Don ku Margaret * a keda masha kontentu ku e bishita di nan yu muhé ku su famia. Pa e último biaha ku nan mester a kome huntu, Margaret, kende tabata un kòki profeshonal ku a baha ku penshon, a prepará makaroni ku keshi, un di e platonan faborito di su dos ñetunan.

Despues ku tur hende tabata na mesa, Margaret a trese e plato prinsipal i a pon’é riba mesa. Ora el a habri e tapa di e wea, pa su sorpresa, ta sous di keshi so tabatin den e wea. El a lubidá di agregá e ingrediente prinsipal, esta, makaroni. *

Nos tur, sin importá nos edat òf eksperensia, ta hasi fout. Kisas nos a papia algu sin pensa òf a hasi algu bon pero na e momento robes òf kisas nos a lubidá algu. Dikon nos ta hasi fout? Kiko nos por hasi ora nos faya? Nos por evitá fayo? Loke por yuda nos kontestá e preguntanan akí ta ora nos tin un punto di bista korekto di nos fayonan.

Ora nos hasi algu bon, gustosamente nos ta aseptá e elogio i rekonosementu ku nos ta haña ku nos meresé. Ora nos kometé un fayo, asta si nos no por a yuda òf si hende no a ripar’é, nos ta aseptá ku nos a faya? Nos mester ta humilde pa hasi esei.

Si nos ta kere ku nos ta masha kos, kisas nos ta purba di minimisá nos fout, tira falta riba otro hende òf asta nenga ku nos a faya. Esei hopi biaha ta trese su konsekuensianan. E problema no ta haña solushon i otro hende ta haña falta inhustamente. Asta si aworakí nos logra skapa di e konsekuensianan, nos mester tene na mente ku al final, “kada un di nos lo duna kuenta i rason na Dios pa nos akshonnan.”—Romanonan 14:12.

Dios tin un punto di bista realístiko di nos fayonan. E buki di Salmo ta bisa ku Dios ta “yen di kompashon i grasia” i “e lo no reprendé pa semper, ni keda rabiá pa semper.” E sa ku nos ta imperfekto i ta komprondé nos debilidatnan, i e ta “kòrda ku ta stòf nos ta.”—Salmo 103:8, 9, 14.

Ademas, meskos ku un tata yen di miserikòrdia, Dios ke pa nos, su yunan, mira nos fayonan manera é ta mira nan. (Salmo 130:3) Su Palabra ta duna nos hopi konseho pa yuda nos trata ku nos mes fayonan òf ku fayo di otro hende.

Ora hende faya, hopi biaha nan ta gasta hopi tempu i energia na kulpa otro hende òf hustifiká loke nan a bisa òf hasi. En bes di esei, ora bo hùrt un hende ku loke bo a bisa, ta mihó bo djis pidi despensa, drecha e asuntu i asina mantené bo amistat ku e persona. Bo a hasi algu robes ku a perhudiká bo mes òf otro hende? En bes di rabia ku bo mes òf akusá otro hende, purba di drecha e asuntu. Si bo keda insistí ku ta otro hende tin falta, esei lo trese mas tenshon i e problema lo  bira pió. Mas bien, siña di bo fout, korigí esei i sigui padilanti.

Di otro banda, ora un otro hende hasi un fout, ta masha fásil pa nos reakshoná na un manera ku ta mustra ku nos no a keda kontentu. Ta muchu mas mihó pa nos sigui e konseho di Hesukristu, kende a bisa: “Tur loke boso ke pa hende hasi ku boso, boso tambe mester hasi ku nan.” (Mateo 7:12) Ora bo kometé un fayo, pa chikitu ku e por parse, sin duda lo bo ke pa otro hende tin kompashon ku bo òf asta pasa por alto di bo fayo. Pues pakiko no hasi esfuerso pa mustra e mesun bondat ei na otro hende?—Efesionan 4:32.

Segun un dikshonario, nos ta hasi fout pasobra “nos a yega na un konklushon robes, nos falta informashon òf nos no a presta bon atenshon.” Nos tin ku atmití ku na dado momento, nos tur ta faya pa un òf mas di e motibunan ei. Sinembargo, ora nos analisá algun prinsipio fundamental di e Skritura, nos lo kometé ménos fayo.

Nos ta haña un di e prinsipionan ei na Proverbionan 18:13, ku ta bisa: “Esun ku respondé promé ku e skucha, esei ta bobedat i bèrgwensa p’e.” Pues si bo tuma un ratu mas pa skucha e detayenan i pensa kiko lo bo respondé, esei lo evitá ku bo ta bisa algu sin pensa òf reakshoná na un manera impulsivo. E informashon ku bo ta haña ora bo presta bon atenshon ta masha importante pa yuda bo evitá di yega na un konklushon robes, i asina bo ta evitá di kometé un fayo.

Un otro prinsipio di Beibel ta bisa: “Si ta posibel, te asina leu ku ta dependé di boso, keda na pas ku tur hende.” (Romanonan 12:18) Pues hasi bo esfuerso pa promové pas i union. Ora bo ta traha ku otro hende, mustra konsiderashon i rèspèt i hasi esfuerso pa elogiá i animá nan. Den un ambiente asina, ta mas fásil pa pasa por alto di palabranan papiá sin pensa òf akshonnan deskabeyá. I asta e fayonan mas grave por ser resolvé na un manera amigabel.

Ademas, purba di siña for di e fayonan ku bo a kometé. En bes di buska èksküs pa loke bo a bisa òf hasi, mira esaki komo un oportunidat pa desaroyá bon kualidatnan. Kisas bo mester mustra mas pasenshi, bondat òf dominio propio? I kiko di suavedat, pas i amor? (Galationan 5:22, 23) Por lo ménos, bo por siña kiko bo no mester hasi e siguiente biaha. Anto no tuma bo mes muchu na serio, pero tampoko bo no mester ta iresponsabel. Un sentido di humor sigur por yuda aliviá tenshon.

Ora nos tin un punto di bista korekto di nos fayonan, nos por reakshoná na un manera positivo ora nan sosodé. Nos lo ta na pas ku nos mes i ku otro hende. Si nos hasi nos bèst pa siña di nos fayonan, nos lo bira mas sabí i nos lo ta hendenan mas agradabel. Nos lo no bira demasiado tristu ni pensa malu di nos mes. Ora nos ta komprondé ku otro hende tambe ta lucha ku nan fayonan, nos lo bira mas será ku nan. Mas importante ainda, ora nos siña imitá Dios su amor i ser dispuesto pa pordoná libremente meskos kuné, esei lo ta bon pa nos mes.—Kolosensenan 3:13.

E fayo di Margaret, menshoná na komienso, a daña e okashon di e famia? Di ningun manera. Tur hende a haña esei prèt, foral Margaret, i nan a disfrutá di e kuminda sin makaroni. Añanan despues, e dos ñetunan di Margaret a konta nan yunan di e suseso ei i a kòrda e grato rekuerdonan ku nan tabatin di nan welanan. Al fin i al kabo, tabata djis un fayo.