Pronto Dios su gobièrnu lo kuminsá goberná riba tera. E ora ei, tur hende riba tera lo ta felis, lo ta na pas ku otro i lo disfrutá di nan trabou. Dios a skohe Hesukristu pa goberná tera. Kontrali na e gobernantenan ku nos konosé awendia, Hesus sí ta interesá den hende i ke hasi lo mihó pa nan. Lo e goberná ku amor i lo e ta un rei ku ta bondadoso, miserikòrdioso i hustu.—Isaías 11:4.

Ni nashonalidat ni rasa lo no dividí hende pasobra henter humanidat lo ta un pueblo uní. (Revelashon 7:9, 10) Tur hende riba tera lo stima Dios i stima nan próhimo. I nan lo traha huntu pa kumpli ku Dios su propósito original di kuida nan hogar, esta, e tera.—Salmo 115:16.

Ora Dios su Reino ta goberná tera, Dios lo sòru pa e klima ta den balansa perfekto. (Salmo 24:1, 2) Ora Hesus tabata riba tera, el a kalma un tormenta masha peligroso. Asina ei el a mustra kiko e por hasi ku e poder ku Dios a dun’é. (Marko 4:39, 41) Pues, ora nos ta bou di Kristu su gobernashon, nos lo no mester tin miedu di desasternan natural. Es mas, Dios su Reino lo restorá e armonia entre naturalesa i hende.—Oséas 2:18.

Tur hende lo tin salú perfekto. Niun hende lo no bira malu, bira bieu ni muri. (Isaías 35:5, 6) Tur hende lo disfrutá di un medio ambiente bunita i limpi, meskos ku esun ku e promé hendenan tabatin den e hòfi di Eden. Den e mundu nobo, meskos ku den e hòfi di Eden, tera lo produsí kuminda na abundansia i tur hende lo tin sufisiente kuminda. (Génesis 2:9) Tur hende den Paradeis lo “kome barika yen,” meskos ku Dios su nashon di Israel den pasado.—Levítiko 26:4, 5.

Bou di Dios su gobièrnu mundial, tur hende lo ta na pas ku otro i lo trata otro na un manera bondadoso i hustu. Lo no tin guera ni mal uso di poder, i tur hende lo tin loke nan mester pa biba. Beibel ta primintí: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Mikéas 4:3, 4.

Tur famia lo tin nan propio kas, nan lo no tin miedu ku un dia nan lo pèrd’é. Ademas, nan lo tin trabou ku lo duna nan goso. Manera Beibel ta bisa, esnan ku ta biba den Dios su mundu nobo “lo no traha en bano.”—Isaías 65:21-23.

Beibel ta primintí: “Tera lo ta yen di e konosementu di SEÑOR.” (Isaías 11:9) Hende lo siña for di nan Kreador, Yehova, kende su konosementu no tin límite. Nan lo siña tambe tokante tur e kosnan bunita ku el a krea. Nan lo no usa nan konosementu pa traha arma òf pa hasi otro hende daño. (Isaías 2:4) En bes di esei, nan lo siña pa biba na pas ku otro hende i pa kuida nos planeta.—Salmo 37:11.

Dios ke pa hende biba riba tera pa semper. P’esei, el a tuma su tempu pa prepará tera di manera ku tur dia nos por disfrutá plenamente di bida. (Salmo 37:29; Isaías 45:18) Pa hasi esei posibel, Dios lo “traga morto pa semper.” (Isaías 25:8) Beibel ta primintí: “Lo no tin morto mas; ni tristesa ni sklamashon ni doló lo no tin mas.” (Revelashon 21:4) Dios lo duna tur hende e oportunidat pa biba pa semper. Esei ta pa tantu esnan ku sobrebibí e fin, komo pa esnan ku resusitá den e mundu nobo.—Huan 5:28, 29; Echonan 24:15.

 Ya kaba tin miónes di hende ta preparando pa biba den Dios su mundu nobo. Aunke nan ta imperfekto, nan ta purbando di ta e tipo di persona ku Dios lo ke den e mundu ei. Kon nan ta hasi esei? Siñando tokante Yehova Dios i esun ku el a manda, Hesukristu.—Huan 17:3.

Haña sa mas tokante kon bo por sobrebibí e fin di mundu anto biba den un mihó mundu ku ta asina serka. Aseptá un kurso di Beibel interaktivo grátis for di un Testigu di Yehova usando e buki Bo Por Disfrutá di Bida pa Semper!