Den un sentido, nos tur lo eksperensiá un “tormenta” grandi, loke Hesus a yama un “tribulashon grandi.” (Mateo 24:21) I aunke nos no por skapa e tormenta akí, loke sí nos por hasi ta buska refugio. Kon?

Den Hesus su Sermon Riba Seru, Hesus a konsehá: “Sigui buska anto promé e Reino i e hustisia di Dios.” (Mateo 6:33) Kon nos por hasi esei?

Buska promé e Reino di Dios. Esei ke men ku nos mester mira e Reino di Dios komo e kos di mas importante den nos bida. (Mateo 6:25, 32, 33) Dikon nos mester tin e punto di bista ei? Pasobra hende simplemente no por resolvé e problemanan di humanidat. Ta e Reino di Dios so por logra e tarea difísil ei.

Buska e hustisia di Dios. Purba di hasi esfuerso pa sigui Dios su leinan i prinsipionan. Dikon? Pasobra si nos disidí pa nos mes kiko ta bon i kiko ta malu, e resultado lo ta desastroso. (Proverbionan 16:25) Pero si nos ta biba segun Dios su normanan, nos lo hasi Dios felis i nos mes tambe lo ta mas felis.—Isaías 48:17, 18.

Sigui buska promé e Reino i e hustisia di Dios. Hesus a atvertí ku algun hende lo ser distraí, pensando ku si nan haña hopi plaka, nan lo tin siguridat. Otro hende kisas ta dediká  asina tantu tempu na resolvé nan problemanan ku nan no tin tempu pa buska e Reino di Dios.—Mateo 6:19-21, 25-32.

Sinembargo, Hesus a primintí ku hende ku ta apoyá e Reino di Dios lo haña loke nan tin mester awor i risibí bendishon pa semper den futuro.—Mateo 6:33.

Aunke Hesus su disipelnan den promé siglo a buska e Reino i e hustisia di Dios promé, nan no a wak e fin di tur doló i sufrimentu den nan tempu. Pero loke sí nan a haña ta protekshon. Kon asina?

Nan a biba segun Dios su normanan hustu, i p’esei nan no tabatin e problemanan ku e hendenan ku no a obedesé Dios tabatin. Nan fe fuerte ku e Reino lo bini a yuda nan enfrentá asta problema masha difísil. I Dios a duna nan “e poder ku ta surpasá esun di hende” pa trata ku e problemanan ei.—2 Korintionan 4:7-9.

E kristiannan di promé siglo a sigui Hesus su mandato pa buska e Reino di Dios promé i nan a prediká e bon notisia di Reino den e área kaminda nan tabata biba. (Kolosensenan 1:23) Tin hende ku ta prediká e bon notisia den nos tempu?

Sí! Testigunan di Yehova sa ku pronto e Reino di Dios lo pone un fin na e mundu malbado akí. P’esei, nan ta hasi tur loke nan por pa kumpli ku e palabranan di Hesus: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—Mateo 24:14.

Kiko abo lo hasi ora bo tende e bon notisia di Reino? Nos ta enkurashá bo pa imitá e habitantenan di promé siglo di Berea, un stat na Masedonia. Ora nan a tende e bon notisia di e Reino for di Apòstel Pablo, “nan tabata masha ansioso pa aseptá” e mensahe. Despues, nan “tabata analisá e Skritura [bon]” pa hasi sigur ku e mensahe ku Apòstel Pablo a duna nan tabata realmente den Beibel i nan a pone na práktika loke nan a siña.—Echonan 17:11, 12.

Abo por hasi meskos. Si bo buska e Reino i e hustisia di Dios promé, lo bo haña protekshon for di awor i disfrutá di pas i siguridat pa semper den futuro.