Tin algun kos ku kasi tur hende ta di akuerdo ku ta bon, i algun kos ku kasi tur hende ta di akuerdo ku ta malu. Por ehèmpel, kasi tur hende ta di akuerdo ku asesinato, violashon i abusu seksual di mucha ta malu. Anto hopi hende ta pensa ku ta bon ora un persona ta hustu i amabel i ta mustra empatia. Pero, kiko di desishon manera ken pa tene relashon seksual kuné, si nos lo ta onesto òf nò òf kon pa lanta yu? Hopi hende ta pensa ku no tin un bon òf mal desishon ora ta trata di e kosnan ei. Nan ta pensa ku kasi tur desishon relashoná ku e kosnan ei ta aseptabel. Hopi bes, hende ta tuma desishon a base di kon nan ta sinti i kon hende rònt di nan ta sinti tokante un asuntu. Esei semper ta un bon idea?

Hopi bes nos ta tuma desishon basá riba nos konsenshi, esta loke nos ta sinti ku ta bon òf malu. (Romanonan 2:​14, 15) Asta mucha chikitu por ripará ora algu ta inhustu, i nan ta sinti nan kulpabel ora nan hasi algu malu. Segun ku nos ta krese, loke nos ta siña for di nos famia, amigunan, maestronan, komunidat, religion i kultura por influensiá nos konsenshi. Ora nos tuma desishon, nos konsenshi ta laga nos sa si nos desishon ta di akuerdo ku loke nos a siña ku ta bon òf malu.

Loke nos ta pensa ku ta bon òf malu por motivá nos pa mustra empatia, gratitut i kompashon na hende i pa trata nan na un manera hustu. Ademas, e por yuda nos pa no hasi kos ku lo hùrt hende ku nos ta stima òf pa hasi kos ku lo pone nos pasa bèrgwensa òf sinti nos kulpabel.

E manera ku nos ta sinti semper ta un bon guia? Ora Garrick tabata yòn, el a skohe pa biba manera e tabata ke. El a bisa: “Mi por a hasi loke sea mi tabata ke.” Sinembargo, el a realisá ku hasi loke e tabata sinti ku tabata bon no a duna bon resultado. El a hiba un bida ku despues el a deskribí komo  “un bida infelis, pasobra su bida tabata drei rònt di inmoralidat, droga, bebementu di mas i violensia.”

Hopi bes nos desishonnan no ta basá riba nos mes sintimentu so sino tambe riba kon otro hende ta sinti tokante nos desishonnan. Ora nos ta tene kuenta ku loke otro hende ta pensa, nos ta benefisiá di nan eksperensia i sabiduria. Nos ta gana rèspèt di nos famia, amigunan i di hende den nos komunidat ora nos hasi loke nan ta pensa ta bon.

E manera ku otro hende ta sinti semper ta un bon guia? Komo hóben, Priskila a hasi loke su amiganan tabata hasi, i e tabata tene relashon seksual promé ku el a kasa. Pero, el a bin realisá ku aunke e tabata hasi loke otro hende tabata pensa ku ta bon, e no tabata felis. El a bisa: “Ora mi tabata hasi loke tur otro hende tabata hasi, mi no tabata sinti mi bon. Esei a pone mi hasi kos ku no tabata sabí, i mi a tuma yen di rísiko.”

Ora nos tin ku disidí loke ta bon i loke ta malu, nos mes sintimentu i sintimentu di otro hende ta importante. Pero, esei riba su mes no semper lo duna bon resultado. Tin biaha, nos desishonnan por kousa daño na nos mes òf na otro hende pasobra nos no ta mira kiko lo ta e konsekuensianan di nos desishonnan. (Proverbionan 14:12) Anto asta ora nos i otro hende ta pensa ku algu ta bon, tòg e por kousa daño òf hende su opinion por kambia. De echo, algun kos ku ántes hende tabata mira komo malu awor ta ser aseptá, i kos ku ántes hende tabata aseptá awor ta ser mirá komo algu malu.

Tin un mihó guia ku por yuda nos disidí loke ta bon i loke ta malu? Tin un guia awe ku por yuda nos tuma desishon ku nos lo no lamentá atraves di tempu?

Nos tin un guia konfiabel ku por yuda nos tuma desishon ku ta funshoná pa tur hende tur kaminda. E siguiente artíkulo lo yuda nos mira unda nos por haña un guia konfiabel ku por yuda nos disidí loke ta bon i loke ta malu.