Informe di Proclamador di Reino

El a haya un propósito pa su bida

JESÚS a bisa cu e ta conoce su carnénan. (Juan 10:14) Si un persona tin un bon curazón i ta stima paz i husticia, sigidor di Jesús ta atraéle. Hende asina por haya un propósito pa nan bida, mescos cu un señora den Bélgica. Lo sigiente ta su relato:

“Ora Testigo di Jehova a bati mi porta, mi tabata mashá desconsolá i tabata pensa di termina mi bida. Mi a gusta loke e Testigonan a bisa tocante e solucion pa problema dje mundo enfermo aki pero mi no a gusta e idea di cu Dios tin cu hunga un papel den dje. Mi a bandona misa ocho aña pasá caba, pasobra mi a odiá e hipocresía cu mi a mira ei. Pero, mi a reconoce e berdad den loke Testigo di Jehova a bisa i mi a yega di reconoce cu den todo caso ta difícil pa biba sin Dios.

“Lastimosamente, despues di algun bishita, mi a perde contacto cu e Testigonan. Mi a sintími miserabel. Mi a huma dos paki di cigaría pa dia i asta a cuminza usa droga. Mi tabata kier comunica cu mi difunto abuelo, i a purba spiritismo. Ki spantá mi a keda ora, como resultado, den anochi ora mi tabata so, mi a experimenta atake di demoño! Esei a sigi pa varios luna. Tur anochi e miedu di keda so a dominámi.

“Anto, un dia mi a dal un keiru, pasando den un camina diferente di esun cu mi generalmente a sigi, i mi a pasa e sitio di un construccion grandi. Pa mi sorpresa mi a mira un multitud grandi ei. Yegando mas cerca, mi a mira cu tabata Testigo di Jehova den e proceso di construi un Salón di Reino. Mi a corda bishita cu Testigo di Jehova a haci na mi cas, i mi a pensa ki maraviyoso lo tá si tur e mundo por biba manera e hendenan ei ta biba.

“Mi realmente a deseá pa Testigo di Jehova bolbe bishita mi cas, p’sei mi a papia cu algun hende trahando riba e salón. Mi a haci oracion na Dios, i diez dia despues e homber cu a haci contacto cu mi na principio a bishita mi cas. El a sugeri pa nos sigi cu e estudio bíblico, i mi a acepta cu gusto. El a invitámi un bez na reunion den Salón di Reino. Mi a acepta. Nunca mi a mira un bista asina! Pa tanto tempo mi tabata busca hende cu ta stima otro i cu ta feliz. I por fin mi a háyanan!

“Dje ora ei padilanti mi a bai na tur reunion. Despues di rond di tres siman, mi a bandona e mal costumber di huma. Mi a tira afó tur buki tocante astrología i tur disco di música satánico, i mi por a sinti cu demoño tabata perde nan gara riba mi. Mi a drecha mi bida conforme cu ley bíblico di Jehova Dios, i despues di tres luna mi a cuminza predica e bon nobo. Despues di seis luna mi a bautiza. Dos dia despues di mi bautismo, mi a cuminza sirbi como pionero auxiliar.

“Mi ta gradici Jehova pa tur e bon cosnan cu el a haci pa mi. Por fin mi bida tin un propósito. Sí, e nomber di Jehova ta un toren fuerte den locual ami a haya refugio i proteccion. (Proverbio 18:10) Mi realmente ta sintími mescos cu e salmista ora el a skirbi Salmo 84:10: ‘Un dia den bo curá ta mihor cu mil na otro parti! Mi a scoge di para na drempel dje cas di mi Dios mas bien cu pasa p’akí i p’ayá den tent di maldad.’”

E señora di genio suave a haya un propósito pa su bida. Ken cu ta busca Jehova Dios cu un bon curazón por haci mescos.