E Poder di Oracion

Solo ta bahando riba e stad di Nahor den Medio Oriente. Un sirio di nomber Eliezer ta yega cu un caravana di dies kamel na un pos pafó dje stad. Aunke sin duda e mes ta cansá i cu sed, Eliezer ta mas preocupá tocante necesidad di otronan. El a bini di un tera stranhero p’e haña un casá pa e yu homber di su doño. Ademas, e mester haña e casá aki for di e famianan di su doño. Con lo e cumpli cu e tarea difícil aki?

ELIEZER ta kere den e poder di oracion. Cu un fe remarcabel manera di un mucha, e ta haci e peticion humilde aki: “Jehova e Dios di mi doño Abraham, haci pa e sosodé, por fabor, dilanti mi awe, i efectuá bondad amoroso pa cu mi doño Abraham. Ata mi akí stacioná na un pos di awa, i e yu muhernan dje hombernan dje stad ta saliendo pa saca awa. Loke mester sosodé ta cu e mucha muher na ken ami lo bisa: ‘Baha bo poron di awa, por fabor, pa mi por bebe,’ i cu realmente lo bisa: ‘Bebe i tambe lo mi duna bo kamelnan awa,’ esaki ta esun cu bo tin cu asigná na bo sirbidó, na Isaac; i pa medio di esaki laga mi sa cu bo a efectuá amor leal pa cu mi doño.”—Génesis 24:12-14.

Eliezer su confiansa den e poder di oracion no ta en bano. Figurá bo cu e promé muher cu ta bini n’e pos ta resultá di ta nietu di Abraham su ruman homber! Su nomber ta Rebeca, anto e ta soltero, puru den sentido moral, anto bunita. Ta remarcabel cu e no ta djis duna Eliezer awa, sino cu e ta ofrecé pa calma sed di tur su kamelnan. Mas lat, despues di un consulta familiar, Rebeca ta aceptá boluntariamente pa bai bek cu Eliezer na un tera leu pa bira casá di Abraham su yu Isaac. Esta un contesta cla i dramático na e oracion di Eliezer, den un tempu ora cu Dios tabata intervení de bes en cuando den eventonan na moda milagroso!

Nos por siña hopi for dje oracion di Eliezer. El a reflehá su fe i humildad sobresaliente i su interes inegoista den bienestar di otronan. Ademas e oracion di Eliezer a reflehá su sumision na e manera cu Jehova ta trata cu humanidad. No tin duda cu e tabata conciente di e cariño special cu Dios tabatin pa Abraham i tambe dje promesa di Jehova cu henter humanidad lo haña bendicion den futuro mediante Abraham. (Génesis 12:3) P’esei, Eliezer a cuminsá su oracion cu e palabranan: “Jehova e Dios di mi doño Abraham.”

Jesucristo tabata e desendiente di Abraham cu lo a bira e medio pa bendicioná henter humanidad obediente. (Génesis 22:18) Awendia, si nos kier pa nos oracionnan ser contestá, nos tin cu reconocé humildemente e manera cu Dios ta trata cu humanidad pa medio di su Yu. Jesucristo a bisa: “Si boso keda den union cu mi i mi  dichonan keda den boso, pidi loke boso kier i lo e sosodé pa boso.”—Juan 15:7.

Un siguidó di Cristo cu a experenciá e berdad dje palabranan aki di Jesus tabata apostel Pablo. Su confiansa den e poder di oracion sigur no tabata en bano. El a animá su compañeronan cristian pa nan trece tur nan ansiedadnan cerca Dios den oracion, i el a duna e testimonio: “Pa tur cos mi tin e forsa den birtud di esun cu ta duna mi poder.” (Filipensenan 4:6, 7, 13) Esei kier men cu tur loke Pablo a pidi den oracion na Dios a ser concedé? Laga nos mira.

No Ta Tur Peticion Ta Ser Concedé

Den su ministerio inegoista, Pablo a sufri di algu cu el a describí como “un sumpiña den carni.” (2 Corintionan 12:7) Esaki por tabata e angustia mental i emocional cu opositornan i “rumannan falsu” a caus’é. (2 Corintionan 11:26; Galationan 2:4) Of lo por tabata e molester físico di un problema crónico di wowo. (Galationan 4:15) Loke sea tabata e caso, e “sumpiña den carni” aki tabatin un efecto debilitador riba Pablo. “Tres bes mi a suplicá Señor p’e cos bandoná mi,” el a skirbi. Sin embargo, loke Pablo a pidi no a ser concedé. Pablo a ser splicá cu e beneficionan spiritual cu el a ricibí caba cerca Dios, por ehempel forsa pa soportá prueba, tabata suficiente. Ademas, Dios a bisa: “Mi poder ta ser hací perfecto den debilidad.”—2 Corintionan 12:8, 9.

Kico nos ta siña for dje ehempelnan di Eliezer i Pablo? En berdad Jehova Dios ta scucha oracion di esnan cu ta purba sirbié humildemente. Pero esei no kier men cu semper e ta concedé loke nan ta pidi, pasobra Dios ta mira asuntunan cu un vision di largu alcanse. E sa mihó cu nos kico ta cumbiní nos mas. Mas importante, semper e ta actua na armonia cu su propósito declará, cu ta registrá den Bijbel.

Un Tempu pa Curacion Spiritual

Dios ta primintí di cura humanidad di tur problema físico, mental i emocional durante e Reinado di Mil Aña di su Yu riba tera. (Revelacion 20:1-3; 21:3-5) Cristiannan sincero ta spera e futuro primintí aki ansioso, cu pleno fe den Dios su poder pa hacié un realidad. Apesar cu nan no ta spera e tipo di curacion milagroso ei awor, nan ta pidi Dios pa su consuelo i forsa pa nan enfrentá prueba. (Salmo 55:22) Ora nan bira malu, nan por pidi tambe pa Dios guia nan pa obtené e mihó cuido médico posibel, segun nan situacion económico.

Algun religion ta animá hende malu pa nan haci oracion i pidi pa nan cura awor, señalando na e curacionnan milagroso cu Jesus i su apostelnan a efectuá. Pero nan a haci e milagernan ei cu un propósito special. Nan a sirbi pa duna prueba cu Jesucristo tabata e berdadero Mesías, i pa mustra cu Dios a transferí su aprobacion for di e nacion hudiu pa e congregacion cristian cu tabata den su infancia n’e tempu ei. Den e tempu ei tabatin mester di donnan milagroso pa fortalecé fe dje congregacion cristian recien establecí. Despues cu e congregacion baby a bin para riba pia, na moda di papia, i a bira maduro, e donnan milagroso a “ser eliminá.”—1 Corintionan 13:8, 11.

N’e tempu crucial aki, Jehova Dios ta dirigí su adoradónan den un obra mas importante, e obra di curacion spiritual. Miéntras nan tin tempu ainda, ta sumamente urgente pa hende respondé na e súplica aki: “Boso busca Jehova, miéntras cu e por ser hañá. Yama na dje miéntras cu e ta resultá di ta cerca. Laga e malbado bandoná su caminda, i e hende perhudicial su pensamentunan; i lagu’e bolbe na Jehova, kende lo tin misericordia di dje, i na nos Dios, pasobra lo e pordoná den un gran manera.”—Isaías 55:6, 7.

E curacion spiritual aki di pecadónan arepentí ta ser lográ pa medio dje predicacion dje bon nobo di e Reino di Dios. (Mateo 24:14) Dor di duna su sirbidónan e poder pa efectuá e trabou aki cu ta salba bida di hende, Jehova Dios ta yudando miyones di hende di tur nacion pa repentí di nan picánan i drenta den un bon relacion cuné promé cu e sistema di cosnan malbado aki yega na su fin. Tur esnan cu pidi pa tal curacion spiritual cu sinceridad, i tur esnan cu pidi yudansa pa efectuá e trabou di curacion aki, sin duda ta hañando contesta pa nan oracion.

[Rekonosementu pa Potrèt na página 3]

Eliezer cu Rebeca/The Doré Bible Illustrations/Dover Publications