Kon Nos Por Mustra Amor na Nos Próhimo?
Komo ku nos tur ta desendiente di e promé hòmber, Adam, nos tur ta famia. Aunke miembro di famia mester stima i respetá otro, esei no ta loke nos ta mira awe. Nos Dios amoroso no ta kontentu ku hende ta sin amor.
KIKO E SANTU SKRITURA TA BISA TOKANTE AMOR?
“Stima bo próhimo manera bo mes.”—LEVÍTIKO 19:18.
“Sigui stima boso enemigunan.”—MATEO 5:44.
KIKO STIMA BO PRÓHIMO TA NIFIKÁ?
Tuma nota kon Dios ta deskribí amor den su Palabra na 1 Korintionan 13:4-7:
“Amor tin pasenshi i ta bondadoso.”
Pensa riba esaki: Kon bo ta sinti ora hende ta trata bo ku pasenshi i bondat, i no ta rabia ora bo hasi fout?
“Amor no ta yalurs.”
Pensa riba esaki: Kon bo ta sinti ora hende ta deskonfiá bo òf ta yalurs riba bo?
Amor “no ta buska su mes interes.”
Pensa riba esaki: Kon bo ta sinti ora hende ta respetá bo punto di bista en bes di insistí semper riba nan propio opinion?
Amor “no ta keda kòrda e malu ku hende a hasié.”
Pensa riba esaki: Dios ta dispuesto pa pordoná hende ku a peka, pero ku a arepentí di nan piká. “E n’ ta sigui akusá bo ketu bai, E n’ ta keda rabiá.” (Salmo 103:9, BPK) Nos ta keda kontentu ora un hende ku nos a ofendé ta pordoná nos. P’esei, nos tambe mester ta kla pa pordoná ora hende ofendé nos.—Salmo 86:5.
Amor “no ta alegrá ku inhustisia.”
Pensa riba esaki: Nos no lo gusta pa hende alegrá ora algu malu pasa ku nos. P’esei, nos tampoko no mester alegrá ora algu malu sosodé ku otro hende, ni maske nan a yega di trata nos malu.
Pa nos haña Dios su bendishon, nos mester stima nos próhimo sin importá nan edat, nashonalidat òf religion. Un manera práktiko ku nos por mustra amor ta ora nos yuda hende den nesesidat.
Otro Artíkulo Interesante
SPIÈRTA!
E Kaminda Ku Ta Hiba na Felisidat—Amor
Pa nos por ta felis, ta hopi importante pa nos stima otro hende i pa otro hende stima nos.
