Si bo haña bo den un situashon difísil, lo bo ferwagt ku bo bon amigu lo yuda bo. Ku esei na mente, tin hende ta bisa ku pa nan Dios no ta un amigu asina, pasobra e no ta hasi nada pa yuda nan. Pero en realidat, Dios a hasi hopi kos kaba na nos benefisio. I den futuro, lo e hasi algu tambe ku tur problema i sufrimentu ku nos ta enfrentá awe. Kiko Dios lo hasi den futuro?

Dios lo kaba ku tur maldat ora e eliminá e fuente di maldat. Beibel ta identifiká e fuente akí. E ta bisa: “Henter mundu ta den poder di e Malbado.” (1 Huan 5:19) E “Malbado” ei ta e mesun persona ku Hesus a yama “e gobernante di e mundu akí,” esta, Satanas e Diabel. (Huan 12:31) Satanas su influensia ta rais di tur e kosnan malu ku ta pasa ku hende riba tera. Pero kiko Dios lo hasi den futuro?

Pronto, Yehova Dios lo usa su Yu, Hesukristu, pa “kaba ku esun ku tin e medio pa kousa morto, esta, Diabel.” (Hebreonan 2:14; 1 Huan 3:8) De echo, Beibel ta mustra ku Diabel “sa ku a ked’é masha poko tempu” promé ku su destrukshon. (Revelashon 12:12) Ademas, Dios lo destruí tur hende ku ta práktika maldat.​—Salmo 37:9; Proverbionan 2:22.

Despues di kaba ku tur maldat, nos Kreador lo hasi loke ta nesesario pa kumpli ku su propósito pa hende perfekto por biba pa semper den un paradeis riba tera. Kiko nos por spera den futuro?

Pas i siguridat duradero. “E humildenan lo heredá e tera, i lo deleitá nan mes den pas abundante.”​—Salmo 37:11.

Kuminda saludabel na abundansia pa tur hende. “Lo tin abundansia di maishi den e tera, riba kabes di e serunan.”​—Salmo 72:16.

Kas kómodo i trabou satisfaktorio. “Nan lo traha kas i biba den nan; tambe nan lo planta kunukunan di wendrùif i kome nan fruta. . . . Mi skohínan lo disfrutá di e obra di nan mannan pa hopi tempu.”​—Isaías 65:21, 22.

Abo ta deseá di biba den un mundu asina? Pronto tur esei lo bira realidat.

Den nos tempu, hende ta bira malu i ta muri, pero esei lo no sigui asina pa hopi tempu mas. Pronto, danki na Hesus su sakrifisio di reskate, Dios lo sòru pa “tur ku pone fe den dje [Hesus] no bai pèrdí, ma haña bida eterno.” (Huan 3:16) Kiko lo ta e resultado?

Lo no tin malesa mas. “Ningun habitante lo no bisa: ‘Mi ta malu’; e pueblo ku ta biba ayanan lo wòrdu pordoná pa nan inikidat.”​—Isaías 33:24.

Lo no tin morto mas. “E lo traga morto pa semper, i Señor DIOS lo seka awa di wowo for di tur kara.”​—Isaías 25:8.

Hende lo biba pa semper. “E regalo ku Dios ta duna ta bida eterno pa medio di Kristu Hesus, nos Señor.”​—Romanonan 6:23.

Esnan ku a muri lo resusitá. “Lo bai tin un resurekshon di tantu hende hustu komo inhustu.” (Echonan 24:15) Nan lo benefisiá di Dios su regalo, e reskate.

Kon Dios lo kumpli ku tur e promesanan akí?

Dios lo kumpli ku su propósito pa humanidat i tera pa medio di un gobièrnu selestial. Kristu Hesus ta Rei di e gobièrnu akí. (Salmo 110:1, 2) Esaki ta e gobièrnu, òf reino, ku Hesus a siña su siguidónan pa pidi p’e den orashon: “Nos Tata ku ta den shelu, . . . laga bo Reino bini.”​—Mateo 6:9, 10.

E Reino di Dios lo goberná tera i kaba ku tur doló i sufrimentu. Esta un ekselente gobièrnu humanidat lo bai tin! Pa e motibu ei, Hesus a hasi esfuerso pa prediká “e bon notisia di Reino” tempu ku e tabata riba tera, i el a bisa su disipelnan pa hasi meskos.​—Mateo 4:23; 24:14.

Pa motibu di e amor grandi ku Yehova Dios tin pa humanidat, el a primintí di hasi tur e kosnan maravioso akí pa nan. Esei no ta motivá bo pa siña konosé Dios i hala serka dje? Si bo skohe pa siña konosé Dios, ki benefisio lo bo saka? E siguiente artíkulo lo splika esei.