ARTÍKULO DI ESTUDIO 26
“Bolbe Serka Mi”
“Bolbe serka mi, i lo mi bolbe serka boso.”—MAL. 3:7.
KANTIKA 102 Yuda e Débilnan
UN BISTA ADELANTÁ *
1. Kon Yehova ta sinti ora un di su karnénan bolbe serka dje?
MANERA nos a analisá den e artíkulo anterior, Yehova ta kompará su mes ku un bon wardadó kende ku amor ta kuida kada un di su karnénan. I e ta buska tur karné ku a dual for di dje. Yehova a bisa e israelitanan ku a bandon’é: “Bolbe serka mi, i lo mi bolbe serka boso.” Nos sa ku te ainda e ta sinti meskos pa nos rumannan inaktivo pasobra el a bisa: “Ami . . . no ta kambia.” (Mal. 3:6, 7) Hesus a bisa ku Yehova i e angelnan lo alegrá si asta ún di Su sirbidónan ku a dual bolbe serka djE.—Luk. 15:10, 32.
2. Kiko nos lo analisá den e artíkulo akí?
2 Nos lo analisá tres ilustrashon di Hesus ku ta mustra nos kon pa yuda nos rumannan ku a dual for di Yehova. Nos lo analisá tambe algun kualidat spesífiko ku nos mester tin pa yuda nos rumannan inaktivo bolbe serka Yehova. Ademas, nos lo mira dikon e esfuerso ei ta bale la pena.
BUSKA E MONEDA PÈRDÍ
3-4. Dikon e muhé den e ilustrashon na Lukas 15:8-10 a hasi asina tantu esfuerso pa buska su drakma pèrdí?
3 Pa haña nos rumannan ku ke bolbe serka Yehova ta eksigí hopi esfuerso. Den Evangelio di Lukas, Hesus a konta un ilustrashon di un muhé ku ta buska algu balioso ku el a pèrdè: un moneda di drakma. E parti importante di e ilustrashon ei ta hala atenshon na e esfuerso ku e ta hasi pa buska e drakma.—Lesa Lukas 15:8-10.
4 Hesus ta deskribí kon e muhé ta sinti ora e haña e moneda di drakma balioso ku el a pèrdè. Den tempu di Hesus, ora un hende muhé na Israel kasa, tin biaha su mama lo dun’é un sèt di dies moneda di drakma. Kisas e moneda ku e muhé a pèrdè tabata parti di un sèt asina. E ta asumí ku e moneda a kai abou. Pues, e ta sende un lampi i ta wak rònt, pero e no ta mir’é. Kisas su lampi no ta lusa sufisiente pa e mira e moneda chikitu di plata. Al final, e ta bari henter e kas. Meimei di tur e tera ku el a bari, e ta mira algu ta bria: su drakma balioso. Esta un alivio! E ta manda yama su amigu- i bisiñanan pa konta nan e bon notisia.
5. Dikon por ta difísil pa haña nos rumannan inaktivo?
5 For di Hesus su ilustrashon nos ta siña ku pa haña algu ku a pèrdè, nos tin ku hasi esfuerso. Esei ta konta tambe ora nos ta buska nos rumannan inaktivo. Kisas hopi aña a pasa for di dia ku nan a stòp di bai reunion. Kisas nan a asta muda pa un área kaminda e rumannan di e área ei no konosé nan. Pero nos por tin sigur ku aworakí algun di nos rumannan inaktivo sin duda ke bolbe serka Yehova. Nan ke sirbi Yehova atrobe huntu ku nos, pero nan tin mester di nos yudansa.
6. Kon nos tur den kongregashon por yuda buska ruman ku ta inaktivo?
6 Ken por yuda buska ruman ku ta inaktivo? Nos tur—ansiano, pionero, miembro di famia i publikadó di kongregashon. Abo tin un amigu òf miembro di famia ku a bira inaktivo? Bo a haña un ruman inaktivo den sirbishi di kas pa kas òf den predikashon na lugá públiko? Splika e ruman ku si e ke un bishita, lo bo ta dispuesto pa duna su adrès òf number di telefòn na e ansianonan di bo kongregashon.
7. Kiko bo ta siña for di loke Thomas a bisa?
7 Kiko e ansianonan por hasi pa haña ruman inaktivo ku ke bolbe serka Yehova? Wak e ehèmpel di un ansiano ku yama Thomas, * ku ta biba na Spaña. El a yuda mas ku 40 Testigu inaktivo bolbe na e kongregashon. Thomas a bisa: “Promé, mi ta puntra vários ruman si nan sa unda tin ruman inaktivo di nos kongregashon ta biba. Òf mi ta puntra nan si nan sa di un ruman ku no ta bini reunion mas. Mayoria di ruman den e kongregashon tin masha gana di yuda pasobra e ora ei nan ta sinti nan personalmente enbolbí. Despues, ora mi bishitá e ruman inaktivo, mi ta puntr’é kon ta bai ku su yunan i otro famia. Algun di e rumannan ei tabata bini ku nan yunan reunion, i algun di e yunan ei kisas un tempu asta tabata publikadó. Nos por yuda nan tambe bolbe serka Yehova.”
YUDA E YUNAN PÈRDÍ BOLBE SERKA YEHOVA
8. Den e ilustrashon di e yu pèrdí na Lukas 15:17-24, kon e tata a trata su yu ku a arepentí?
8 Ki kualidat nos mester tin si nos ke yuda nos rumannan ku ke bolbe serka Yehova? Laga nos wak kiko nos por siña for di Hesus su ilustrashon di un yu ku a bai for di kas. (Lesa Lukas 15:17-24.) Hesus a splika loke a pasa ora finalmente e yu a rekobrá su sano huisio i a disidí di bolbe kas. E tata a kore bai serka dje i a bras’é tiernamente, konfirmando su amor p’e. E yu a sintié kulpabel pa loke el a hasi, i el a sinti ku e no ta digno mas pa ser tratá komo un yu. El a konta su tata presis kon e tabata sintié, i e tata a mustr’é empatia i a komprondé su situashon. Despues e tata a hasi algun kos pa demostr’é ku e ta bon biní na kas; no komo un trahadó, sino komo su yu ku e ta stima mashá. Pa proba esei, e tata a organisá un fiesta pa su yu arepentí i a dun’é e pañanan di mihó kalidat.
9. Ki kualidat nos mester tin pa nos por yuda nos rumannan inaktivo bolbe serka Yehova? (Wak e kuadro “ Kon pa Yuda un Ruman Ku Ke Bolbe Serka Yehova.”)
9 Yehova ta manera e tata den e ilustrashon ei. E ta stima nos rumannan inaktivo i ke pa nan bolbe serka dje. Ora nos imitá Yehova, nos por yuda nan bolbe. Pa hasi esei, nos mester tin pasenshi, empatia i amor. Dikon nos mester demostrá e kualidatnan spesífiko ei, i kon nos por hasi esei?
10. Dikon nos mester tin pasenshi pa yuda un ruman bolbe serka Yehova?
10 Nos mester tin pasenshi pasobra ta tuma tempu pa un ruman bolbe serka Yehova. Hopi ruman ku ántes tabata inaktivo a bisa ku e ansianonan i otro ruman den kongregashon mester a bishitá nan hopi biaha promé ku nan a kuminsá sirbi Yehova atrobe. Un ruman di Asia ku yama Nancy a skirbi: “Un bon amiga den e kongregashon a yuda mi masha hopi mes. El a stima mi manera mi tabata su ruman mayó. El a yuda mi kòrda e dushi momentonan ku nos a pasa huntu. Ku pasenshi e tabata skucha mi ora mi tabata deshogá mi sintimentunan, i e no a vasilá pa duna mi konseho. El a demostrá di ta un berdadero amiga, kla pa yuda na kualke momento.”
11. Dikon nos mester di empatia pa yuda un ruman ku tin doló emoshonal?
11 Empatia ta manera un ungwento poderoso. E por yuda kura doló emoshonal. Algun ruman a bira inaktivo pasobra hopi aña pasá un ruman den kongregashon a ofendé nan i ainda nan ta rabiá tokante e asuntu. Debí na esei, nan no tin gana di bolbe serka Yehova. Kisas algun ta pensa ku nan a ser tratá na un manera inhustu. Loke nan mester ta pa un hende skucha nan i komprondé loke nan ta sinti. (Sant. 1:19) María, kende un tempu tabata inaktivo, a bisa: “Mi tabatin mester di un hende pa skucha mi, konsolá mi i duna mi bon konseho i yudansa.”
12. Duna un ilustrashon pa mustra kon Yehova ta usa su amor pa hala nos rumannan inaktivo serka dje.
12 Beibel ta bisa ku Yehova ta hala òf guia nos serka dje ku su amor. Kon e ta hasi esei? Wèl, imaginá ku bo a kai den pos. E pos ta asina profundo ku bo no por sali afó riba bo mes. E úniko manera pa bo sali for di e situashon horibel ei ta si un hende tira un kabuya pa bo i hala bo saka afó. Yehova a bisa tokante e israelitanan ku a dual: “Mi a usa amor manera kabuya pa guia nan na mi.” (Osé. 11:4, NW) Awe, Dios ta sinti meskos tokante nos rumannan ku a stòp di sirbié i ku ta hogando den problema i ansiedat. Ta manera nan ta den un pos profundo. E ke pa nan sa ku e ta stima nan, i e ke hala nan serka dje. Anto Yehova por usa abo pa yuda nan sinti Yehova su amor pa nan.
13. Kon e eksperensia di Pablo ta mustra ku nos amor pa nos rumannan inaktivo por yuda nan bolbe serka Yehova?
13 Ta masha importante pa keda sigurá nos rumannan inaktivo ku Yehova ta stima nan i ku nos tambe ta stima nan. Pablo, menshoná den e artíkulo anterior, tabata inaktivo pa mas ku 30 aña. El a bisa: “Un dia, saliendo kas mainta m’a topa un ruman muhé di edat masha amabel. El a papia ku mi ku asina tantu amor ku m’a kuminsá yora meskos ku mucha chikitu. M’a bis’é ku ta parse ku ta Yehova a mand’é papia ku mi. Ta na e momento ei m’a disidí di bolbe serka Yehova.”
YUDA NOS RUMANNAN INAKTIVO KU AMOR
14. Di akuerdo ku e ilustrashon na Lukas 15:4 i 5, kiko e wardadó a hasi ora el a haña e karné pèrdí?
14 Nos mester sigui yuda nos rumannan inaktivo. Meskos ku e yu pèrdí den e ilustrashon di Hesus, kisas nan tin doló emoshonal i probablemente nan ta spiritualmente suak debí na tur loke nan a pasa den mundu di Satanas. P’esei, nos mester yuda nan fortalesé nan fe den Yehova. Den e ilustrashon di e karné pèrdí, Hesus a bisa ku e wardadó a pone e karné riba su skouder i a karg’é hiba bèk na e tou. E wardadó ya a dediká tempu i energia na buska e karné pèrdí. Pero e sa tambe ku e karné no tin forsa pa bolbe riba su mes, i ku e mester karg’é hiba bèk e tou.—Lesa Lukas 15:4, 5.
15. Kon nos por yuda un ruman ku ta suak den sentido spiritual bolbe serka Yehova? (Wak e kuadro “ Un Hèrmènt Masha Balioso.”)
15 Kisas nos mester dediká tempu i energia pa yuda algun ruman inaktivo lucha kontra nan debilidat. Pero ku yudansa di Yehova su spiritu, su Palabra i e publikashonnan ku e organisashon a proveé, nos por yuda nan bolbe bira fuerte den sentido spiritual. (Rom. 15:1) Kon nos por hasi esei? Un ansiano eksperensiá a bisa: “Despues ku e rumannan inaktivo disidí di bolbe serka Yehova, mayoria di nan mester di un estudio di Beibel.” * P’esei, si e ansianonan pidi bo studia ku un ruman inaktivo, aseptá e privilegio ei. E ansiano a bisa tambe: “E publikadó ku ta dirigí e estudio mester ta un bon amigu, un hende ku e ruman inaktivo por konfia.”
GOSO DEN SHELU I RIBA TERA
16. Kon nos sa ku nos por konta ku yudansa di e angelnan?
16 Nos no ta nos so den nos búskeda di nos rumannan inaktivo. Nos tin yudansa di e angelnan. (Rev. 14:6) Hopi eksperensia a demostrá esei. Por ehèmpel, Silvio, di Ecuador, a roga Yehova pa yud’é bolbe na e kongregashon. Meimei di su orashon, bèl di su porta a zona. Dos ansiano tabata pará na su porta. E ansianonan tabata kontentu pa dun’é e yudansa ku e tabatin mester.
17. Kon nos ta sinti ora nos yuda nos rumannan ku ta suak den sentido spiritual?
17 Nos por haña hopi goso ora nos yuda nos rumannan ku ta suak den sentido spiritual bolbe serka Yehova. Wak loke un pionero ku ta hasi èkstra esfuerso pa yuda ruman inaktivo a bisa: “Tin biaha, mi ta bira asina felis ku mi no por kontené mi lágrimanan. Mi ta masha kontentu ku mi por a traha huntu ku Yehova pa yuda un di su sirbidónan presioso sali for di mundu di Satanas i bolbe na e kongregashon.”—Echo. 20:35.
18. Si bo ta inaktivo, di kiko bo por ta sigur?
18 Asta si bo a stòp di bai reunion i di prediká, bo por tin sigur di un kos: Yehova ta stima bo ainda. E ke pa bo bolbe serka dje. Ta bèrdat ku lo bo tin ku hasi esfuerso pa bolbe serka dje. Pero meskos ku e tata den Hesus su ilustrashon, Yehova ta anhelá pa bo bolbe serka dje. I e ta warda bo ku brasa habrí.
KANTIKA 103 Wardadó—Regalo den Forma di Hende
^ par. 5 Yehova ta pidi nos rumannan ku a stòp di bai reunion i di prediká lo siguiente: “Bolbe serka mi.” I e ke pa nos rumannan inaktivo aseptá e invitashon ei. Tin vários manera ku nos por animá nos rumannan i yuda nan bolbe. Laga nos wak algun di nan.
^ par. 7 A kambia algun nòmber.
^ par. 15 Pa nos por yuda un ruman inaktivo, analisá kuné algun kapítulo di e buki “Keda den e Amor di Dios” òf e buki Hala Serka Yehova. Komité di Sirbishi di Kongregashon lo skohe e ruman ku lo dirigí un estudio di Beibel ku un ruman inaktivo.
^ par. 68 DESKRIPSHON DI PLACHI: Tres diferente ruman ta yuda un ruman inaktivo ku ke bolbe. Nan ta hasi esei kedando den kontakto kuné, sigurando e ku Yehova i e kongregashon ta stim’é i skuchando e ku atenshon.
