E promé 60 minüt di e bida di un bebi pafó di barika di su mama ta un periodo di ahuste hopi krusial pa e bebi. Dikon? Pasobra mamanan ku forma un laso ku nan yu resien nasí durante e periodo krusial akí ta mehorá kresementu i desaroyo di nan yu masha hopi mes. *

Kiko ta pone un mama kuida su bebi resien nasí ku hopi amor? Profesor Jeannette Crenshaw ta splika den The Journal of Perinatal Education ku e nivel haltu di e hormona ku yama oksitosina “ta stimulá sintimentunan materno despues di parto ora e mama mishi, wak i kria su yu resien nasí na pechu.” Un otro hormona ku e mama ta produsí na e momento ei “ta yuda un mama pa forma un relashon ku su bebi” i ta fortalesé e relashon ei. Dikon esei ta asina importante?

Ta nos amoroso Kreador, Yehova Dios, * a krea e laso íntimo entre un mama ku su bebi. Rei David a bisa ku ta Dios a sak’é “for di barika di [su] mama” i a pon’é sintié sigur den brasa di su mama. El a resa: “For di mi nasementu mi a wòrdu entregá na bo; for di den barika di mi mama bo tabata mi Dios.”—Salmo 22:9, 10.

ALGU PA PENSA ARIBA: Si Dios a krea un sistema asina kompliká pa hasi sigur ku un mama humano lo ta pendiente di e nesesidatnan di su yuchi i satisfasé esakinan ku hopi amor, no ta lógiko ku Dios lo mustra interes den kada un di nos ku ta “desendiente di Dios”?—Echonan 17:29.

Hesukristu, kende konosé e Kreador mas mihó ku tur hende, a siña nos: “No ta pa un sèn pretu nan ta bende dos mòfi? Sinembargo, ni ún di nan lo no kai na suela sin ku boso Tata sa. Pa loke ta boso, el a konta asta e drachinan di kabei riba boso kabes. Pues, no tene miedu: boso ta bal mas ku hopi mòfi.”—Mateo 10:29-31.

Masha poko di nos ta presta atenshon na kada para ku nos mira, te pa nos ripará ki ora un di nan ta kai na suela. Pero nos Tata selestial si sa ora kada un di nan ta kai. I den Dios su bista un hende ta bal mas ku un para, te asta mas ku hopi para.  Pues, e lès ku nos ta siña ta masha kla: Bo por tin sigur ku Dios ta interesá den loke bo ta pasando aden. No “tene miedu,” e ta sumamente interesá den bo!

Beibel ta sigurá nos:

• “E wowonan di SEÑOR ta tur kaminda, vigilando malu i bon.”—PROVERBIONAN 15:3.

• “E wowonan di SEÑOR ta riba e hustunan, i su oreanan ta atento pa skucha nan sklamashon.”—SALMO 34:15.

• “Lo mi regosihá i keda kontentu den bo miserikòrdia, pasobra bo a mira mi aflikshon; bo tabata sa di e angustianan di mi alma.”—SALMO 31:7.

Si nos sa ku Dios ta hopi interesá den nos bienestar i ta kuida nos ku yen di amor, esei lo hasi un diferensia den nos bida? Sigur ku sí, manera Hannah, * di Inglatera, ta splika:

“Masha hopi biaha mi tabata pensa ku Yehova no ta stima mi i ku e no ta kontestá mi orashonnan pasobra mi tabata falta fe. Mi tabata pensa ku Dios ta kastigá mi i no ta wòri ku mi pasobra mi no ta importante. Mi tabata sinti ku Dios no ta interesá den mi.”

Pero awor sí Hannah no ta duda mas ku Yehova ta pendiente di dje i ta stim’é. Dikon su punto di bista a kambia? Hannah a splika: “Mi no a kambia djawe pa mañan. Mi ta kòrda ku hopi tempu pasá un diskurso di Beibel tokante e sakrifisio di reskate di Hesus a hasi un impakto grandi riba mi. E diskurso a konvensé mi ku Yehova ta stima mi. I ora mi orashonnan a ser kontestá, hopi biaha mi tabata yora pasobra mi por a mira ku Yehova ta stima mi. Ademas, mi estudio di Beibel i e reunionnan kristian a siña mi mas tokante Yehova, su personalidat i kiko e ta sinti pa nos. Awor mi ta mira bon kla ku Yehova ta sostené nos i stima nos tur i ku e ta deseá mashá pa kuida kada un di nos.”

Loke Hannah a bisa ta hopi animante. Pero kon bo por tin sigur ku Dios ta komprondé nos i ku nos sintimentunan ta importante p’e? E siguiente artíkulo lo kontestá e pregunta ei.