1-2. Di akuerdo ku 1 Timoteo 6:20, kiko Timoteo a haña?

ORA un hende tin algu balioso, mayoria di biaha e ta laga un otro hende kuid’é p’e. Por ehèmpel, mayoria di nos ta warda nos plaka na banko. Nos ta spera ku einan lo e ta safe i ku lo e no ser hòrtá. Pues, nos ta komprondé kiko ke men konfia un hende ku algu ku ta balioso pa nos.

² Lesa 1 Timoteo 6:20. Apòstel Pablo a rekordá Timoteo ku el a haña algu balioso: konosementu eksakto di Dios su propósito pa humanidat. Ademas, Timoteo a haña e privilegio di “prediká e palabra” i “hasi e trabou di un predikadó di e bon notisia.” (2 Tim. 4:2, 5) P’esei, Pablo a animá Timoteo pa kuida loke a ser konfiá na dje. Meskos ku Timoteo, Yehova a konfia nos ku algun kos balioso. Kiko nan ta? Dikon nos mester protehá e kosnan balioso ei ku Yehova a duna nos?

3-4. Dikon e bèrdatnan di Beibel ta balioso?

³ Debí ku Yehova ta bondadoso, el a duna nos konosementu eksakto di e bèrdatnan balioso ku tin den su Palabra, Beibel. E bèrdatnan ei ta balioso pasobra nan ta siña nos kon pa nos tin un bon amistat ku Yehova, i nan ta splika nos kon nos por ta berdaderamente felis. Ora nos aseptá e bèrdatnan ei i biba di akuerdo ku nan, nos lo ta liber. Nos lo stòp di ta esklabo di siñansa falsu i di práktika inmoral.—1 Kor. 6:9-11.

⁴ Un otro motibu dikon e bèrdatnan di e Palabra di Dios ta balioso ta ku Yehova a revelá nan solamente na hende humilde ku ta “dispuesto pa aseptá e bèrdat.” (Echo. 13:48) E hendenan ei ta aseptá ku e esklabo fiel i prudente ta esun ku awendia ta siña nos e bèrdatnan ei di  Beibel. (Mat. 11:25; 24:45) Riba nos mes, nunka nos lo por a komprondé e bèrdatnan ei, i no tin nada den e mundu akí ku ta mes balioso ku nan.—Pro. 3:13, 15.

5. Kiko mas Yehova a konfia nos kuné?

⁵ Yehova a konfia nos tambe ku e privilegio di siña otro hende e bèrdat tokante dje i su propósito. (Mat. 24:14) E mensahe ku nos ta prediká ta masha balioso. E ta yuda hende bira parti di Yehova su famia i ta duna nan e oportunidat di biba pa semper. (1 Tim. 4:16) Sea ku nos ta prediká hopi òf tiki, nos tur ta enbolbí den e trabou di mas importante ku ta eksistí awe. (1 Tim. 2:3, 4) Sin duda, ta un gran onor pa nos ta kompañero di trabou di Dios.—1 Kor. 3:9.

6. Kiko a pasa ku algun kristian ku no a keda vigilá?

⁶ Algun kristian ku tabata biba den mesun tempu ku Timoteo, no a balorá e privilegio di ta kompañero di trabou di Dios. Por ehèmpel, Démas a stima mundu, i p’esei e no a balorá su privilegio di sirbi huntu ku Pablo. (2 Tim. 4:10) Figelo i Hermogeno tambe a bandoná nan sirbishi pasobra aparentemente nan tabatin miedu di sufri e mesun persekushon ku Pablo. (2 Tim. 1:15) Himeneo, Aleksander i Fileto a bira apóstata i a stòp di sirbi Yehova. (1 Tim. 1:19, 20; 2 Tim. 2:16-18) Ta parse ku un tempu nan tur tabata spiritualmente fuerte, pero nan a pèrdè for di bista loke realmente tabata balioso.

7. Ki táktika Satanas ta usa kontra nos?

⁷ Kon Satanas ta purba di laga nos bandoná e tesoronan ku Yehova a konfia nos kuné? E ta usa diferente táktika. E ta usa entretenimentu i medionan di komunikashon pa pone nos pensa i komportá na un manera ku tiki-tiki lo stòp nos di stima Yehova i di obedesé su leinan. E ta usa hende pa preshoná òf persiguí nos ku e intenshon di stòp nos di prediká. I e ta purba di kohe nos den trampa ku “konosementu falsu” ku apóstata ta plama, i e ta spera ku nos ta bandoná e bèrdat.—1 Tim. 6:20, 21.

8. Kiko bo ta siña for di loke a pasa ku Daniel?

⁸ Si nos no tene kuidou, pokopoko nos por bandoná e bèrdat. Wak e eksperensia di Daniel, * ku tabata gusta hunga wega di vidio. El a konta: “Mi a kuminsá hunga wega di vidio tempu mi tabatin mas o ménos dies aña. Na kuminsamentu, e weganan no tabatin nada malu den nan. Pero  despues, mi a kuminsá hunga wega ku tabatin violensia, spiritismo i kos sobrenatural.” Dado momento, Daniel a kuminsá pasa mas ku 15 ora pa dia ta hunga wega. El a bisa: “Mi tabata sa ku e weganan ku mi tabata hunga i e tempu ku mi tabata pasa ta hunga nan tabata hala mi for di Yehova. Pero mi kurason a bira duru. Mi a pensa ku e prinsipionan ku tin den Beibel no tabata apliká pa mi.” Meskos por pasa ku nos. Entretenimentu por influensiá nos di manera sutil i pone ku fásilmente nos no ta tene duru na e bèrdat mas. Si esei pasa, nos por pèrdè e kosnan balioso ku Yehova a duna nos.

9. Di akuerdo ku 1 Timoteo 1:18 i 19, kiko Pablo a animá Timoteo pa hasi?

⁹ Lesa 1 Timoteo 1:18, 19. Pablo a kompará Timoteo ku un sòldá i a dun’é e siguiente animashon: “Sigui bringa e guera ekselente.” E guera ei no tabata literal, sino spiritual. Pero, den ki sentido kristian por ser kompará ku sòldá ku ta den guera? Ki kualidat nos komo sòldá di Kristu mester kultivá? Laga nos wak sinku lès ku nos por siña for di e ilustrashon di Pablo. E lèsnan ei lo yuda nos tene duru na e bèrdat.

10. Kiko ta deboshon na Dios, i dikon nos mester di dje?

¹⁰ Kultivá deboshon na Dios. Un bon sòldá ta leal. E ta lucha ku tur su forsa pa protehá un hende ku e ta stima òf algu ku e ta balorá. Pablo a animá Timoteo pa kultivá deboshon na Dios, esta, un sintimentu di amor i lealtat na dje. (1 Tim. 4:7) Mas fuerte nos amor pa Dios ta, mas gana nos tin di tene duru na e bèrdat.—1 Tim. 4:8-10; 6:6.

11. Dikon nos mester entrená nos mes pa hasi loke ta korekto?

¹¹ Entrená nos mes pa hasi loke ta korekto. Un sòldá mester entrená su mes òf traha duru si e ke ta prepará pa bataya. Timoteo tabata spiritualmente prepará pasobra el a sigui e konseho ku el a haña di Pablo: el hui pa deseo robes, el a hasi esfuerso pa kultivá kualidat kristian i el a pasa tempu ku su rumannan kristian. (2 Tim. 2:22) Esei a rekerí hopi esfuerso. Meskos ta konta pa nos. Nos mester entrená nos mes pa hasi loke ta korekto pa asina nos gana e bataya kontra deseo robes. (Rom. 7:21-25) Ademas, nos mester entrená nos mes pa hasi loke ta korekto pa nos por kita e personalidat bieu i bisti esun nobo. (Efe. 4:22, 24) I si nos ta kansá na final di un dia largu, nos mester fòrsa nos mes pa asistí na reunion.—Heb. 10:24, 25.

12. Kon nos por bira mas ábil den nos uso di Beibel?

¹² Un sòldá mester train pa usa su arma. E mester hasi esei regularmente si e ke ta ábil. Di mes manera, nos mester ta ábil den e uso di e Palabra di Dios. (2 Tim. 2:15) Nos ta siña esei na nos reunionnan. Pero si nos ke konvensé otro hende ku Beibel ta balioso, nos mester tin e kustumber di hasi estudio personal regularmente. Nos mester usa e Palabra di Dios pa fortalesé nos fe. Esei ta enserá mas ku djis lesa Beibel. Nos tin ku meditá riba loke nos ta lesa i hasi investigashon den nos publikashonnan. Di e manera ei, nos por komprondé i splika e Skritura korektamente. (1 Tim. 4:13-15) Si nos hasi esei, nos lo por usa e Palabra di Dios pa siña otro hende e bèrdat. Esei ta enserá mas ku djis lesa versíkulo  di Beibel pa nos oyentenan. Nos mester yuda nan komprondé loke e versíkulo ta bisa i yuda nan sa kon pa aplik’é den nan bida. Si nos tin kustumber di hasi estudio personal regularmente, nos por mehorá nos abilidat di usa e Palabra di Dios.—2 Tim. 3:16, 17.

13. Di akuerdo ku Hebreonan 5:14, dikon nos mester usa nos kapasidat di komprondé?

¹³ Usa bo kapasidat di komprondé. Un sòldá mester por antisipá peliger i evit’é. Nos tambe mester siña rekonosé situashon ku por hasi nos daño i tuma akshon pa evit’é. (Pro. 22:3; lesa Hebreonan 5:14.) Por ehèmpel, nos mester skohe nos entretenimentu i rekreo bon. Hopi pelíkula i programa di televishon ta pasa kondukta inmoral. E komportashon ei ta ofendé Dios, i tardi òf trempan lo e hasi nos daño. P’esei nos mester hui di kualke entretenimentu ku gradualmente por kaba ku nos amor pa Dios.—Efe. 5:5, 6.

14. Kon Daniel su kapasidat di komprondé a yud’é?

¹⁴ Daniel, menshoná anteriormente, a realisá ku wega di vidio ku tin violensia, spiritismo i kos sobrenatural tabata malu. El a subi riba Biblioteka Watchtower pa buska informashon ku por a yud’é trata ku su problema. Kiko tabata e resultado? El a stòp di hunga wega di vidio inapropiá. El a kanselá su abonamènt pa wega di vidio online, i el a kibra kontakto ku otro hungadó. Daniel a bisa: “Na lugá di hunga wega di vidio mi a kuminsá pasa mas tempu pafó di kas òf hasi algu leuk ku ruman di e kongregashon.” Awor Daniel ta un pionero i un ansiano.

15. Dikon informashon falsu ta peligroso?

¹⁵ Meskos ku Timoteo, nos tambe mester komprondé ku informashon falsu ku apóstata ta plama ta peligroso. (1 Tim. 4:1, 7; 2 Tim. 2:16) Por ehèmpel, nan por plama historia falsu tokante nos rumannan òf lanta duda tokante e organisashon di Yehova. Tipo di informashon falsu asina por suak nos fe. Nos mester tene kuidou pa nan no engañá nos. Dikon? Pasobra e tipo di informashonnan ei ta ser plamá pa “hende ku mente korumpí i sin ningun konosementu di e bèrdat.” Nan  meta ta pa kuminsá “diskushon i debate.” (1 Tim. 6:4, 5) Nan ke pa nos kere nan kalumnia i pa nos deskonfiá nos rumannan.

16. Kiko por distraí nos?

¹⁶ Evitá distraishon. Pa Timoteo por tabata “un bon sòldá di Kristu Hesus,” e mester a enfoká riba su sirbishi. E no por a laga plaka òf otro meta den su bida kita su enfoke. (2 Tim. 2:3, 4) Meskos ku Timoteo, nos no mester permití e deseo di tin kos material distraí nos. “E poder engañoso di rikesa” por stek nos amor pa Yehova i pa su Palabra. E por laga nos pèrdè e deseo di prediká na otro hende. (Mat. 13:22) P’esei, nos mester hiba un bida simpel i usa nos tempu i energia pa ‘sigui buska promé e Reino.’—Mat. 6:22-25, 33.

17-18. Kiko nos por hasi pa protehá nos spiritualidat?

¹⁷ Prepará pa tuma akshon mesora. Un sòldá mester sa adelantá kiko lo e hasi pa protehá su mes. Pa nos protehá loke Yehova a konfia nos kuné, nos mester tuma akshon mesora ora nos mira peliger. Kiko por yuda nos tuma akshon mesora? Nos mester sa adelantá kon nos lo reakshoná na peliger.

¹⁸ Por ehèmpel, den avion stewardess ta pidi tur pasahero pa wak kua ta e salida di emergensia ku ta mas serka di nan. Dikon? Asina ei, si un emergensia surgi nan lo por sali mesora. Di mes manera, nos mester sa adelantá kua “salida” nos lo usa si miéntras ku nos ta wak televishon òf usa Internet diripiente un peliger presentá—un esena inmoral, violensia gráfiko òf informashon apóstata. Si nos ta prepará, nos lo tuma akshon mesora. Asina ei, nos lo protehá nos spiritualidat i nos lo keda limpi den Yehova su bista.—Sal. 101:3; 1 Tim. 4:12.

19. Ki bendishon nos lo tin si nos kuida e kosnan balioso ku Yehova a duna nos?

¹⁹ Nos mester kuida e kosnan balioso ku Yehova a duna nos, esta, e bèrdatnan balioso di Beibel i e privilegio di siña nan na otro hende. Si nos hasi esei nos lo tin un konsenshi limpi, un bida ku tin berdadero nifikashon i e goso di yuda otro hende konosé Yehova. Sin duda, ku yudansa di Yehova, nos por kuida loke a ser konfiá na nos!—1 Tim. 6:12, 19.