Mas nos haña sa di un persona su kualidatnan, mas mihó nos lo konos’é i mas será nos amistat kuné ta bira. Asina tambe, mas nos haña sa di Yehova su kualidatnan, nos lo por konos’é mihó i mas será nos amistat kuné ta bira. Di tur Dios su kualidatnan maravioso, kuater ta sobresalí: su poder, su sabiduria, su hustisia i su amor.

“Ai Señor DIOS! Mira, ta abo a traha e shelunan i tera pa medio di bo gran poder.”​—YEREMÍAS 32:17.

Nos por mira Dios su poder den kreashon. Por ehèmpel, si bo para un ratu den solo, kiko bo ta sinti riba bo kueru? E kayente di solo, no ta bèrdat? Bon mirá, bo ta sinti e resultado di Yehova su poder di krea. Kon potente solo ta? Den su núkleo, e temperatura ta mas o ménos 15.000.000 grado Celsius. Kada sekònde, solo ta saka mes tantu energia ku e eksploshon di sientos di miónes di bòm nuklear.

Sinembargo, nos solo ta chikitu na komparashon ku e míles di miónes di strea inkontabel den universo. Sientífikonan ta kalkulá ku un di e streanan mas grandi, UY Scuti, su diameter ta alrededor di 1.700 biaha mas grandi ku esun di solo. Si bo pone UY Scuti na lugá di solo, lo e kubri nos planeta kompletamente i pasa Yúpiter bai. Esaki kisas lo yuda bo komprondé mas mihó kiko Yeremías tabata ke men ora el a bisa ku Yehova Dios  a traha shelu i tera, esta, e universo, ku su gran poder.

Kon nos por benefisiá di Dios su poder? Nos bida ta dependé di Dios su kreashon, manera entre otro di solo i tur su otro obranan maravioso den kreashon. Ademas, Dios ta usa su poder pa yuda nos personalmente. Kon asina? Den promé siglo, Dios a duna Hesus poder pa hasi milager. Beibel ta bisa: “Siegu ta mira atrobe, koho ta kana bon, leproso ta kura, surdu ta tende, morto ta lanta.” (Mateo 11:5) Kiko di nos tempu? Wèl, Beibel ta bisa ku “e ta duna forsa na esun kansá.” E ta bisa tambe ku “esnan ku spera riba SEÑOR lo haña forsa renobá.” (Isaías 40:29, 31) Dios por duna “poder ku ta surpasá esun di hende” pa yuda nos enfrentá prueba i problema di bida òf pa sigui perseverá. (2 Korintionan 4:7) Bo no ta sinti bo konmoví pa bira amigu di un Dios ku stima nos asina tantu i ku ta kla pa usa su poder pa yuda nos?

“O SEÑOR, ki numeroso bo obranan ta! Ku sabiduria bo a traha tur.”​—SALMO 104:24.

Mas nos siña tokante Dios su kreashon, mas impreshoná nos lo keda di su sabiduria. De echo, tin un ramo di siensia ku yama biomimétika kaminda e sientífikonan ta studia Yehova su kreashon pa nan kopia algun diseño den naturalesa pa mehorá loke nan a diseñá. Nan diseño por varia di kos chikitu manera velcro te na kos grandi manera avion.

E kurpa humano ta e ehèmpel di mas impreshonante di Dios su sabiduria. Laga nos papia un ratu riba e manera ku un bebi ta desaroyá. E proseso ta kuminsá ku un sèl fertilisá, ku tin tur e instrukshonnan genétiko nesesario. E sèl ei ta dividí den hopi sèl ku ta parse otro. Pero na e momento eksakto, e sèlnan ta kuminsá dividí den sientos di diferente tipo di sèl, manera entre otro, sèl di sanger, sèl di nèrvio i sèl di wesu. No ta dura mashá ku diferente órgano ta forma i ta kuminsá funshoná. Den solamente nuebe luna, ún solo sèl ta desaroyá den un bebi ku ta konsistí di míles di miónes di sèl. E sabiduria ku tin den e diseño ei ta pone hopi hende yega na e mesun konklushon ku sierto eskritor di Beibel, kende a bisa: “Mi ta alabá bo, pasobra mi ta trahá na un manera temerosamente maravioso.”​—Salmo 139:14.

Kon nos por benefisiá di Dios su sabiduria? Nos Kreador sa kiko nos tin mester pa nos por ta felis. I komo ku e tin hopi konosementu i komprondementu, e por duna nos bon konseho mediante Beibel. Por ehèmpel, Beibel ta urgi nos: “Sigui . . . pordoná otro libremente.” (Kolosensenan 3:13) Esei no ta un bon konseho? Sigur ku sí. Investigadónan a ripará ku hende ku ta pordoná otro por drumi mihó i esaki por baha nan preshon. Ademas, nan tin ménos chèns di haña depreshon òf otro problema di salú. Dios ta manera un amigu sabí ku ta interesá den nos i ku nunka ta stòp di duna nos yudansa i bon konseho. (2 Timoteo 3:16, 17) Abo lo no ke tin un amigu asina?

“SEÑOR ta stima hustisia.”​—SALMO 37:28.

Dios semper ta hasi loke ta korekto. Beibel ta bisa: “Leu sea di Dios di hasi maldat, i di e Todopoderoso di kometé inikidat.” (Yòb 34:10) Semper e ta husga ku hustisia, manera e salmista a bisa: “Abo lo husga e pueblonan ku rektitut.” (Salmo 67:4) Komo ku Yehova “ta wak kurason,” e no ta laga su mes ser engañá pa aparensia; e sa kiko ta bèrdat i ta husga ku hustisia. (1 Samuel 16:7) Ademas, Dios sa di tur inhustisia i korupshon ku ta tuma lugá aki riba tera, i el a primintí ku pronto “e malbadonan lo wòrdu kòrtá kitá for di tera.”​—Proverbionan 2:22.

Sinembargo, esei no ke men ku Dios ta un hues kruel ku ta kla pa kastigá hende. E ta mustra miserikòrdia ora ta apropiá. Beibel ta bisa: “SEÑOR ta yen di kompashon i grasia”; e ta mustra kompashon asta na e malbadonan ku arepentí di kurason. Bo no ta haña ku esei ta berdadero hustisia?​—Salmo 103:8; 2 Pedro 3:9.

Kon nos por benefisiá di Dios su hustisia? Apòstel Pedro a bisa: “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.” (Echonan 10:34, 35) Nos por benefisiá di Dios su hustisia pasobra nunka e no ta mustra faboritismo ni hasi distinshon di persona. Nos por haña su aprobashon i bira su adoradónan sin importá nos rasa, nashonalidat, edukashon òf posishon sosial.

Debí ku Yehova ke pa nos komprondé i benefisiá di su hustisia, el a duna nos un konsenshi. Beibel ta deskribí nos konsenshi komo un lei “skirbí den [nos] kurason” ku ta bisa nos si loke nos ta hasi ta bon òf malu. (Romanonan 2:15) Kon nos por benefisiá di esei? Si nos konsenshi ta bon entrená, e por motivá nos pa evitá di hasi loke ta malu òf inhustu. Anto si nos kometé un eror, nos  konsenshi por motivá nos pa arepentí i stòp di hasi loke ta malu. Sí, bon komprondementu di Dios su sentido di hustisia ta yuda nos hala serka dje.

“Dios ta amor.”—1 HUAN 4:8.

Beibel ta bisa ku Dios tin poder, sabiduria òf hustisia, pero Beibel no ta bisa ku Dios ta poder, sabiduria òf hustisia. Loke Beibel ta bisa sí ta ku Dios ta amor. Dikon? Pasobra pa motibu di su poder e por aktua, i su hustisia i sabiduria ta guia su echonan. Pero Yehova su amor ta motiv’é pa aktua. Tur loke e ta hasi, e ta hasi ku amor.

Aunke Yehova no tabata falta nada, su amor a motiv’é pa krea kriatura inteligente, tantu den shelu komo riba tera. I nan tur por benefisiá di su amor i kuido. Generosamente el a prepará e planeta Tera komo un hogar ideal pa su kreashon humano. I e ta sigui mustra amor na tur hende, pasobra “e ta laga su solo sali riba mal hende i bon hende i ta laga awa kai riba hende hustu i inhustu.”​—Mateo 5:45.

Ademas, “Yehova tin masha kariño, kompashon i miserikòrdia.” (Santiago 5:11) E ta mustra kariño na tur hende ku sinseramente ta hasi esfuerso pa siña konos’é i pa hala serka dje. E ta presta atenshon na nan individualmente. Es mas, Beibel ta bisa: “E ta interesá den boso.”​—1 Pedro 5:7.

Kon nos por benefisiá di Dios su amor? Nos ta disfrutá di un bunita bahada di solo. Nos ta sinti alegria ora nos tende un bebi hari. I nos ta apresiá masha hopi e amor ku nos famia tin pa nos. Kisas ningun di e kosnan akí ta indispensabel pa nos biba, pero nan ta enrikesé nos bida inmensamente sí.

Nos ta benefisiá tambe di un otro muestra di Dios su amor: orashon. Beibel ta konsehá nos: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.” Meskos ku un tata amoroso, Yehova ta deseá pa nos kont’é tur nos preokupashonnan. Si nos hasi esei, e ta primintí di duna nos generosamente e pas “ku ta surpasá tur komprondementu.”​—Filipensenan 4:6, 7.

Den e artíkulo akí, nos a papia brevemente riba e kualidatnan prinsipal di Dios: su poder, su sabiduria, su hustisia i su amor. Bo ta haña ku e kualidatnan akí a yuda bo konosé Dios mihó? Si bo ke konosé Dios mihó ainda, nos ta animá bo pa sigui lesa pa bo haña sa kiko Dios a hasi kaba pa bo i kiko lo e hasi pa bo den futuro.