E “Rumannan Polaco”—Pakico A Persiguí Nan?

Na 1638 parlamento di Polonia a dal un grupo religioso cu tabata conocí como e Rumannan Polaco, un sla duru. Nan a destruí un misa i un imprenta cu tabata pertenecé n’e grupo aki. Nan a cera Universidad di Raków, i a manda e profesornan cu tabata duna les einan, den exilio.

Binti aña despues, e parlamento a dal un stap mas aleu. El a duna ordu pa tur miembro dje grupo, nan por tabata 10.000 persona of mas, bandoná e pais. Con bin situacion a bira asina crítico den un pais cu, na un tempu, tabata considerá un di esnan mas tolerante den henter Europa? Kico e Rumannan Polaco a haci pa merecé un trato asina severo?

TUR cos a cuminsá ora a bin un kiebro den e Iglesia Calvinista na Polonia. Un punto principal di contencion tabata e doctrina di Trinidad. Lidernan di un movementu progresivo den e iglesia a rechasá e doctrina como unu no-bíblico. Esaki a pone e lidernan di iglesia rabia i e movementu progresivo a distancia for dje iglesia.

Calvinistanan tabata yama e personanan aki cu a diferenciá di opinion cu nan, hende ario. * Pero e apoyadónan dje grupo nobo a preferá di yama nan mes Cristian of e Rumannan Polaco. Nan tabata conocí tambe como socinista, debí na Lelio Socino, un italiano cu Servet a influenciá i kende su subrino Fausto Socino a biaha bai Polonia i a bira un personahe prominente den e movementu.

N’e tempu ei, un homber di noblesa polaco, Jan Sienieński, a purba duna e iglesia nobo loke el a yama “un lugá trankil i apartá” den cua e por crece. Dor di a usa un privilegio special cu e rey di Polonia a dun’é, Sienieński a funda e stad Raków, cu despues a bira e centro di socinismo na Polonia. Sienieński a otorgá e ciudadanonan di Raków vários derecho, incluso e derecho pa ehercé nan adoracion libremente.

Artesano, dokter, boticario, hende di pueblo i hende di clase medio di diferente denominacion a ser atraé n’e stad nobo. Ademas, ministernan di Polonia, Lituania, Transilvania, Francia i asta di Inglatera a bin aglomerá einan. Sin embargo, no ta tur e hendenan recien yegá aki tabata compartí e creencianan socinista; pues, pa e tres añanan cu a sigui, di 1569 te cu 1572, Raków a bira sitio di un sinfin di debate teológico. Cu ki resultado?

Un Cas Dividí

Den e movementu socinista mes a bini un division, ya cu esnan cu a apoyá puntonan di bista mas radical a tuma un banda i esnan mas moderá a tuma e otro banda. Sin embargo, apesar di nan diferencianan, nan creencianan en comun a haci nan diferente. Nan a rechasá Trinidad; nan a nenga e práctica di bautisá mucha chikitu; en general nan no tabata carga arma i  hopi bes nan no a aceptá puestonan político. * Tambe nan a nenga e existencia di fiernu como un lugá di tormento. Den tur e casonan aki, nan a ignorá tradicionnan religioso popular.

Tantu clero calvinista como católico a orkestrá un oposicion severo contra e grupo. Pero ministernan socinista a probechá dje atmósfera religioso tolerante cu reynan polaco manera Sigmundo II Agusto i Stephen Báthory a promové, pa siña hende nan ideanan.

E Obra Crucial di Budny

Un traduccion calvinista di Bijbel cu tabata ampliamente usá e tempu ei, no tabata cumpli cu e necesidadnan di vários lector. Nan a traducí e version aki no for dje idiomanan original, sino for di Vulgata na latin i un traduccion frances dje mésun tempu. Un autoridad ta bisa: “Nan a sacrificá fieldad i exactitud di pensamentu pa un estilo bunita.” Nan a haci hopi eror. P’esei, a pidi un erudito bon conocí, Szymon Budny, pa corigí e traduccion. El a dicidí cu producí un traduccion completamente nobo lo tabata mas fácil cu corigí esun bieu. Rond di 1567 Budny a cuminsá traha riba e proyecto.

Ora e tabata traducí, Budny a analisá cada palabra i nan variante profundamente den un manera cu ningun hende na Polonia no a haci promé. Caminda tabata difícil pa traducí e nificacion hebreo na polaco, el a indicá e traduccion literal den notanan adicional. Ora tabata necesario el a inventá palabranan nobo, i el a purba di usa e idioma polaco simpel i diario di su tempu. Su meta tabata pa duna e lector un traduccion fiel i exacto di Bijbel.

Budny su traduccion di Bijbel completo a ser publicá na 1572. Sin embargo, e publicadónan dje obra a corumpí su traduccion dje Scritura Griego. Determiná, Budny a cuminsá traha riba un version revisá cu el a terminá dos aña despues. Budny su traduccion briyante dje Scritura Griego tabata superior n’e traduccionnan polaco anterior. Ademas, el a restorá e nomber divino, Jehova, na vários lugá.

Durante e parti final di siglo 16 i promé tres décadanan di siglo 17, Raków, e stad principal dje movementu, a bira un centro religioso i intelectual. Einan, e lider i escritornan dje Rumannan Polaco a publicá nan tratado i obranan.

Nan A Promové Educacion

E trabou di publicá dje Rumannan Polaco a cuminsá haña mas forsa rond di 1600 ora nan a establecé un imprenta na Raków. E imprenta por a producí tantu tratadonan chikitu como bukinan grandi, den diferente idioma. No a tarda mashá cu Raków, como un centro di imprenta, por a competí cu e mihónan di Europa. Hende ta kere cu durante e 40 añanan cu a sigui, e imprenta ei a druk te cu 200 publicacion. Un fábrica ei banda dje Rumannan Polaco, a percurá pa papel di calidad haltu p’e literatura aki.

No a dura masha cu e Rumannan Polaco a mira e necesidad di educá nan compañeronan creyente i otro hende. Cu e meta ei nan a funda e Universidad di Raków na 1602. Tantu yu hombernan dje Rumannan Polaco como mucha hombernan católico i protestant a tuma les einan. Aunke e universidad tabata un seminario teológico, no ta e vak religion so nan tabata duna einan. Idiomanan stranhero, ética, economia, historia, derecho, lógica, física, matemática, medicina i gimnastik tambe tabata parti dje curículo. E universidad tabatin un biblioteca grandi cu a sigui crece, danki n’e imprenta local.

Den transcurso di principio di siglo 17, a parce cu e Rumannan Polaco lo a sigui florecé. Tog, esei no tabata e caso.

Iglesia i Estado Ta Bringa Bek

Zbigniew Ogonowski dje Academia di Ciencia Polaco ta splica: “Na fin dje di tres década di siglo 17, e situacion dje arionan na Polonia a cuminsá bai atras lihé.” Esaki tabata debí n’e actividad cada bes mas intrépido di clero católico. E clero a usa tur medio posibel, incluso mentira  i difamacion, pa desacreditá e Rumannan Polaco. Dor cu e situacion político na Polonia a cambia, e atake a bira mas fácil. E rey polaco nobo, Sigmundo III Vasa, tabata enemigu dje Rumannan Polaco. Su sucesornan, foral Juan II Casimir Vasa, tambe a apoyá e esfuersonan di Iglesia Católico pa stroba e Rumannan Polaco.

E situacion a yega na su culminacion ora cu supuestamente un par di studiante di Raków a profaná un crus deliberadamente. E incidente a bira un pretexto pa destruí e stad capital dje Rumannan Polaco. Nan a acusá e doño di Raków dilanti corte parlamentario di a ‘plama maldad,’ pasobra el a apoyá Universidad Raków i su imprenta. Nan a acusá e Rumannan Polaco di actividadnan contra gobiernu, participacion den orgia i di hiba bida inmoral. Parlamento a dicidí cu Universidad Raków mester cera su porta i cu mester destruí e imprenta i e misa dje Rumannan Polaco. E creyentenan a haña ordu pa bandoná e stad. E profesornan dje universidad a ser prohibí pa drenta e pais bou dje castigu di morto. Algun dje Rumannan Polaco a muda bai hafnan mas safe manera, Silesia i Slovakia.

Na 1658, parlamento a decretá cu e Rumannan Polaco mester bende nan propiedad i bandoná e pais denter di tres aña. Despues, nan a haci e periodo di tempu ei dos aña. Despues di esei, lo a mata tur hende cu tabata profesá e creencianan ei.

Algun socinista a establecé na Hulanda, unda nan a sigui cu nan actividad di imprenta. Na Transilvania un congregacion a sigui funcioná te na principio di siglo 18. Na nan reunionnan cu nan a tene te tres bes pa siman, nan a canta salmo, scucha sermon i lesa for di un catesismo cu a ser prepará pa splica nan siñansanan. Pa conserbá e limpiesa dje congregacion, nan tabata corigí, exhortá i, si ta necesario, scomulgá compañeronan creyente.

E Rumannan Polaco tabata studiante dje Palabra di Dios. Nan a descubrí algun berdadnan precioso, i sin vacilá nan a compartí nan cu otro hende. Sin embargo, cu tempu nan a ser plamá rond Europa i cada bes tabata mas difícil pa mantené nan unidad. Cu tempu, e Rumannan Polaco a disparcé.

[Nota]

[Plachi na página 23]

Cas cu tabata pertenecé na un minister socinista

[Plachinan na página 23]

Ariba: Raków awe; na man drechi ta e monasterio fundá na 1650 pa eradicá tur rasgo di “arionismo”; abou: N’e sitio aki clero católico a pone un crus pa provocá conflicto cu e Rumannan Polaco

[Rekonosementu pa Potrèt na página 21]

Kaft di Biblia nieświeska di Szymon Budny, 1572