Pa María, Raúl, Arne i hopi otro hende, orashon ta un regalo masha spesial. Nan ta sinti ku ora nan ta hasi orashon, nan por papia ku Dios, gradisié i pidié pa yudansa. Nan ta konvensí di loke e siguiente teksto di Beibel ta bisa: “Esaki ta e konfiansa ku nos tin den Dios: kiko ku nos pidié ku ta di akuerdo ku su boluntat, e ta tende nos.”​—1 Huan 5:14.

Pero tin hopi otro hende ku no ta kere loke Beibel ta bisa tokante orashon. Steve a konta kiko e tabata pensa di orashon: “Ora mi a hasi 17 aña, un amiga i dos amigu di mi a muri. Un a muri den un aksidente di outo, i e otro dosnan a hoga na laman.” Kiko Steve a hasi? “Mi a puntra Dios den orashon ta dikon tur  esei a sosodé, pero mi no a haña kontesta. P’esei, mi a puntra mi mes: Pakiko mi tin ku hasi orashon?” Hopi hende ta sinti ku nan no a haña kontesta pa nan orashonnan, p’esei, nan ta puntra nan mes si ta bale la pena pa sigui hasi orashon.

Tin hende ku tin otro motibu pakiko nan ta pensa ku no ta bale la pena pa hasi orashon. Nan ta bisa ku Dios sa kaba kiko tur nos tin mester i ki problema nos tin, p’esei nos no tin nodi bisa Dios tur e kosnan ei.

Otro hende ta kere ku Dios no ke skucha nan orashonnan debí na e pikánan ku nan a hasi den pasado. Jenny a bisa: “Mi problema di mas grandi ta ku mi ta sinti ku mi no ta bal nada. Mi a hasi kos masha malu, i mi a konvensé mi mes ku mi no ta meresé pa Dios skucha mi.”

Kiko bo ta pensa di orashon? Si abo tin preokupashon i duda similar tokante orashon, ta bon pa sa ku Beibel por duna bo kontesta satisfaktorio pa bo preguntanan. Nos por konfia loke Beibel ta bisa tokante orashon; * Beibel por yuda bo haña kontesta pa e siguiente preguntanan:

• Di bèrdat Dios ta skucha bo orashonnan?

• Dikon Dios no ta kontestá tur orashon?

• Kon bo tin ku hasi orashon pa Dios skucha bo?

• Kon orashon por yuda bo?