Kico Nan A Descubri na Jezreel?

PA SIGLONAN e sitio dje stad antiguo Jezreel tabata desolá. Na un tempu e tabata prominente den historia di Bijbel. Awor, sin su gloria di ántes i tapá bou di vários capa di tera, el a keda reducí na un ceritu, of ‘tel.’ Den añanan recien, arkeólogonan a cuminsá investigá e restonan di Jezreel. Kico e ruinanan aki ta revelá tocante e relatonan bíblico?

Jezreel den Bijbel

Situá den e parti oost dje vaye Jezreel, e stad Jezreel tabata un dje áreanan mas fértil dje antiguo pais di Israel. Direct enfrente dje vaye na parti nort tin e ceritu Moré caminda e madianitanan a pone nan campamentu miéntras nan tabata prepará pa atacá hues Gídeon i su trupanan. Djis un tiki na oost tin e pos di Harod, na pia dje ceru Gilboa. Akinan tabata caminda Jehova a reducí e ehército di Gídeon for di miles te na meramente 300 homber, pa asina demostrá su abilidad pa libra su pueblo sin un forsa militar poderoso. (Huesnan 7:1-25; Zacarías 4:6) Riba ceru Gilboa cu tabata djis pegá, e filisteonan a derotá rey Saul, e promé rey di Israel, den un bataya dramático den cua Jonatan i dos otro yu homber di Saul a ser matá i Saul mes a cometé suicidio.—1 Samuel 31:1-5.

Referencianan bíblico n’e stad antiguo di Jezreel ta reflehá contrastenan skerpi. Nan ta conta dje abusu di poder i apostasia di Israel su gobernantenan i tambe dje fieldad i celo di parti di sirbidónan di Jehova. Tabata na Jezreel cu rey Acab—gobernante di Israel su reino di dies tribu di nort den e último parti di siglo 10 P.E.C.—a establecé su residencia real, aunke e capital oficial tabata Samaria. (1 Reynan 21:1) Tabata for di Jezreel cu Jezabel, e esposa stranhero di rey Acab, a manda menasá Elías e profeta di Jehova cu morto. Jezabel tabata rabiá pasobra sin miedu Elías a ehecutá e profetanan di Baal, despues dje prueba di ken ta e Dios berdadero cu Elías a efectuá riba ceru Carmel.—1 Reynan 18:36–19:2.

Despues nan a cometé un crímen na Jezreel. Nabot e jezrelita a ser asesiná. Rey Acab a cudishá Nabot su hofi di wijndruif. Ora e rey a exigí p’e haña e tereno, Nabot a respondé lealmente: “Ta inconcebibel di mi parti, for dje punto di bista di Jehova, pa mi duna bo e posesion hereditario di mi antepasadonan.” Acab no a keda niun tiki contentu cu e contesta aki cu tabata basá riba principio. Ora cu reina Jezabel a mira con deprimí e rey tabata, el a haci areglo pa un huicio falsu acusá Nabot di blasfemia. Nabot kende tabata inocente a ser hañá culpabel i nan a piedr’é mata, i e rey a tuma posicion di su hofi di wijndruif.—1 Reynan 21:1-16.

Debí n’e echo malbado aki, Elías a profetisá: “Cachó mes lo come Jezabel riba e pida tereno di Jezreel.” Ademas e profeta a declará: “Ken cu muri di Acab den stad, cachó lo come . . . Sin excepcion, ningun hende no a resultá  di ta manera Acab, cu a bende su mes pa haci loke ta malu den bista di Jehova, instigá pa su esposa Jezabel.” Sin embargo, debí cu Acab a humiyá su mes ora Elías a pronunciá Jehova su huicio, Jehova a declará cu e castigu aki lo no bini miéntras Acab ta na bida. (1 Reynan 21:23-29) E relato bíblico ta sigui conta cu den tempu di Eliseo, sucesor di Elías, a ungi Jehú pa bira rey di Israel. Ora el a core drenta Jezreel, Jehú a manda pa tira Jezabel for di bentana di su palacio, i e patanan di cabai a trap’é. Despues nan a ripará cu cachónan cu ta come sushi a laga solamente su cráneo, su pianan i palma di su mannan. (2 Reynan 9:30-37) E último suceso bíblico directamente relacioná cu Jezreel ta bini despues dje ehecucion di 70 yu homber di Acab. Jehú a pone nan cabesnan den dos monton grandi n’e porta dje stad di Jezreel, despues di cua el a mata otro hombernan prominente i sacerdotenan cu tabata enbolbí den e reinado apóstata di Acab.—2 Reynan 10:6-11.

Kico Arkeólogonan A Haña?

Na 1990, un proyecto uní di coba e sitio di Jezreel a cuminsá. Esnan cu a participá tabata e Instituto di Arkeologia di Universidad di Tel Aviv (representá pa David Ussishkin) i e Scol Británico di Arkeologia na Jerusalem (representá pa John Woodhead). Pa shete periodo di tempu (cada periodo a dura seis siman) durante e añanan 1990 pa 1996, entre 80 pa 100 boluntario a traha n’e sitio.

E sistema moderno pa abordá arkeologia ta di examiná e evidencia na un localidad a base di su propio méritonan, sin referí na idea i teorianan cu tabata existí promé. P’esei, pa e arkeólogo cu ta studia paisnan di Bijbel, e relato bíblico no ta un autoridad riba e tema. Mester considerá tur otro fuente i evidencia físico i evaluá nan cuidadosamente. Sin embargo, manera John Woodhead ta relatá, fuera di algun capítulo den Bijbel, no tin evidencia antiguo skirbí tocante Jezreel. Pues, e relatonan i cronologia bíblico mester ta parti di cualkier investigacion. Kico e trabou dje arkeólogonan a revelá?

Segun cu nan a coba saca forti i pochinan di klei, tabata bisto for di principio cu e ruinanan tabata data di e asina yamá Epoca di Heru, i esaki ta ubicá nan precis den e periodo dje tempu bíblico di Jezreel. Pero segun cu e cobamentu a sigui, tabatin un cantidad di sorpresa. E promé tabata e tamaño dje sitio i su fortinan masivo. E arkeólogonan a spera di haña un sitio cu fortinan manera esnan di antiguo Samaria, e capital dje reino di Israel. Sin embargo, segun cu e cobamentu a continuá, a sali na cla cu Jezreel tabata hopi mas grandi. E stad a midi 300 meter largu i 150 meter hanchu a lo largu di su murayanan, i e área total parti paden di su fortinan tabata mas cu tres biaha e tamaño di cualkier  otro stad cu nan a descubrí den Israel dje tempu ei. Rondó di dje tabatin un canal secu cu a crea un bahada di 11 meter for dje fortinan. Segun profesor Ussishkin, e canal aki tabata un rasgo sin precedente pa tempu bíblico. “Te cu e periodo dje crusadanan, nos no ta haña nada manera esaki den Israel,” el a bisa.

Un otro rasgo inesperá tabata e ausencia di construccionnan elaborá den centro di ciudad. Nan a usa un gran cantidad di tera corá-maron cu nan a trece durante construccion dje stad, pa traha un superficie haltu—un tipo di podio of plataforma grandi elevá—paden dje murayanan. E Segundo Informe Preliminar riba e cobamentu na Tel Jezreel ta comentá cu e podio remarcabel aki por ta evidencia di cu Jezreel tabata mas cu un residencia real. E ta bisa: “Nos lo kier presentá e posibilidad di cu Jezreel tabata un base militar central p’e ehército israelita di cas real den tempu di rey Omri i su desendientenan . . . caminda garoshi i ekiponan di guera di cas real tabata ubicá i ser entrená.” Basá riba e tamaño dje podio elevá aki i tambe e área paden dje murayanan, Woodhead ta speculá cu esaki por tabata un tipo di tereno di desfile caminda nan tabata exhibí e poder militar dje ehército di mas grandi di garoshinan di guera den Medio Oriente n’e tempu ei.

E restonan dje porta di stad cu nan a coba saca ta un rasgo di interes special p’e arkeólogonan. Nan ta mustra cu tabatin un porta di entrada di por lo ménos cuater kamber. Sin embargo, ya cu hopi piedra n’e sitio a ser destruí atrabes di siglonan, e descubrimentunan no a hiba na conclusionnan definitivo. Woodhead ta di opinion cu e restonan ta señalá na un porta di seis kamber mes grandi cu esnan cu nan a haña na Megido, Hazor i Gezer. *

E descubrimentunan arkeológico ta señalá na un existencia sorprendentemente corticu pa un stad cu un ubicacion asina ideal, tantu den sentido militar como geográfico. Woodhead ta enfatisá cu como un stad grandi fortificá, Jezreel a existí pa solamente un cierto periodo di tempu, nan a us’é solamente un par di década. Esaki ta na contraste skerpi cu hopi otro sitionan bíblico clave den Israel, manera Megido, Hazor i e ciudad capital Samaria cu durante vários periodo a ser reedificá, expandé i habitá bes tras bes. Di con e sitio ideal aki a perde su uso asina lihé? Woodhead ta suponé cu Acab i su dinastia a casi causa un colapso económico dor cu nan a desperdiciá e recursonan dje nacion. Esaki tabata bisto den e tamaño i fortalesa excesivo di Jezreel. Probablemente e régimen nobo bou di Jehú kier a separá su mes for dje recuerdonan di Acab i p’esei nan a bandoná e stad.

Te asina leu, tur evidencia ta confirmá cu e sitio di Jezreel tabata un centro principal di Israel den e periodo di Epoca di Heru. Su tamaño i fortinan ta na armonia cu e descripcion cu Bijbel ta duna di dje como un residencia real principal pa Acab i Jezabel. E señalnan cu ta mustra cu durante e periodo aki e no tabata habitá mashá, ta na armonia cu relatonan bíblico dje stad: Masha lihé el a crece bira importante durante e periodo di Acab su reinado i e ora ei, riba mandato di Jehova, aparentemente el ser humiyá den desonor ora Jehú “a sigui padilanti i a mata tur esnan cu a resta dje cas di Acab na Jezreel i tur su hombernan distinguí i su conocínan i su sacerdotenan, te cu e no a laga ningun hende di dje keda na bida.”—2 Reynan 10:11.

 Cronologia di Jezreel

John Woodhead ta admití cu “ta masha difícil den arkeologia pa haña un base exacto pa determiná fecha.” P’esei, segun e arkeólogonan ta analisá e resultadonan dje shete añanan di cobamentu, nan ta compará esakinan cu loke nan a haña na otro sitionan arkeológico. Esaki a hiba na reevaluacion i debate. Di con? Pasobra semper for di tempu dje cobamentu dje arkeólogo israelí Yigael Yadin na Megido durante añanan ’60 i principio di añanan ’70, tabata un echo confirmá pa hopi hende den e comunidad arkeológico cu el a descubrí forti i portanan di stad cu ta data for dje periodo di rey Sálomon. Awor e fortinan i pochinan di klei i portanan cu nan a haña na Jezreel ta pone algun hende cuestioná e conclusionnan ei.

Por ehempel, e pochinan di klei cu nan a haña na Jezreel tabata idéntico na esnan dje capa di tera na Megido cu Yadin a relacioná cu e reinado di Sálomon. E structura di porta di stad i dimensionnan dje dos sitionan ta similar, si no ta idéntico. Woodhead ta bisa: “Tur e evidencianan ta sea data e sitio di Jezreel bek n’e periodo di Sálomon of e ta data e rasgonan n’e otro sitionan [Megido cu Hazor] mas despues, esta, n’e periodo di Acab.” Ya cu Bijbel claramente ta asociá e sitio di Jezreel cu e periodo di Acab, Woodhead ta considerá cu ta mas razonabel pa aceptá cu e capanan di tera aki ta reflehá e tempu di Acab su gobernacion. David Ussishkin ta di acuerdo: “Bijbel ta bisa cu Sálomon a construí Megido—e no ta bisa cu el a construí e portanan precis ei di stad.”

Nos Por Haña Sa e Historia di Jezreel?

E descubrimentunan arkeológico aki i e debate cu a sigui ta pone na duda e relato bíblico di Jezreel of di Sálomon? Eigenlijk, e controversia arkeológico tin poco di haci directamente cu e relato bíblico. Arkeologia ta analisá historia for di un base diferente di esun di naracion bíblico. E ta haci preguntanan diferente i ta pone énfasis riba otro cos. Bo por compará un studiante di Bijbel i un arkeólogo cu biaheronan riba rutanan cu ta mas of ménos mescos. Un biahero ta core cu auto riba caya, i e otro ta cana cantu di caminda. Nan enfoke i interesnan ta diferente. Tog, hopi bes nan perspectivanan ta complementá otro en bes di contradicí otro. Si compará impresion dje dos biaheronan, esei por resultá den comprendimentu penetrante i fasinante.

Bijbel ta contené un registro skirbí di suceso i hendenan di antigwedad; arkeologia ta purba recuperá informacion tocante e suceso i hendenan aki dor di analisá cualkier rastro di nan cu ainda por haña den tera. Sin embargo, generalmente e restonan aki ta hopi incompleto i nan por ser interpretá na vários manera. Relacioná cu esaki, Amihai Mazar ta comentá den su buki Archaeology of the Land of the Bible—10,000—586 B.C.E. (Arkeologia dje Pais di Bijbel—10.000—586 P.E.C.): “Trabou di coba den arkeologia . . . pa gran parti ta un arte i tambe un combinacion di entrenamentu i abilidad profesional. Ningun sistema di método rígido por garantisá éxito, i flexibilidad i pensamentu creativo di esnan cu ta dirigí ta obligatorio. Caracter, talento i sentido comun dje arkeólogonan no ta ménos importante cu su entrenamentu i recursonan disponibel.”

Arkeologia a confirmá e existencia di un centro real principal i militar na Jezreel, un centro cu a existí pa un temporada sorprendentemente corticu durante e periodo histórico cu ta coincidí cu gobernacion di Acab—net manera Bijbel ta relatá. Tin hopi pregunta fasinante cu a lanta i cu kisas arkeólogonan lo tin cu studia pa años. Sin embargo, e páginanan di e Palabra di Dios, Bijbel, ta sigui papia cu claridad, dunando nos e historia completo den un manera cu arkeólogonan no por haci nunca.

[Nota]

[Plachi na página 26]

Cobamentu arkeológico na Jezreel

[Plachi na página 28]

Imágen cananeo descubrí na Jezreel