1. Kiko lo konsolá nos ora nos ta sinti nos nos so òf ora nos problemanan bira hopi? (Salmo 118:5-7)

BO A yega di sinti bo bo so, komo si fuera no tin niun persona pa yuda bo trata ku un problema? Hopi hende, inkluso algun sirbidó di Yehova, a yega di sinti nan asina. (1 Rei. 19:14) Na e momentonan ei, kòrda loke Yehova a primintí: “Hamas lo mi bandoná bo, i hamas lo mi laga bo desampará.” P’esei, nos por bisa ku konfiansa: “Yehova ta mi ayudante; lo mi no tin miedu.” (Heb. 13:5, 6) Apòstel Pablo a skirbi e palabranan ei na e kristiannan na Hudea rònt di aña 61. Su palabranan ta reflehá e mesun sintimentu ku esnan na Salmo 118:5-7.—Les’é.

2. Kiko nos lo analisá den e artíkulo akí, i dikon?

² Meskos ku e salmista, Pablo tabata sa di eksperensia ku Yehova tabat’ei pa yud’é. Por ehèmpel, mas o ménos dos aña promé ku el a skirbi su karta na e kristiannan na Hudea, el a hañ’é den un tormenta violento riba laman. (Echo. 27:4, 15, 20) Tantu den e biahe ei komo e añanan promé, Yehova a yuda Pablo na vários manera. Nos lo analisá tres di nan. Yehova a yud’é pa medio di Hesus i e angelnan, hende ku tin outoridat i su rumannan. Ora nos analisá e susesonan ei di Pablo su bida, nos lo haña mas konfiansa ku Dios lo t’ei pa yuda nos tambe.

3. Kiko kisas Pablo a puntra su mes, i dikon?

³ Rònt di aña 56, un multitut a lastra Pablo saka for di tèmpel na Herúsalèm i a purba di mat’é. E siguiente dia, ora el a ser hibá dilanti Sanedrin, su enemigunan a kasi sker e na pida pida. (Echo. 21:30-32; 22:30; 23:6-10) Na e momento ei, kisas Pablo a puntra su mes: ‘Pa kuantu tempu mas lo mi por soportá e maltrato akí?’ Sin duda, e tabatin mester di yudansa.

4. Kon Yehova a usa Hesus pa yuda Pablo?

⁴ Ki yudansa Pablo a haña? E anochi despues di Pablo su aresto, “Señor,” esta, Hesus, a presentá na dje i a bis’é: “Tene kurashi! Pasobra meskos ku bo a duna un testimonio kabal tokante mi na Herúsalèm, asina tambe lo bo tin ku duna testimonio na Roma.” (Echo. 23:11) E animashon ei tabata nèt na ora! Hesus a elogiá Pablo pa e testimonio ku el a duna na Herúsalèm. Anto el a primintí Pablo ku lo e yega Roma sano i salvo, pasobra einan tambe lo e duna testimonio. E promesa ei lo a laga Pablo sintié manera un yu protehá den brasa di su tata.

5. Kon Yehova a usa un angel pa yuda Pablo? (Wak e plachi riba portada.)

⁵ Ki otro difikultat Pablo a hañ’é kuné? Mas o ménos dos aña despues di loke a sosodé na Herúsalèm, Pablo tabata riba un barku rumbo pa Italia. Diripiente, un tormenta masha fuerte a lanta; e tripulashon i e pasaheronan a pensa ku nan tabata bai muri. Pero, Pablo sí no tabatin miedu. Dikon nò? El a bisa esnan na bordo: “Ayera nochi un angel di e Dios, na ken mi ta pertenesé i na ken mi ta rindi sirbishi sagrado, a bin para banda di mi, i el a bisa mi: ‘No tene miedu, Pablo. Bo tin ku presentá dilanti di Sésar, i es mas, Dios bondadosamente lo spar bida di tur esnan ku ta nabegá huntu ku bo.’” Yehova a usa un angel pa ripití e mesun promesa ku El a hasi promé pa medio di Hesus. I dicho echo, Pablo a yega Roma.—Echo. 27:20-25; 28:16.

6. Ki promesa di Hesus por fortalesé nos, i dikon?

⁶ Ki yudansa nos ta haña? Meskos ku Pablo, nos por konta ku yudansa di Hesus. Hesus ta primintí tur su siguidónan: “Mi ta ku boso tur e dianan, te na konklushon di e era akí.” (Mat. 28:20) E palabranan ei ta fortalesé nos mashá. Dikon? Pasobra nos tur sa tin dia difísil. Por ehèmpel, ora un ser kerí di nos fayesé, e tristesa ku nos ta sinti no ta dura pa djis un par di dia, pero kisas pa hopi aña.  Algun di nos, dia aden dia afó tin ku trata ku e krekechénan di edat avansá. I kisas tin di nos tin dia masha difísil debí na depreshon. Apesar di tur esei, nos tin forsa pa sigui padilanti pasobra nos sa ku Hesus ta ku nos “tur e dianan,” asta esnan di mas difísil den nos bida.—Mat. 11:28-30.

7. Di akuerdo ku Revelashon 14:6, kon Yehova ta yuda nos awe?

⁷ Beibel ta sigurá nos ku Yehova ta usa su angelnan pa yuda nos. (Heb. 1:7, 14) Por ehèmpel, e angelnan ta yuda i guia nos segun ku nos ta prediká “e bon notisia . . . di e Reino” na hende di “tur nashon, tribu [i] idioma.”—Mat. 24:13, 14; lesa Revelashon 14:6.

8. Kon Yehova a usa un komandante militar pa yuda Pablo?

⁸ Ki yudansa Pablo a haña? Manera ya nos a mira, rònt di aña 56, Hesus a sigurá Pablo ku lo e yega Roma. Pero, algun hudiu na Herúsalèm a traha un trampa pa mat’é. Ora e komandante militar romano Klaudio Lisias a haña sa esei, el a yuda Pablo. Mesora, el a ordená un grupo grandi di sòldá pa protehá Pablo i hib’é Sesarea, un ruta di mas o ménos 105 kilometer. Na Sesarea, Gobernador Feliks a duna òrdu pa nan tene Pablo “bou di vigilansia den e palasio di Heródes.” Asina ei, Pablo tabata leu for di alkanse di e hudiunan ku kier a mat’é.—Echo. 23:12-35.

9. Kon Gobernador Festo a yuda Pablo?

⁹ Dos aña despues, na aña 58, ainda Pablo tabata preso na Sesarea. Festo a bira gobernador na lugá di Feliks. E hudiunan a rog’é pa laga Pablo bini Herúsalèm p’e ser husgá ei, pero Festo a nenga. Kisas e tabata sa ku e hudiunan “a traha un trampa pa [mata Pablo] na kaminda.”—Echo. 24:27–25:5.

10. Kiko Gobernador Festo a hasi ora Pablo a apelá na Sésar?

¹⁰ Mas despues, Pablo a ser husgá na Sesarea. Komo ku Festo tabata “kier a keda bon mirá serka e hudiunan,” el a puntra Pablo: “Bo ke bai Herúsalèm? Lo mi ta einan ora e korte ta husga bo.” Pablo tabata sa ku, si e bai Herúsalèm, probablemente nan lo mat’é. Ma, e tabata sa tambe kiko e mester a hasi pa salba su bida pa yega Roma i sigui prediká. Pues, el a bisa: “Mi ta apelá na Sésar!” Despues ku Festo a konsultá ku su konseheronan, el a bisa: “Bo a apelá na Sésar; serka Sésar lo bo bai!” E desishon ei di Festo pa manda Pablo na Roma a pon’é leu for di alkanse di su enemigunan.—Echo. 25:6-12.

11. Ki palabra animante di Profeta Isaías kisas Pablo a pensa ariba?

¹¹ Miéntras Pablo tabata warda pa kuminsá su biahe pa Italia, kisas el a pensa riba loke Profeta Isaías a bisa hende ku a oponé Yehova: “Traha un plan, ma lo e wòrdu strobá; papia un palabra, ma esaki lo no tuma lugá, pasobra Dios ta ku nos.” (Isa. 8:10) Pablo tabata sa ku Dios lo yud’é. Esei sigur lo a dun’é forsa pa enfrentá e pruebanan ku tabata ward’é.

12. Kon Hulio a trata Pablo, i kiko probablemente Pablo a realisá?

¹² Pablo a sali rumbo pa Italia. Komo prizonero, e tabata bou di supervishon di un ofisial di ehérsito romano ku yama Hulio. E por a trata Pablo bon òf hasi su bida imposibel. Kon el a usa su outoridat? Su manisé ora nan a baha for di  barku, “Hulio a trata Pablo ku masha bondat i a permitié bai serka su amigunan.” Un par di tempu despues, Hulio te asta a skapa Pablo su bida. Kon? Ora e olanan brutu a kibra e barku, e sòldánan kier a mata tur e prizoneronan na bordo, pa ningun di nan no landa bai i hui. Pero, Hulio a stroba nan. Dikon? Pasobra e “tabata ke pa Pablo keda sano i salvo.” Probablemente Pablo a realisá ku Yehova tabata usa e ofisial di bon kurason ei pa yud’é i proteh’é.—Echo. 27:1-3, 42-44.

13. Kon Yehova por usa hende ku tin outoridat?

¹³ Ki yudansa nos ta haña? Si ta na armonia ku Yehova propósito, e por usa su spiritu santu poderoso pa laga hende ku tin outoridat hasi loke e ke. Rei Sálomon a skirbi: “Manera riunan di awa, asina kurason di rei ta den e man di SEÑOR; e ta bir’é pa unda ku e ke.” (Pro. 21:1) Kiko e proverbio ei ta nifiká? Hende por koba un kanal pa desviá awa di un riu i mand’é bai na unda ku nan ke. Di mes manera, Yehova por usa su spiritu santu pa desviá pensamentu di e gobernantenan den un direkshon ku ta na armonia ku su propósito. Ora esei sosodé, hende ku tin outoridat ta sinti nan motivá pa tuma desishon ku ta benefisiá e pueblo di Dios.—Kompará ku Èsdras 7:21, 25, 26.

14. Di akuerdo ku Echonan 12:5, pa ken nos por hasi orashon?

¹⁴ Kiko nos por hasi? Nos por hasi orashon “pa reinan i tur esnan ku tin outoridat” ora nan tin ku tuma desishon ku tin efekto riba nos aktividatnan kristian. (1 Tim. 2:1, 2, nota; Neh. 1:11) Meskos ku e kristiannan di promé siglo, nos ta roga Dios fervientemente pa nos rumannan ku ta den prizòn. (Lesa Echonan 12:5; Heb. 13:3) Pero, nos por hasi orashon tambe pa e wardadónan di prezu kaminda nos rumannan ta. Nos por roga Yehova pa influensiá nan pensamentu pa nan sinti nan motivá pa trata nos rumannan ku bondat, meskos ku Hulio a trata Pablo.—Echo. 27:3.

15-16. Kon Yehova a usa Aristargo i Lukas pa yuda Pablo?

¹⁵ Ki yudansa Pablo a haña? Durante Pablo su biahe pa Roma, bes tras bes Yehova a usa e rumannan pa yuda Pablo. Laga nos wak algun ehèmpel.

¹⁶ Aristargo i Lukas, dos fiel kompañero di Pablo, a disidí di biaha huntu kuné  pa Roma. * Nan tabata dispuesto pa riska nan bida pa kompañá Pablo. De echo, Beibel no ta bisa ku Hesus a primintí nan dos ku nan lo a yega Roma sano i salvo. Ta te mas despues, meimei di e tormenta, nan a bin haña sa ku nan lo no a muri. Pues, ora nan a subi na bordo, Pablo sin duda lo a gradisí Yehova pa a usa e dos kristiannan yen di kurashi ei pa yud’é.—Echo. 27:1, 2, 20-25.

17. Kon Yehova a usa e rumannan pa yuda Pablo?

¹⁷ Durante Pablo su biahe, vários biaha su rumannan a yud’é. Por ehèmpel, na e haf di Sidon, Hulio a permití Pablo “bai serka su amigunan i laga nan perkurá p’e.” I mas despues, na e stat di Puteoli, Pablo i su kompañeronan a topa e rumannan, ku a pidi nan mashá pa keda shete dia serka nan. E rumannan na e lugánan ei a perkurá masha bon mes pa Pablo i su kompañeronan. I Pablo, di su parti, sin duda lo a kompartí eksperensia animante ku lo a duna nan hopi goso. (Kompará ku Echonan 15:2, 3.) Despues di pasa algun dushi dia ku e rumannan, Pablo i su kompañeronan a sigui ku nan biahe.—Echo. 27:3; 28:13, 14.

18. Kiko a motivá Pablo pa gradisí Dios i sinti su mes animá?

¹⁸ Segun ku Pablo tabata kana bai Roma, lo el a pensa riba loke el a skirbi tres aña promé na e kongregashon den e stat ei: “Pa algun aña kaba mi tin masha gana di bishitá boso.” (Rom. 15:23) Sinembargo, nunka el a pensa ku lo el a yega einan komo un prizonero. Imaginá kon kontentu el a keda ora el a mira e rumannan na Roma pará kantu di kaminda pa kumind’é! “Ora Pablo a mira nan, el a gradisí Dios i a sinti su mes hopi animá.” (Echo. 28:15) Dikon el a gradisí Dios ku e rumannan tabata einan? Pasobra un biaha mas el a realisá ku Yehova tabata usa su rumannan pa yud’é.

19. Di akuerdo ku 1 Pedro 4:10, kon Yehova por usa nos pa yuda hende ku ta pasando den momento difísil?

 ¹⁹ Kiko nos por hasi? Bo sa di un ruman den bo kongregashon ku ta sufriendo debí na malesa, problema òf morto di un ser kerí? Si nos tende ku un hende ta pasando den momento difísil, pidi Yehova yuda nos bisa algu amabel òf hasi un kos di grasia p’e. Kisas esei ta nèt e animashon ku nos ruman tin mester. (Lesa 1 Pedro 4:10.) * Ora nos yuda un hende, kisas e por bolbe haña konfiansa den loke Yehova a primintí: “Hamas lo mi bandoná bo, i hamas lo mi laga bo desampará.” Esei sin duda lo hasi bo masha felis!

20. Dikon nos por bisa ku tur konfiansa: “Yehova ta mi ayudante”?

²⁰ Meskos ku a sosodé ku Pablo i su kompañeronan, nos tambe ta haña nos ku tormenta violento den bida. Pero, nos no tin miedu pasobra nos sa ku Yehova t’ei pa yuda nos. E por usa Hesus i e angelnan pa yuda nos. Ademas, si ta na armonia ku Yehova su propósito, e por usa hende ku tin outoridat pa yuda nos. I manera hopi di nos a eksperensiá, Yehova ta usa su spiritu santu pa motivá nos rumannan pa yuda nos. P’esei, meskos ku Pablo, nos por bisa ku tur konfiansa: “Yehova ta mi ayudante; lo mi no tin miedu. Kiko hende por hasi mi?”—Heb. 13:6.