Beibel ta bisa: “Tur don ku ta bon i tur regalo perfekto ta bini djariba; pues, nan ta baha for di e Tata di e lusnan selestial.” (Santiago 1:17) Klaru, e teksto ei ta referí na e generosidat di nos Tata selestial, Yehova Dios. Pero di tur e regalonan ku Dios a duna hende, tin un regalo ku ta esun di mas mihó ku tur. Kiko e ta? E famoso palabranan di Hesus na Huan 3:16 ta bisa nos: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”

Dios a duna nos su Yu unigénito, i esei ta e mihó regalo ku nos por haña, komo ku e regalo ei ta libra nos for di piká, behes i morto. (Salmo 51:5; Huan 8:34) Ni maske kuantu esfuerso nos hasi, no tin nada ku nos por hasi pa libra nos mes di e kosnan ei. Pero komo ku Dios ta stima nos, el a duna nos loke nos mester pa nos por ser librá. Ora Yehova Dios a duna nos su Yu unigénito, Hesukristu, komo e reskate, El a duna hende ku ta obedes’é e speransa pa biba pa semper. Pero kiko e reskate ta? Dikon e ta nesesario? I kon nos por benefisiá di dje?

Na promé lugá, un reskate ta un preis ku ta ser pagá pa kumpra algu bèk òf pa libra un hende. Beibel ta splika ku Dios a krea nos promé mayornan, Adam ku Eva, perfekto, i nan tabatin e speransa di biba pa semper den un paradeis riba tera huntu ku e desendientenan ku nan lo a haña. (Génesis 1:26-28) Lamentablemente, nan a pèrdè tur esei ora nan a desobedesé Dios i a bira pekadó. Kiko tabata e resultado? Beibel ta kontestá: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) Pues, en bes di e hende ei, esta, Adam, duna su desendientenan un bida perfekto, el a pasa piká pa nan i komo konsekuensia nan tur ta muri.

Ta asina ku den kaso di un reskate, e preis ku mester ser pagá mester tin mesun balor ku loke a bai pèrdí. Ora Adam a disidí di desobedesé Dios, el a peka i e bida perfekto di Adam a bai pèrdí. Segun Beibel, esei ta loke a pone su desendientenan bira esklabo di piká i morto. Pa nan por ser librá di e kosnan ei, un otro hende perfekto, esta, Hesus, mester a duna su bida komo sakrifisio pa libra nan. (Romanonan 5:19; Efesionan 1:7) Ta solamente pasobra Dios a demostrá amor i a paga e reskate, hende por tin e speransa di gosa di loke Adam ku Eva a pèrdè, esta, bida pa semper den paradeis riba tera.—Revelashon 21:3-5.

En bista di loke e reskate lo logra, no tin duda ku e regalo ku Dios a duna nos, ku ta hasi bida eterno posibel, ta e mihó regalo ku nos por haña. Pa nos por komprondé dikon e ta e “regalo perfekto,” ban wak den ki manera eksepshonal e ta kuadra ku e faktornan, menshoná den e artíkulo anterior, ku por yuda nos duna un bon regalo.

E regalo ta satisfasé nos deseo. Komo hende, di naturalesa nos tin un deseo fuerte pa biba pa semper. (Eklesiástes 3:11) Aunke riba nos mes nos no por satisfasé e deseo ei, e reskate sí ta hasi posibel pa nos biba pa semper. Beibel ta bisa: “E salario ku piká ta paga ta morto, ma e regalo ku Dios ta duna ta bida eterno pa medio di Kristu Hesus, nos Señor.”—Romanonan 6:23.

E regalo ta satisfasé nos nesesidat. Ningun hende no por a paga e reskate. Beibel ta splika: “E redenshon di su alma ta kostoso; e lo no por paga p’e nunka.” (Salmo 49:8) P’esei, nos tabatin mester di yudansa urgente pa Dios libra nos  for di e gara di piká i morto. “Pa medio di e liberashon ku ta basá riba e reskate ku Kristu Hesus a paga,” Dios a duna nos loke nos tabatin mester.—Romanonan 3:23, 24.

Dios a duna nos e regalo na e momento apropiá. Beibel ta bisa nos: “Kristu a muri pa nos miéntras ku nos tabata pekadó ainda.” (Romanonan 5:8) E echo ku Dios a paga e reskate pa nos ora “ku nos tabata pekadó ainda” ta mustra kuantu Dios ta stima nos aunke ku nos ta imperfekto. I aunke nos mester sufri e konsekuensianan di piká, e reskate ta hasi nos ansioso pa loke ta bai bini den futuro.

Dios a duna nos e regalo ku un motibu noble i generoso. Kiko a motivá Dios pa ofresé su yu komo un reskate? Beibel ta bisa nos: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje. E amor ei ta nifiká esaki: no ta nos a stima Dios, sino ta é a stima nos.”—1 Huan 4:9, 10.

Kon abo por demostrá ku bo ta apresiá e mihó regalo ku ta eksistí? Kòrda ku segun Hesus su palabranan na Huan 3:16, ta solamente hende ku “pone fe den dje” lo ser salbá. Segun Beibel, fe ta “e konfiansa firme ku hende tin ku loke nan ta spera ariba lo keda realisá.” (Hebreonan 11:1) Pa nos por tin e konfiansa firme akí, nos mester tin konosementu eksakto. Pa e motibu akí, nos ta animá bo pa tuma tempu i siña tokante Yehova Dios, kende a duna e “regalo perfekto,” i pa siña kiko bo mester hasi pa bo por gosa di bida eterno ku e sakrifisio di reskate di Hesus a hasi posibel pa bo.

Bo por siña mas tokante e tópiko akí ora bo analisá informashon basá riba Beibel ku ta disponibel online riba www.dan124.com. Testigunan di Yehova gustosamente lo yuda bo ku esei. Nos tin sigur ku segun ku bo ta siña tokante e benefisionan di e regalo akí, lo bo sinti bo motivá pa bisa: “Mi ta gradisí Dios ku lo e hasi esaki pa medio di Hesukristu, nos Señor!”—Romanonan 7:25.