Mi a nase na e stat di Quebek, den e provinsia kanades di Quebek. Den e área ei, e idioma prinsipal ta franses. Mi mayornan, Louis ku Zélia a lanta mi ku hopi amor. Di naturalesa mi tata tabata tímido i tabata gusta lesa. Ami tabata gusta skirbi i mi tabatin e deseo di bira un periodista.

Tempu mi tabatin 12 aña, Rodolphe Soucy, kende tabata un kolega di mi tata, a bin bishitá nos huntu ku su amigu. Nan tabata Testigunan di Yehova. Mi no tabata sa masha tokante e Testigunan, i mi no tabatin masha interes den nan religion. Pero, mi a keda impreshoná di e manera amabel i lógiko ku nan a kontestá nos preguntanan usando Beibel. Mi mayornan tambe a keda impreshoná, pues nos a aseptá un estudio di Beibel.

E tempu ei, mi tabata bai skol katóliko. Ratu ratu mi tabata papia ku mi kompañeronan di klas tokante loke mi tabata siña for di mi estudio di Beibel. Te un dia, e menernan, ku tabata pastor, a haña sa di nos kòmbersashonnan. Un di nan, en bes di usa Beibel pa proba ku loke mi tabata bisa no ta bèrdat, a akusá mi dilanti henter e klas ku mi ta un revolushonario. Aunke e situashon tabata tenso, e diskushon ei a resultá den un bendishon pasobra el a yuda mi mira ku e siñansanan di e skol religioso ei no ta di akuerdo ku loke Beibel ta bisa. Mi a realisá ku mi no ta pertenesé einan. Ku pèrmit di mi mayornan, mi a kambia di skol.

Mi a sigui studia Beibel, pero mi no a hasi masha progreso pasobra mi tabatin miedu di bai di kas pa kas. Iglesia Katóliko tabatin  hopi influensia i tabata totalmente kontra nos trabou di prediká. Maurice Duplessis, promé minister di Quebek, tabata un fiel aliado di iglesia. Ku su apoyo, multitut di hende tabata intimidá i te asta ataká e Testigunan. Bo mester tabatin kurashi pa prediká e tempu ei.

Un ruman ku a yuda mi vense mi miedu tabata John Rae, kende a gradua for di e di nuebe klas di Galaad. John tabatin hopi eksperensia pero e tabata humilde, modesto i aserkabel. Masha poko biaha e tabata duna mi konseho direktamente, pero su bon ehèmpel tabata bisa mi tur kos. E no por a dominá franses bon, pues regularmente mi tabata sali kuné den sirbishi pa yud’é. Tur e tempu ku mi a pasa kuné a yuda mi pa por fin mi skohe pa e bèrdat. Mi a batisá 26 di mei 1951, dies aña despues di mi promé kòmbersashon ku e Testigunan.

Mayoria di nos rumannan den nos kongregashon chikitu na Quebek tabata pionero. Nan bon ehèmpel a motivá mi pa mi tambe bira pionero. E tempu ei, nos tabata usa Beibel so den e trabou di kas pa kas. Komo nos no tabata prediká ku publikashon, nos mester a usa Beibel na un manera efikas. P’esei, mi a hasi esfuerso pa siña e tekstonan di Beibel ku lo a yuda mi defendé e bèrdat. Sinembargo, hopi hende a nenga di lesa kualke Beibel ku no tabatin e imprimatur, esta, e aprobashon ofisial, di Iglesia Katóliko.

Na 1952, mi a kasa ku Simone Patry, un ruman fiel den mi kongregashon. Nos a muda pa Montreal, i denter di un aña di nos matrimonio, nos a ser bendishoná ku nos yu muhé, Lise. Aunke mi a stòp di traha pionero djis promé ku nos a kasa, ami ku Simone a sigui purba di biba simpel pa asina nos por partisipá mas den e aktividatnan di kongregashon komo famia.

Dies aña a pasa promé ku mi a pensa serio tokante pionero. Na 1962, mi a bai Skol di Ministerio di Reino pa ansiano. Nan a tene e skol ei na Bètel di Canada, i el a dura un luna. Mi mester a keda den kamber ku un ruman hòmber ku yama Camille Ouellette. Camille su zelo pa sirbishi a impreshoná mi mashá, spesialmente pasobra e tabata tata di famia. E tempu ei na Quebek, bo no sa tende ku ruman ku tin yu ta traha  pionero. Pero esei tabata Camille su meta. Durante e tempu ku nos a pasa huntu, el a animá mi pa pensa tokante mi situashon. Despues di algun luna, mi a realisá ku mi por traha pionero regular atrobe. Algun ruman a kuestioná mi desishon, pero mi a sigui padilanti konfiando ku Yehova lo bendishoná mi esfuersonan pa amplia mi sirbishi.

Na 1964, ami ku Simone a ser asigná komo pionero spesial na Quebek, nos stat natal. Nos a sirbi einan pa vários aña. E tempu ei nos tabatin ménos oposishon ku promé, pero algun hende ainda tabata oponé nos.

Un djasabra atardi, un polis a arestá mi na Sainte-Marie, un pueblo chikitu no muchu leu for di Quebek. El a sera mi pasobra mi tabata prediká di kas pa kas sin pèrmit. Mas despues, mi mester a presentá dilanti un hues ku yama Baillargeon, un hòmber ku djis mir’é so ta duna bo miedu. El a puntra mi ken lo representá mi den korte. Ora mi a bis’é Glen How, * un abogado Testigu bon konosí, el a bira nèrvioso i a grita: “E e! E sí nò!” Glen How tabata konosí pa defendé su rumannan ku éksito. Djis despues, korte a informá mi ku e akusashonnan kontra mi a ser anulá.

Debí na e oposishon na Quebek, tabata difísil pa nos hür un lugá apropiá pa reuní. Nos kongregashon chikitu a haña solamente un garashi bieu sin verwarming. Pa e rumannan por a haña poko kayente durante wenter friu, nan tabata usa un verwarming chikitu di kerozin. Promé ku reunion, nos tabata para rònt di dje pa un par di ora i konta eksperensia.

Ta maravioso pa mira kon e trabou di prediká a avansá durante e añanan. Den e dékada di 1960, tabatin solamente un par di kongregashon chikitu den e área di Quebek, e region di Côte-Nord i e península di Gaspé. Awe, tin un grupo grandi di ruman den e áreanan ei, i nan ta reuní den Salòn di Reino masha bunita.

Na 1970, ami ku Simone a ser invitá pa sirbi den e trabou di sirkuito. Anto na 1973, nos a ser asigná pa esun di distrito. Durante e añanan ei, mi a siña hopi for di rumannan ku eksperensia manera Laurier Saumur * i David Splane. * Despues di kada asamblea, ami i David tabata duna otro sugerensia pa mehorá nos manera di siña. Mi ta kòrda un biaha ku el a bisa mi: “Léonce, mi a disfrutá di bo diskurso final. E tabata bon, pero mi por a traha tres diskurso ku tur e informashon ei!” Mi tabatin e kustumber di hinka muchu informashon den mi diskursonan. Mi mester a siña kon pa mi ta breve i al kaso.

 Superintendente di distrito tabatin e responsabilidat di animá e superintendentenan di sirkuito. Pero, hopi publikadó den Quebek tabata konosé mi bon. Pues, nan tabata ke traha ku mi den sirbishi ora mi tabata bishitá e sirkuitonan. Aunke mi tabata gusta prediká huntu ku nan, mi no tabata dediká sufisiente tempu na e superintendentenan di sirkuito. Un biaha, un di nan a kòrda mi amorosamente: “Ta bon ku bo ta pasa tempu ku e rumannan, pero no lubidá ku esaki ta mi siman. Mi tambe mester di animashon!” E konseho bondadoso ei a yuda mi pa mi ta mas balansá.

Lamentablemente, algu inesperá i trágiko a sosodé na 1976. Simone, mi kerida esposa, a bira hopi malu i a fayesé. Su spiritu di sakrifisio propio i su amor pa Yehova a pone ku e tabata un kompañera masha maravioso. Debí ku mi a keda okupá den sirbishi, mi por a logra trata ku e pèrdida, i mi ta gradisí Yehova pa e amor i apoyo durante e momentonan difísil ei. Algun tempu despues, mi a kasa ku Carolyn Elliott, un pionero zeloso di abla ingles ku a bini Quebek pa sirbi kaminda tin mas nesesidat. E ta aserkabel i tin interes sinsero den hende, spesialmente esnan ku ta tímido òf ku ta sinti nan so. E tabata un gran yudansa den mi trabou komo superintendente biahero.

Na yanüari 1978, nan a pidi mi pa mi ta instruktor di e promé Skol di Sirbishi di Pionero na Quebek. Mi tabata nèrvioso pasobra e informashon tabata mesun deskonosí pa mi ku pa e studiantenan. Ménos mal ku den e promé klas tabatin pionero ku eksperensia. Aunke ami tabata e instruktor, mi a siña masha hopi for di e studiantenan!

Mas lat den e aña ei mes, nos tabatin e Asamblea Internashonal “Fe Viktorioso” na e Stadion Olímpiko di Montreal. Esei tabata e asamblea di mas grandi ku nos tabatin na  Quebek ku mas di 80.000 hende. Nan a asigná mi pa papia ku periodista tokante e kongreso. Mi tabata kontentu pa mira tur e notisia positivo den medio di komunikashon. Mas ku 20 ora di entrevista a pasa na radio i televishon, i sientos di artíkulo a ser publiká. Esei tabata un gran testimonio!

Desde ku mi a batisá, semper mi a sirbi den idioma franses na Quebek. Pero na 1996, tabatin un kambio grandi den mi bida: mi a haña asignashon pa sirbi den e distrito ingles den e área di Toronto. Mi no a sinti ku mi tabata kapasitá pa esei, i djis pensa so ku mi mester a duna diskurso den mi ingles kibrá, a duna mi miedu. Mi mester a hasi orashon mas tantu i konfia mas ainda riba Yehova.

Ora mi wak bèk, mi por bisa ku di bèrdat mi a disfrutá di e dos añanan maravioso ku mi a sirbi den e área di Toronto. Ku pasenshi Carolyn a yuda mi haña mas konfiansa pa papia ingles, i e rumannan a apoyá i animá nos mashá. Masha lihé nos a sera hopi amistat nobo.

Mi mester a hasi hopi kos pa prepará pa e wikènt di asamblea. Aparte di esei, mi tabata gusta sali djabièrnè atardi den sirbishi. Algun ruman lo a pensa: ‘Dikon sali den sirbishi djis promé ku un wikènt asina drùk?’ Pero, mi a ripará ku ora mi tin bon kòmbersashon den sirbishi, mi ta sinti mi animá. Te ainda ora mi sali den sirbishi, semper mi ta sinti mi bon.

Na 1998, ami ku Carolyn a ser reasigná komo pionero spesial na Montreal. Pa vários aña, mi asignashon a inkluí organisá un manera spesial pa prediká den área públiko i duna informashon na medio di komunikashon pa asina redusí prehuisio kontra Testigunan di Yehova. Awe, ami ku Carolyn gusta prediká na estranhero ku generalmente tin interes den siña mas tokante Beibel.

Ora mi pensa riba e 68 añanan ku mi tin batisá komo un sirbidó di Yehova, mi ta sinti mi hopi bendishoná. Mi ta sinti mi masha felis pasobra mi a siña gusta sirbishi i a yuda hopi hende konosé e bèrdat. Despues ku mi yu Lise ku su kasá a lanta nan yunan, nan a kuminsá sirbi komo pionero regular. Mi ta keda masha kontentu ora mi mira kuantu zelo e tin ainda den sirbishi. Mi ta spesialmente gradisidu na e rumannan kende nan bon ehèmpel i konseho sabí a yuda mi krese spiritualmente i atendé ku vários asignashon den e organisashon. Mi a siña ku ta posibel pa nos keda fiel den un asignashon solamente si nos konfia den e poder di e spiritu santu di Yehova. (Sal. 51:11) Mi no por stòp di yama Yehova danki pa duna mi e privilegio asina presioso di alabá su nòmber!—Sal. 54:6.