por hasi meskos den nos sirbishi.—w20.09, pág. 5.

Den ki manera nos por yuda nos studiantenan di Beibel stima Dios mas ainda?

Nos por animá nan pa lesa Beibel tur dia i meditá riba loke nan ta lesa. I nos por siña nan hasi orashon.—w20.11, pág. 4.

Na ken Pablo a referí ora el a bisa ku “den Kristu tur lo haña bida”?—1 Kor. 15:22.

Akinan, Apòstel Pablo tabata referí tambe na e kristiannan ungi, ku “a ser santifiká den union ku Kristu Hesus.” E no tabata ke men ku tur hende lo ser resusitá. (1 Kor. 1:2; 15:18)—w20.12, pág. 5-6.

Ki trabou e kristiannan ungínan resusitá lo hasi “durante e último tròmpèt”? —1 Kor. 15:51-53.

Nan lo yuda Kristu goberná e pueblo ku un bara di heru. (Rev. 2:26, 27)—w20.12, pág. 12-13.