E versíkulonan ei ta menshoná nuebe kualidat ku ta forma parti di “fruta di spiritu”: ‘amor, goso, pas, pasenshi, amabilidat, bondat, fe, suavedat i dominio propio.’ Pero, esei no ke men ku e kualidatnan ei ta e únikonan ku Dios su spiritu santu ta yuda nos kultivá.

Kon nos sa esei? Wèl, promé ku Apòstel Pablo a menshoná fruta di spiritu, el a skirbi: “E obranan di karni . . . ta fornikashon, impuresa, kondukta sinbèrgwensa, idolatria, bruheria, hostilidat, bringamentu, yalursheit, atake di rabia, pleitamentu, desunion, sekta, envidia, buracheria, korementu di paranda i kosnan por estilo.” (Gal. 5:19-21) Pues, Pablo por a menshoná otro kos ku tambe ta inkluí den “e obranan di karni,” manera esnan ku el a menshoná na Kolosensenan 3:5. El a hasi meskos ora el a menshoná nuebe bon kualidat na versíkulo 23: “Kontra e tipo di kosnan ei no tin lei.” Pues, esei ta mustra ku Pablo no a limitá “fruta di spiritu” solamente na e kualidatnan ei.

Nos por komprondé e punto ei ora nos kompará e lista ei ku esun ku Pablo a skirbi pa e kongregashon na Efeso: “Fruta di lus ta konsistí di tur sorto di bondat, hustisia i bèrdat.” (Efe. 5:8, 9) Sí, “bondat,” huntu ku hustisia i bèrdat, ta parti di “fruta di lus,” pero bondat ta tambe un aspekto di “fruta di spiritu.”

Tuma nota tambe ku Pablo a animá Timoteo pa kultivá seis kualidat: “Hustisia, deboshon na Dios, fe, amor, perseveransia i suavedat.” (1 Tim. 6:11) Solamente tres di nan (fe, amor i suavedat) ta ser menshoná komo aspekto di “fruta di spiritu.” Pero, ta klaru ku Timoteo tabatin mester di yudansa di spiritu santu tambe pa kultivá e otro tres kualidatnan: hustisia, deboshon na Dios i perseveransia.—Kompará ku Kolosensenan 3:12; 2 Pedro 1:5-7.

Pues, e kualidatnan menshoná na Galationan 5:22 i 23 no ta tur e posibel aspektonan di “fruta di spiritu.” Spiritu santu di Dios por yuda nos kultivá e nuebe aspektonan di “fruta di spiritu.” Pero tin mas kualidat ku nos mester kultivá pa nos bira kristian spiritualmente maduro i pa nos “bisti e personalidat nobo ku a ser kreá segun e boluntat di Dios den berdadero hustisia i lealtat.”—Efe. 4:24.