1. Kiko Pablo a kòrda e kristiannan?

TUR kristian ta den e kareda pa bida. Sea ku nos a kaba di kuminsá kore òf nos tin hopi aña den e kareda kaba, nos tin ku sigui kore te ora nos krusa e liña final. E karta ku apòstel Pablo a skirbi e kristiannan na Filipo por animá nos pa no entregá den e kareda ei. Ora nan a haña e karta di Pablo, algun di nan ya tabatin hopi aña ta sirbi Yehova. Aunke nan tabata sirbi Yehova fielmente, Pablo a kòrda nan ku nan mester a sigui kore ku perseveransia. E tabata ke pa nan sigui su ehèmpel, esta, pa nan hasi tur “esfuerso pa alkansá e meta.”—Flp. 3:14.

2. Dikon e animashon ku Pablo a duna e kongregashon na Filipo tabata nèt na ora?

² E animashon ku Pablo a duna e kongregashon na Filipo tabata nèt na ora. E kongregashon ei a sufri persekushon for di momento ku a form’é. Tur kos a kuminsá na aña 50, ora Pablo i Sílas a bai prediká na Filipo despues di a haña e invitashon di Dios pa “krusa bin Masedonia.” (Echo. 16:9) Ei, nan a topa Lidia, kende a “skucha [nan]. I Yehova a habri su kurason kompletamente” pa e bon notisia. (Echo. 16:14) Poko tempu despues, Lidia i su hendenan di kas a batisá. Pero, Diabel no a sinta man krusá. Algun hende di e stat a hiba Pablo i Sílas dilanti e funshonarionan sivil i a akusá nan falsamente di ta kousa disturbio. Komo resultado, nan a duna Pablo i Sílas un halá di sota, a tira nan den prizòn i despues a duna nan òrdu pa sali for di e stat. (Echo. 16:16-40) Akaso Pablo i Sílas a entregá? Nò! I kiko di e rumannan di e kongregashon  resien formá? Nan tambe a perseverá! Sin duda, nan a sinti nan masha animá pa e ehèmpel ku Pablo i Sílas a pone.

3. Kiko Pablo a realisá, i ki pregunta nos lo trata?

³ Pablo tabata determiná pa no entregá. (2 Kor. 4:16) Pero, el a realisá ku pa e kore te final e mester a keda enfoká riba e meta. Kiko nos por siña for di Pablo su ehèmpel? Kon ehèmpel di algun ruman fiel di awe por yuda nos perseverá apesar di prueba? I kon nos speransa pa futuro por fortalesé nos determinashon pa nunka entregá?

4. Kiko Pablo a hasi apesar di e situashon ku e tabata aden?

⁴ Kòrda den ki situashon Pablo tabata ora el a skirbi e kristiannan na Filipo un karta. E tabata bou di aresto den su kas na Roma, pues e no por a sali bai prediká. Pero, el a keda okupá predikando na esnan ku a bin bishit’é i skirbiendo karta na e kongregashonnan leu. Meskos awe, hopi ruman ku no por sali for di kas debí na edat òf malesa ta probechá prediká na hende ku ta bin bishitá nan. Ademas, nan ta skirbi karta animante na hende ku ta difísil pa haña na kas.

5. Segun Filipensenan 3:12-14, kiko tabata importante pa Pablo hasi?

⁵ Pablo no a permití e kosnan bon ku el a logra òf su erornan di pasado kita su atenshon for di su sirbishi na Yehova. De echo, el a bisa ku tabata importante p’e “lubidá e kosnan [su] tras” i “rèk pa gara e kosnan [su] dilanti,” esta, pa finalisá e kareda ku éksito. (Lesa Filipensenan 3:12-14.) Kiko ta algun kos ku por a kita Pablo su atenshon? Promé, aunke Pablo tabata hopi eksitoso promé ku el a bira kristian, el a mira tur esei komo “kos di benta afó.” (Flp. 3:3-8) Di dos, aunke kisas e tabata sintié kulpabel di a persiguí e kristiannan, e no a permití e sintimentunan ei strob’é di sirbi Yehova. Di tres, e no a pensa ku tur loke el a hasi pa Yehova tabata sufisiente. Pablo a hasi hopi den su sirbishi aunke el a hañ’é ku hopi prueba. El a bai prizòn, el a haña sota, nan a piedr’é, el a noufragá i e tabata sin kuminda i paña. (2 Kor. 11:23-27) Sinembargo, apesar di loke Pablo ya a logra i a sufri, e tabata sa ku e mester a sigui sirbi Yehova. Nos mester hasi meskos.

6. Kiko ta algun di “e kosnan [nos] tras” ku kisas nos tin ku lubidá?

⁶ Kon nos por “lubidá e kosnan [nos] tras” meskos ku Pablo? Kisas algun di nos mester lucha ku sintimentu di kulpa debí na nos pikánan di pasado. Den e kaso ei, dikon no hasi estudio personal tokante Kristu su sakrifisio di reskate? Si bo studia, meditá i resa tokante e tópiko ei, bo por ta mas konvensí ku Yehova ya a pordoná bo pikánan kaba. Bo por asta stòp di sinti bo kulpabel pa e pikánan ei. Esei lo animá bo i lo laga bo sinti bo mihó. Wak un otro lès ku nos por siña for di Pablo. Algun ruman a bai laga un bon trabou pa nan por hasi mas pa Yehova. Si esei ta bo kaso, un manera pa “lubidá e kosnan [bo] tras” ta di no anhelá e posibel rikesa òf bida kómodo ku bo a laga pasa. (Num. 11:4-6; Ekl. 7:10) “E kosnan [nos] tras” por asta inkluí loke nos a logra den Yehova su sirbishi òf prueba ku nos a pasa aden. Klaru ku no ta malu pa  kòrda kon Yehova a bendishoná i sostené nos durante e añanan ku a pasa. Esei por hala nos mas serka nos Tata. Pero, nunka nos no ke pensa ku loke nos a hasi pa Yehova ta sufisiente.—1 Kor. 15:58.

7. Segun 1 Korintionan 9:24-27, kiko nos mester hasi pa gana e kareda pa bida? Ilustrá esei.

⁷ Pablo a komprondé e siguiente palabranan di Hesus bon kla: “Hasi esfuerso vigoroso.” (Luk. 13:23, 24) Pablo tabata sa ku, meskos ku Kristu, e mester a hasi esfuerso henter su bida. P’esei, el a kompará bida kristian ku un kareda. (Lesa 1 Korintionan 9:24-27.) Den un kareda, e koredó ta keda enfoká riba e liña final i no ta laga nada kita su atenshon. Por ehèmpel, e por kore den un kaya ku tin diferente pakus i negoshi òf vários otro kos ku por kita su atenshon. Awor, bo ta kere ku lo e para wak showcase? Nò. Ta klaru ku lo e no hasi esei si e ke gana! Meskos ta konta pa e kareda pa bida; nos tin ku evitá tur tipo di kos ku por kita nos atenshon. Si nos keda enfoká riba nos meta i hasi esfuerso vigoroso meskos ku Pablo, nos lo gana e premio!

8. Ki tres sirkunstansia nos lo analisá?

⁸ Laga nos analisá tres sirkunstansia ku por pone nos desanimá òf baha velosidat den e kareda: (1) speransa posponé, (2) limitashon físiko segun ku edat ta subi i (3) prueba ku ta dura largu. Algu ku por yuda nos hopi ta di wak kon otro ruman a trata ku e sirkunstansianan ei.—Flp. 3:17.

9. Kon speransa posponé por afektá nos?

⁹ Speransa posponé. Ta normal ku nos ta anhelá pa Yehova kumpli ku su promesanan. Profeta Habakuk a sinti meskos. El a bisa ku e ta anhelá pa Yehova kaba ku maldat na Huda. I Yehova a bis’é pa “sigui spera.” (Hab. 2:3, BPK) Pero, ora ta parse ku e kosnan ku nos ta anhelá no ta bini mesora òf ta tarda, nos zelo por mengua. Nos por asta desanimá. (Pro.  13:12) Esei a sosodé ku algun ruman na komienso di siglo 20. E tempu ei, hopi ruman ungí tabatin e speransa di bai shelu na 1914. Ora esei no a pasa, kon e rumannan fiel ei a trata ku nan speransa posponé?

10. Kon un pareha a trata ku speransa posponé?

¹⁰ Ban wak un ehèmpel di dos ruman fiel. Ruman Royal Spatz tabatin 20 aña ora el a batisá na 1908. E tabata hopi sigur ku pronto lo el a bai shelu. De echo, ora ku el a pidi Pearl pa kasa kuné na 1911, el a bis’é: “Bo sa kiko ta bai pasa na 1914. Pues, si nos ta bai kasa, mihó nos kasa lihé!” Akaso e pareha kristian ei a entregá i sali for di e kareda pa bida ora nan no a bai shelu na 1914? Nò, pasobra nan enfoke tabata pa sirbi Yehova fielmente i no pa bai shelu. Nan tabata determiná pa keda fiel i sigui kore e kareda ku perseveransia. I ta esei nan a hasi te dia ku nan a muri hopi aña despues. Sin duda, bo ta anhelá e tempu ku Yehova lo vindiká su nòmber i su soberania i kumpli ku tur su promesanan. Bo por tin sigur ku tur e kosnan ei lo sosodé na Yehova su debido tempu. Mientrastantu, laga nos keda okupá den nos sirbishi na Dios i nunka permití speransa posponé desanimá nos.

11-12. Dikon nos por sigui sirbi Yehova fielmente apesar di limitashon físiko segun ku nos edat ta subi? Duna un ehèmpel.

¹¹ Limitashon físiko segun ku edat ta subi. Kontrali na un koredó literal, bo no mester ta físikamente fuerte pa bo sigui kore den e kareda pa bida. De echo, hopi ruman ku ta físikamente limitá segun ku nan edat ta subi ainda ta determiná pa sigui krese den sentido spiritual. (2 Kor. 4:16) Por ehèmpel, ora Ruman Arthur Secord * tabatin 88 aña, ya el a sirbi 55 aña na Bètel. Su kurpa no tabata duna mas i e tabata suak. Un dia, un verpleegster a bini pa kuid’é na kama. El a wak Arthur i a bis’é: “Ruman Secord, bo a hasi hopi den Yehova su sirbishi.” Pero Arthur no a keda enfoká riba loke el a hasi. El a wak e verpleegster i ku un smail a bis’é: “No ta loke nos a hasi ta importante. Ta loke nos ta hasi di awor padilanti ta konta.”

¹² Kisas bo a sirbi Yehova pa hopi aña i awor bo salú no ta permití bo hasi mes tantu pa Yehova manera ántes. Si ta asina, no desanimá. Sea sigur ku Yehova ta kòrda i ta apresiá tur loke bo a hasi p’e den pasado. (Heb. 6:10) I kòrda ku nos  amor pa Yehova no ta mará na kuantu kos nos ta hasi p’e. Mas bien, nos ta demostrá nos amor pa Yehova manteniendo nos goso i speransa i hasiendo tur loke nos por p’e. (Kol. 3:23) Yehova sa nos limitashonnan i no ta ferwagt ku nos ta hasi mas ku nos por.—Mar. 12:43, 44.

13. (a) Kiko a pasa ku Anatoly ku Lidiya? (b) Kon nan ehèmpel ta animá nos pa sigui sirbi Yehova apesar di hopi prueba?

¹³ Prueba ku ta dura largu. Algun sirbidó di Yehova a perseverá apesar ku nan a pasa den prueba i persekushon pa hopi aña largu. Por ehèmpel, Anatoly Melnik * tabatin solamente 12 aña ora su tata a ser arestá, enkarselá i mandá pa Siberia, hopi leu for di su famia na Moldavia. Un aña despues, Anatoly, su mama i su wela ku tawela [òf, welo] tambe a bai den eksilio na Siberia. Ku tempu, nan por a asistí na e reunionnan na un otro pueblo, pero nan mester a kana den sneu pa mas ku seis ora den wer sumamente friu. Despues, Anatoly a bai prizòn pa tres aña largu, leu for di su kasá Lidiya i nan yu muhé di un aña. Apesar di tur e añanan di prueba, Anatoly i su famia a sigui sirbi Yehova fielmente. Awor, Anatoly tin 82 aña i e ta miembro di Komité di Sukursal na Asia Sentral. Laga nos imitá Anatoly ku Lidiya: hasi tur loke nos por den nos sirbishi na Yehova i sigui perseverá meskos ku nos a hasi den pasado.—Gal. 6:9.

14. Kiko Pablo a realisá ku e mester a hasi pa alkansá su meta?

¹⁴ Pablo tabatin sigur ku lo el a finalisá su kareda i alkansá su meta. Komo kristian ungí, e meta ku Pablo kier a alkansá tabata di haña “e premio di Dios su yamada selestial.” Pero, el a realisá ku e mester a sigui “hasi tur [su] esfuerso” pa e alkansá e meta ei. (Flp. 3:14) Pablo a usa un ilustrashon interesante pa yuda e rumannan na Filipo sigui enfoká riba nan meta.

15. Kon Pablo a usa un ilustrashon di siudadania pa animá e kristiannan na Filipo pa sigui “hasi tur [nan] esfuerso”?

¹⁵ Pablo a kòrda e rumannan na Filipo ku nan siudadania tabata den shelu. (Flp. 3:20) Dikon nan mester a kòrda esei? E tempu ei, hopi hende kier a bira siudadano di Roma pasobra ser siudadano  di Roma a trese hopi benefisio. * Pero, un kristian ungí tabatin un siudadania muchu mas mihó i ku muchu mas benefisio. Kompará ku e siudadania den shelu, esun romano tabatin masha tiki balor! Pa e motibu ei, Pablo a animá e rumannan na Filipo pa “komportá [nan] na un manera digno di e bon notisia tokante Kristu.” (Flp. 1:27) E palabra “komportá” den e versíkulo ei ta nifiká “komportá boso manera siudadano.” Awe, tur kristian ungí ta pone un bon ehèmpel segun ku nan ta sigui hasi esfuerso pa alkansá nan meta di bida eterno den shelu.

16. Sea ku nos tin e speransa di bida eterno den shelu òf den Paradeis riba tera, kiko nos mester sigui hasi segun Filipensenan 4:6 i 7?

¹⁶ Sea ku nos tin e speransa di bida eterno den shelu òf den Paradeis riba tera, nos mester sigui hasi esfuerso pa alkansá nos meta. Sin importá nos sirkunstansia, nos mester lubidá e kosnan nos tras i nos no mester laga nada stroba nos di sirbi Yehova. (Flp. 3:16) Kisas por parse ku loke nos ta spera ariba no ta bini mesora, òf nos tin limitashon físiko segun ku nos edat ta subi. Kisas nos mester a soportá prueba i persekushon pa hopi aña largu. Sea kual sea e kaso, “no sea anshá tokante nada.” Mas bien, laga Dios sa kiko ta bo petishon- i súplikanan, i lo e duna bo pas mental ku ta mas mihó ku kualke kos ku bo por imaginá.—Lesa Filipensenan 4:6, 7.

17. Kiko nos lo analisá den e siguiente artíkulo?

¹⁷ Un koredó ku ta yegando final di un kareda ta enfoká riba e liña final i ta hasi tur su esfuerso pa finalisá e kareda. Nos tambe mester enfoká riba tur e promesanan maravioso pa futuro segun ku nos ta yegando final di nos kareda pa bida. Sí, nos ke sigui hasi tur nos esfuerso awor. Kon nos por sigui perseverá? E siguiente artíkulo lo yuda nos pone prioridat i “hasi sigur kiko ta e kosnan mas importante.”—Flp. 1:9, 10.