1. Kon desanimashon por afektá nos?

NOS tur tin problema i tur dia nos ta hasi nos bèst pa trata ku nan lo mihó ku nos por. Pero si riba dje nos ta sinti nos desanimá, e situashon ta bira mas difísil. Desanimashon ta manera un ladron ku ta hòrta nos konfiansa, e kurashi i e goso. Proverbionan 24:10 (NW) ta bisa: “Si bo ta laga situashon difísil desanimá bo, lo bo no tin forsa pa soportá nada.” Sí, desanimashon por ranka tur e energia ku nos mester pa trata ku problema di bida ku éksito.

2. Kiko por desanimá nos, i kiko nos lo papia tokante dje den e artíkulo akí?

² Tin hopi kos ku por desanimá nos. Algun di nan ta interno, manera fayo ku nos a kometé, debilidat òf problema ku salú. Otronan ta eksterno, por ehèmpel, ora nos no a haña un asignashon ku nos tabata ke den Yehova su sirbishi òf nos ta prediká den un teritorio ku no ta parse di ta produktivo. Den e artíkulo akí, nos lo papia tokante kiko nos por hasi pa lucha kontra desanimashon.

3. Kiko por yuda nos pa no opseshoná ku nos fayonan?

³ Si nos ta opseshoná ku nos fayo- i debilidatnan, nos por sinti nos asina malu ku nos lo pensa ku Yehova nunka lo permití nos drenta Paradeis. E manera di pensa ei ta masha peligroso. Kiko por yuda nos tin un punto di bista mas balansá? Ta bèrdat ku nos tur ta pekadó. (Rom.  3:23) Pero, Yehova no ta enfoká riba nos fayonan ni ta ferwagt pa nos ta perfekto. Komo nos Tata, e ta stima nos i tin pasenshi ku nos. E ta mira kuantu nos ta lucha pa hasi loke ta korekto i pa no sinti nos malu di nos mes, i e t’ei kla pa yuda nos.—Rom. 7:18, 19.

4-5. Di akuerdo ku 1 Huan 3:19 i 20, kiko a yuda dos ruman lucha kontra desanimashon?

⁴ Laga nos wak e ehèmpel di Deborah i Maria. * Na mucha, Deborah su famia a humi’é hopi i esei a lag’é sintié malu di su mes. Nan a trat’é ku masha poko amor i kasi nunka nan tabata elogi’é. P’esei komo adulto, e tabata pensa masha negativo di su mes. Ora e kometé un fayo chikitu, e tabata sintié masha malu mes. Maria tabatin mesun problema. Su famia tambe tabata humi’é. Esei a pone ku e tabata sinti ku e no ta sirbi pa nada. Asta despues di su boutismo, e tabata pensa ku e no ta bon sufisiente pa ta un Testigu di Yehova.

⁵ Kiko a yuda e dos rumannan ei sigui sirbi Yehova fielmente? Nan a hasi orashon ferviente na Yehova i a tira nan karga riba dje. (Sal. 55:22) Nan a komprondé ku nos Tata amoroso ku ta den shelu sa ku kosnan ku nos a pasa aden por laga nos pensa negativo di nos mes. Pero, e ta mira tambe e bon kualidatnan ku nos tin, aunke no ta tur biaha nos ta mira e kualidatnan ei den nos mes.—Lesa 1 Huan 3:19, 20.

6. Kon un hende ku haña un rekaida por sintié?

⁶ Un hende kisas ta lucha pa vense un mal hábito. Pero, si e haña un rekaida, e por sintié desanimá. Ta normal pa nos sinti nos mes malu ora nos peka. (2 Kor. 7:10) Pero, nos no mester bai te na e ekstremo di kondená nos mes, pensando: ‘Mi no ta sirbi pa nada. Yehova nunka lo por pordoná mi.’ E sorto di pensamentu negativo ei no ta basá riba bèrdat i por pone nos stòp di sirbi Yehova. Kòrda ku Proverbionan 24:10 ta bisa ku ora nos ta desanimá, nos no tin forsa pa soportá nada. En bes di esei, nos mester hasi orashon na Yehova i pidié pordoná nos. (Isa. 1:18) Yehova lo mira ku di bèrdat bo tin duele di loke a pasa i lo e pordoná bo. Ademas, papia ku e ansianonan. Ku pasenshi nan lo yuda bo haña bo salú spiritual bèk.—Sant. 5:14, 15.

7. Dikon nos no mester desanimá si nos ta lucha ku un debilidat?

⁷ Jean-Luc, un ansiano na Fransia, ta  bisa esnan ku ta lucha ku un debilidat: “Pa Yehova, un hende hustu no ta esun ku nunka ta faya, sino esun ku tin duele di su fayonan i ta hasi su bèst pa kambia.” (Rom. 7:21-25) Pues si bo ta lucha ku un debilidat, no pensa ku bo ta un kaso pèrdí. Aunke nos tur ta faya, kòrda ku Yehova ta duna nos su aprobashon danki na su bondat inmeresí i pa medio di e reskate.—Efe. 1:7; 1 Huan 4:10.

8. Ken por animá nos ora nos ta desanimá?

⁸ Nos rumannan den kongregashon por animá nos! Nan t’ei pa konsolá nos i skucha nos ora nos tin mester di papia. (Pro. 12:25; 1 Tes. 5:14) Joy, un ruman muhé na Nigeria ku a lucha ku desanimashon, a bisa: “Kiko lo mi a hasi sin mi rumannan? Nan ta prueba ku Yehova ta skucha mi orashonnan. Mi a asta siña for di nan kon pa animá otro hende ku ta desanimá.” Pero, nos mester kòrda sí ku nos rumannan no semper sa ki ora nos mester di animashon. Pues, kisas nos mester tuma inisiativa pa aserká un ruman ku ta spiritualmente maduro i pidié yudansa.

9. Kon Salmo 41:3 i 94:19 ta animá nos?

⁹ Buska yudansa di Yehova. Kisas ta difísil pa nos pensa positivo ora nos ta malu, spesialmente si nos tin un malesa króniko. Ta bèrdat ku awe Yehova no ta hasi milager i kura nos, pero e ta konsolá nos i ta duna nos e forsa ku nos mester pa perseverá. (Lesa Salmo 41:3; 94:19.) Por ehèmpel, e por motivá e rumannan pa yuda nos ku algun kos na kas òf hasi kompra. E por motivá nan tambe pa hasi orashon ku nos. Òf, e por yuda nos kòrda tekstonan di konsuelo ku tin den Beibel, manera e speransa maravioso di un bida perfekto sin malesa i doló den e binidero mundu nobo.—Rom. 15:4.

10. Kiko a yuda Isang sigui padilanti despues di su aksidente?

¹⁰ Isang, un ruman hòmber na Nigeria, a keda paralisá despues di un aksidente. Su dòkter a bis’é ku e no por kana nunka mas. Isang a bisa: “Mi kurason tabata kibrá, i mi tabata masha desanimá.” Kiko a yud’é pa e no sigui sintié asina? El a bisa: “Ami ku mi esposa nunka a stòp di hasi orashon na Yehova i studia su Palabra. Ademas, nos tabata determiná pa konsentrá riba nos bendishonnan, inkluso nos speransa di biba den Dios su mundu nobo.”

11. Kiko a yuda Cindy keda ku goso apesar ku e tabata malu?

¹¹ Cindy, ku ta na México, a ser diagnostiká ku un malesa grave. Kon el a trata ku e situashon? Miéntras e tabata haña tratamentu, el a pone komo meta pa prediká tur dia. El a skirbi: “Esei a permití mi enfoká riba otro hende en bes di riba e operashon, e doló òf kon malu mi tabata sinti mi. Asin’akí mi tabata hasi: Miéntras mi tabata kòmbersá ku dòkter òf zùster, mi tabata puntra nan kon ta bai ku nan famia. Despues, mi tabata puntra nan dikon nan a skohe un trabou asina difísil. Djei, tabata mas fásil pa mi haña sa ki tópiko tabata interesá nan. Vários di nan a bisa mi ku normalmente pashènt no sa puntra nan ‘Kon ta bai ku bo?’ Anto hopi di nan a yama mi danki pa mustra interes den nan. Algun asta a duna mi nan adrès òf  number di telefòn. Durante e periodo difísil ei di mi bida, Yehova a duna mi asina tantu goso ku mi mes a keda sorprendí!”—Pro. 15:15

12-13. Kon algun ruman ku ta malu a logra prediká na otro hende, i ku ki resultado?

¹² Tin ruman ku, debí ku nan ta malu òf di edat avansá, no por hasi mesun tantu manera nan ke den sirbishi, i esei por desanimá nan. Pero tòg, hopi di nan ta buska manera pa prediká. Na Merka, un ruman ku yama Laurel a biba pa 37 aña den un mashin pa hala rosea! E mester a hasi diferente operashon, el a haña kanser i malesa di kueru. Pero, tur e problemanan ei no a stòp e di prediká. E tabata prediká na zùster i otro hende ku a bin kuid’é na su kas. El a yuda por lo ménos 17 hende konosé Yehova! *

¹³ Richard, un ansiano na Fransia, tin un tep pa e rumannan ku no por sali for di nan kas òf ku ta den kas di kuido: “Mi ta sugerí nan pa pone algun di nos publikashonnan un kaminda ku otro hende por mira nan. Ora hende pasa, nan por mira nan i esei por hiba na un kòmbersashon. E kòmbersashonnan ei por animá nos rumannan stimá ku no por prediká di kas pa kas mas.” E rumannan ku no por sali for di nan kas por prediká via di karta òf telefòn tambe.

14. Ki ehèmpel ekselente Rei David a pone pa nos?

¹⁴ Kisas debí na edat avansá, problema ku salú òf otro faktor nos no por haña un asignashon ku nos ke den Yehova su sirbishi. Si esei ta nos kaso, nos por siña hopi for di Rei David. E tabatin masha gana di traha un tèmpel pa Yehova, pero Yehova a skohe un otro hende pa hasi esei. David a duna tur su apoyo na esun ku a haña e asignashon ei i asta a kontribuí ku un kantidat grandi di oro i plata. Ki un ehèmpel ekselente!—2 Sam. 7:12, 13; 1 Kró. 29:1, 3-5.

15. Kon Hugues a lucha kontra desanimashon?

¹⁵ Hugues, un ruman na Fransia, mester a stòp di sirbi komo ansiano debí na problema ku salú. E no por a hasi ni sikiera trabou simpel na kas. El a skirbi: “Na promé instante, mi a sinti mi inútil i masha desanimá. Pero ku tempu, mi a mira e importansia di aseptá mi limitashonnan, i mi a haña goso den loke ainda mi por a hasi den Yehova su sirbishi. Mi ta determiná pa no entregá.  Meskos ku Gideon i su 300 hòmbernan ku tabata kansá, lo mi sigui lucha!”—Hues. 8:4.

16. Kiko nos ta siña di e angelnan?

¹⁶ E angelnan fiel tambe ta un bon ehèmpel. Durante Rei Akab su reinado, Yehova a pidi e angelnan pa duna sugerensia tokante kon pa engañá e rei malbado ei. Vários angel a duna sugerensia. Pero, Dios a skohe un di e angelnan i a bis’é ku su sugerensia lo tin éksito. (1 Rei. 22:19-22) Akaso e otro angelnan a desanimá i pensa: ‘Dikon m’a pèrdè mi tempu duna sugerensia?’ Di mes ku nò! E angelnan di bèrdat tabata humilde i tabata ke pa tur onor bai na Yehova.—Hues. 13:16-18; Rev. 19:10.

17. Kiko nos mester hasi si nos ta sinti nos desanimá debí ku nos no tin sierto asignashon?

¹⁷ Kòrda ku e onor di mas grandi ku nos por tin ta di karga e nòmber di Dios i prediká su Reino. Asignashon por bai i bini. Pero, no ta asignashon ta hasi nos realmente presioso pa Dios i pa nos rumannan, sino humildat. P’esei, roga Yehova p’e yuda nos keda humilde. Meditá riba tur e bon ehèmpelnan di humildat ku tin den Beibel. Sea dispuesto pa hasi tur loke bo por pa sirbi bo rumannan.—Sal. 138:6; 1 Ped. 5:5.

18-19. Kon bo por tin goso den un teritorio ku no ta parse di ta produktivo?

¹⁸ Bo a yega di sinti bo desanimá debí ku bo teritorio no ta parse di ta produktivo? Òf kisas debí ku bo no ta haña hopi hende na kas? Si esei ta e kaso, kiko bo por hasi pa mantené bo goso òf asta haña mas goso den sirbishi? E kuadro “Kon pa Bo Tin Mas Goso den Sirbishi” tin algun sugerensia útil. Ademas di esei, ta importante pa bo tin e punto di bista korekto di sirbishi. Kiko esei ke men?

¹⁹ Kòrda ku e kos di mas importante ta di laga hende konosé Dios su nòmber i siña nan tokante su Reino. Hesus a bisa bon kla ku poko hende lo ta riba e kaminda ku ta hiba na bida. (Mat. 7:13, 14) Ora nos ta den sirbishi, nos tin e onor di traha huntu ku Yehova, Hesus i e angelnan. (Mat. 28:19, 20; 1 Kor. 3:9; Rev. 14:6, 7) Yehova ta esun ku ta hala serka dje  esnan ku tin deseo di sirbié. (Huan 6:44) Pues, si e biaha akí un hende no ke skucha nos mensahe, kisas e siguiente biaha lo e skucha.

20. Di akuerdo ku Yeremías 20:8 i 9, kiko lo yuda nos lucha kontra desanimashon?

²⁰ Nos por siña hopi for di Profeta Yeremías. E mester a prediká den un teritorio masha difísil. E hendenan tabata insult’é i hasi bofon di dje “henter dia.” (Lesa Yeremías 20:8, 9.) Dado momento, el a desanimá asina tantu ku e kier a stòp di prediká. Pero, e no a hasi esei. Dikon nò? Pasobra e palabra di Yehova tabata manera un kandela den dje, i e no por a ten’é paden! Meskos ta konta pa nos ora nos yena nos mente i kurason ku e Palabra di Dios. Ta p’esei ta masha importante pa nos studia Beibel tur dia i meditá riba dje. Komo resultado, nos goso lo sigui oumentá i nos sirbishi lo bira mas produktivo.—Yer. 15:16.

21. Kon nos por gana e lucha kontra desanimashon?

²¹ Deborah, menshoná na paragraf 4, a bisa: “Desanimashon por ta un arma poderoso ku Satanas ta usa kontra nos.” Pero, Yehova Dios ta mas poderoso ku Satanas i tur su armanan. P’esei si algu ta desanimá bo, roga Yehova pa yudansa. Lo e yuda bo trata ku bo fayo- i debilidatnan. Lo e yuda bo ora bo ta malu. Lo e yuda bo tambe keda ku un punto di bista balansá di bo asignashon. I lo e yuda bo tin un punto di bista positivo di bo sirbishi. Ademas, hasi orashon na bo Tata amoroso i kont’é tur bo preokupashonnan. Ku su yudansa, bo por gana e lucha kontra desanimashon!