E Manera Cu Jehova Ta Guia Nos
E Manera Cu Jehova Ta Guia Nos
“Guia mi den e caminda di rectitud.”—SALMO 27:11.
1, 2. (a) Con Jehova ta guia su pueblo awe? (b) Kico saca pleno probecho dje reunionnan ta encerá?
JEHOVA ta e Fuente di lus i berdad, manera nos a siña den e artículo anterior. Su Palabra ta iluminá nos caminda segun cu nos ta cana riba e caminda di rectitud. Jehova ta guia nos dor di instruí nos den su camindanan. (Salmo 119:105) Mescos cu e salmista di antaño, cu gratitud nos ta respondé n’e guia di Dios i ta pidi den oracion: “Instruí mi, o Jehova, den bo caminda, i guia mi den e caminda di rectitud.”—Salmo 27:11.
2 Un manera den cua Jehova ta duna instruccion awe ta mediante e reunionnan cristian. Nos ta saca pleno probecho dje percuracion amoroso aki dor di (1) asistí regularmente, (2) scucha cu atencion n’e programa i (3) participá di buena gana den partinan cu ta enbolbé e auditorio? Ademas, nos ta respondé cu gratitud ora nos ta ricibí sugerencia cu lo yuda nos keda “den e caminda di rectitud”?
Con Ta Bai cu Bo Asistencia na Reunion?
3. Con un sirbidó di tempu completo a desaroyá e custumber excelente di asistí regularmente na reunion?
3 Algun publicadó di Reino ta asistí na reunion regularmente for di nan infancia. “Tempu ami cu mi ruman muhernan a lanta den añanan ’30,” un minister Testigo di Jehova di tempu completo ta corda, “nos no tabatin nodi puntra nos mayornan si nos ta bai reunion. Nos tabata sa cu nos ta bai a ménos cu nos tabata malu. Nos famia simplemente no tabata falta reunion.” Mescos cu e profetisa Ana, e ruman muher aki ‘nunca no ta falta’ na Jehova su lugá di adoracion.—Lucas 2:36, 37.
4-6. (a) Di con algun publicadó di Reino ta falta reunion? (b) Pakico ta masha importante pa asistí na reunion?
4 Abo ta entre esnan cu ta asistí regularmente na reunion cristian, of bo a bira ta falta hopi? Algun cristian cu a pensa cu tabata bai hopi bon cu nan a dicidí di haci sigur. Pa un par di siman, nan a nota tur reunion na cua nan a asistí. Ora nan a repasá e registro na fin dje periodo designá, nan a keda sorprendí dje cantidad di reunion cu nan a falta.
5 ‘Nada straño,’ un hende lo bisa. ‘Awe, hende tin asina tantu preshon riba nan cu no ta fácil pa nan ta regular na reunion.’ Ta masha cierto cu nos ta bibando den un tempu di hopi tension. I pa colmo, sin duda e preshon lo aumentá. (2 Timoteo 3:13) Pero esei no ta asta mas motibu ainda pa asistí na reunion cu regularidad? Sin un dieta regular di alimento spiritual saludabel pa sostené nos, nos no por kere cu nos ta bai wanta e preshon cu e sistema aki ta pone riba nos. En berdad, sin asociacion regular nos por haña nos tentá pa bandoná “e caminda dje hustunan” completamente! (Proverbionan 4:18) Ta cierto cu ora nos yega cas despues di un dia pisá di trabou, no ta semper nos tin gana di bai reunion. Ma ora nos asistí tog, maske nos ta cansá, nos ta saca beneficio personal i nos ta animá nos compañeronan cristian na Salon di Reino.
6 Hebreonan 10:25 ta indicá un otro motibu importante pakico nos mester ta regular den asistí na reunion. Ei apostel Pablo ta exhortá compañeronan cristian pa reuní huntu ‘tantu mas segun cu nan ta contemplá e dia yegando cerca.’ Sí, nos no mester perde for di bista e echo cu “e dia di Jehova” ta yegando cerca. (2 Pedro 3:12) Si nos a concluí cu e fin dje sistema aki ta hopi leu, nos por cuminsá permití empeñonan personal pusha actividad spiritual necesario, manera baimentu di reunion, na un segundo plano. Anto manera Jesus a spierta, ‘di ripiente e dia ei por ta riba boso instantáneamente.’—Lucas 21:34.
Ser un Bon Scuchadó
7. Pakico ta importante pa mucha presta atencion na reunion?
7 No ta suficiente pa djis asistí na reunion. Nos tin cu scucha cuidadosamente i presta atencion na loke ta ser bisá. (Proverbionan 7:24) Esaki ta conta pa nos yunan tambe. Ora un mucha ta bai scol, e tin cu presta atencion n’e maestro, asta ora e no ta interesá den un cierto tema of ta parce di no ta comprend’é. E maestro sa cu si e mucha trata na presta atencion, lo e saca por lo ménos algun beneficio for dje les. No ta razonabel anto pa muchanan cu tin edad di bai scol presta atencion n’e instruccion cu nan ta haña na reunionnan di congregacion en bes di laga nan pega soño asina cu reunion cuminsá? Ta cierto cu entre e berdadnan precioso cu tin den e Scritura tin “algun cos cu ta difícil pa comprendé.” (2 Pedro 3:16) Pero nos no mag balotá un mucha su abilidad di siña. Dios no ta haci esei. Den tempu bíblico, el a manda su sirbidónan yong pa ‘scucha i siña i teme Jehova i percurá pa cumpli cu tur e palabranan dje ley aki,’ di cua algun sin duda tabata difícil pa mucha comprendé. (Deuteronomio 31:12; compará cu Levítico 18:1-30.) Jehova ta verwagt ménos di muchanan djawe?
8. Ki paso algun mayor ta tuma pa yuda nan yunan presta atencion na reunion?
8 Mayornan cristian ta realisá cu e necesidad spiritual di nan yunan ta ser satisfacé parcialmente dor di loke nan ta siña na reunion. P’esei, algun mayor ta pone nan yunan tira un cabes promé cu reunion pa nan por yega Salon di Reino refrescá i cla pa siña. Algun mayor sa limitá of asta sabiamente prohibí nan yunan di wak television riba anochinan di reunion. (Efesionan 5:15, 16) I e mayornan ei ta mantené distraicion na un mínimo, animando nan yunan pa scucha i siña, segun nan edad i abilidad.—Proverbionan 8:32.
9. Kico por yuda nos desaroyá nos abilidad di scucha?
9 Jesus tabata papia cu hende grandi ora el a bisa: “Presta atencion na con boso ta scucha.” (Lucas 8:18) E tempunan aki esei ta mas fácil pa bisa cu pa haci. Nos ta reconocé cu ta costa pa scucha cu atencion, pero bo por desaroyá e abilidad di scucha. Ora bo ta scucha un discurso bíblico of un parti na reunion, purba isolá e ideanan principal. Anticipá loke e orador ta bai bisa siguientemente. Busca puntonan cu bo por usa den bo ministerio of aplicá den bo bida. Repasá mentalmente e puntonan segun cu nan ta ser considerá. Tuma nota breve.
10, 11. Con algun mayor a yuda nan yunan bira mihó scuchadó, i ki métodonan abo a haña ta útil?
10 Hende ta siña bon custumber di scucha na un edad yong. Mayornan di algun mucha cu ainda no tin edad di bai scol, ta animá nan pa tuma “nota” asta promé cu nan siña lesa i skirbi. Nan ta pone un marca riba pida papel ora nan tende palabranan conocí manera “Jehova,” “Jesus” of “Reino.” Den e manera aki, mucha por siña concentrá riba loke ta ser bisá riba plataforma.
11 Tin biaha mester animá asta mucha mas grandi pa presta atencion. Ora un cabes di famia a ripará cu su yu homber di 11 aña tabata sinta wak leu durante un congreso cristian, el a duna e mucha un Bijbel i a pidié busca e textonan cu e oradornan tabata cita. E tata tabata tuma nota, miéntras cu su yu tabata busca e textonan den Bijbel p’e. Despues di esei, e mucha a sigui e programa di congreso cu mas entusiasmo.
Laga Tende Bo Bos
12, 13. Pakico ta importante pa participá den canta huntu como congregacion?
12 Rey David a canta: “Lo mi marcha rond di bo altar, o Jehova, pa laga tende gradicimentu na bos haltu.” (Salmo 26:6, 7) Reunionnan di Testigonan di Jehova ta duna oportunidad excelente pa nos expresá nos fe na bos haltu. Un manera cu nos por haci esaki ta dor di participá den cantamentu huntu como congregacion. Esaki ta un aspecto importante di nos adoracion, pero algu cu nos por neglishá fácilmente.
13 Algun mucha cu no por lesa ainda ta siña for di cabes cada siman e letranan dje canticanan di Reino cu lo usa na reunion. Nan ta keda encantá di por canta huntu cu hende grandi. Pero ora mucha bira un poco mas grandi, nan por ta ménos incliná pa djoin e cantamentu di cantica di Reino. Algun adulto tambe ta poco tímido pa canta na reunion. Ma cantamentu ta parti di nos adoracion, mescos cu sirbishi di veld ta parti di nos adoracion. (Efesionan 5:19) Nos ta haci nos best pa alabá Jehova den sirbishi di veld. Nos no por glorifik’é tambe dor di hisa nos bos—sea cu nos stem ta bunita of no—den cantica di alabansa di curason?—Hebreonan 13:15.
14. Pakico e material cu nos ta studia na reunion di congregacion ta merecé preparacion delantá cuidadoso?
14 Tambe nos ta trece alabansa na Dios ora nos ta duna comentario edificante durante e partinan di nos reunionnan cu ta rekerí participacion di auditorio. Esaki ta exigí preparacion. Ta tuma tempu pa meditá riba e aspectonan mas profundo dje Palabra di Dios. Apostel Pablo, kende tabata un studiante ferviente dje Scritura, a realisá esaki. El a skirbi: “O e profundidad dje rikesa i sabiduria i conocimentu di Dios!” (Romanonan 11:33) Cabesnan di famia, ta vital pa boso yuda cada miembro di boso famia investigá e sabiduria di Dios, manera e Scritura ta revel’é. Apartá poco tempu durante e studio bíblico di famia pa splica puntonan difícil i yuda boso famia prepará pa reunion.
15. Ki sugerencia lo por yuda bo comentá na reunion?
15 Si bo kier comentá cu mas frecuencia na reunion, pakico no prepará delantá algu cu lo bo kier bisa? E no tin nodi ta complicá. Un texto di Bijbel apropiado, lesá cu conviccion of algun palabra bon scogí expresá di curason, lo ser apreciá. Algun publicadó ta pidi e conductor di studio reservá e promé comentario riba un paragraf specífico pa nan, pa nan no perde e oportunidad di expresá nan fe.
E Inexperto Ta Bira Sabí
16, 17. Ki conseho un anciano a duna un sirbidó ministerial, i pakico esei tabata eficas?
16 Hopi bes nos ta ser recordá na reunionnan di Testigonan di Jehova pa lesa e Palabra di Dios tur dia. Ta refrescante pa haci esei. Tambe e ta yuda nos tuma decisionnan sabí, corigí debilidad den nos personalidad, resistí tentacion i recobrá nos balansa spiritual si nos a dal un stap den mal direccion.—Salmo 19:7.
17 Ancianonan di congregacion cu hopi experencia, ta para cla pa duna conseho bíblico cu ta adaptá na nos necesidadnan. Tur loke nos tin cu haci ta “sak’é” dor di busca nan conseho basá riba Bijbel. (Proverbionan 20:5) Un biaha un sirbidó ministerial hóben i entusiasmá a pidi un anciano sugerencia riba con pa bira mas útil den e congregacion. E anciano, cu tabata conocé e yoncuman bon, a habri su Bijbel na 1 Timoteo 3:3, cu ta bisa cu hombernan nombrá mester ta “razonabel.” El a mustra bondadosamente vários manera cu e yoncuman por a desplegá razonabilidad den su relacion cu otro hende. E conseho franco ei a ofendé e ruman hóben? Niun tiki! “E anciano a usa Bijbel,” el a splica, “pues mi a realisá cu e conseho a bini for di Jehova.” Masha gradicidu e sirbidó ministerial a aplicá e conseho i ta haciendo bon progreso.
18. (a) Kico a yuda un cristian hóben resistí tentacion na scol? (b) Ki textonan di Bijbel bo ta corda ariba ora bo haña bo enfrentá cu tentacion?
18 Tambe e Palabra di Dios por yuda hóbennan “hui for di e deseonan cu ta pertenecé na hubentud.” (2 Timoteo 2:22) Un hóben Testigo di Jehova cu recientemente a gradua for di scol secundario a logra resistí tentacion durante su añanan escolar dor di meditá riba cierto textonan di Bijbel i aplicá nan. Hopi bes el a pensa riba e conseho registrá na Proverbionan 13:20: “Esun cu ta cana cu hende sabí lo bira sabí.” Na armonia cu esei, el a soru cultivá amistad solamente cu mucha cu tabatin respet profundo pa principio bíblico. El a razoná: “Mi no ta mihó cu ningun otro hende. Si mi enbolbé mi cu e muchanan robes, lo mi kier agradá mi amigunan, i esei lo por hiba na problema.” Pablo su conseho registrá na 2 Timoteo 1:8 tambe a yud’é. El a skirbi: “No tene bergwensa dje testimonio tocante nos Señor, . . . sino aceptá bo parti den sufri maldad p’e bon nobo.” Na armonia cu e conseho ei, cu curashi el a compartí su creencianan bíblico cu su coleganan di scol na tur ocasion apropiado. Ki ora cu e tabata asigná pa duna un presentacion dilanti klas, e tabata scoge un tema cu a permitié duna un testimonio cu tacto relacioná cu e Reino di Dios.
19. Pakico un yoncuman no por a resistí e preshonnan dje mundu aki, pero kico a dun’é fortalesa spiritual?
19 Si un dia nos mester dual for dje “caminda dje hustunan,” e Palabra di Dios por yuda nos corigí nos pasonan. (Proverbionan 4:18) Un yoncuman cu ta biba na Africa a siña esaki personalmente. Ora un Testigo di Jehova a bishit’é, el a aceptá un studio di Bijbel. El a gusta loke e tabata siña pero pronto a haña su mes den mal asociacion na scol. Cu tempu, el a drif bai den un estilo di bida inmoral. “Mi concenshi tabata tormentá mi, i mi a stop di bai reunion,” e ta admití. Mas despues, el a cuminsá bai reunion atrobe. E yoncuman a duna e comentario revelador aki: “Mi a descubrí cu e motibu principal di tur esaki tabata malnutricion spiritual. Mi no tabatin studio personal. P’e motibu ei mi no por a resistí tentacion. E ora ei mi a cuminsá lesa E Toren di Vigilancia i Spierta! Gradualmente mi a recobrá mi fortalesa spiritual i a drecha mi bida. Esaki tabata un bon testimonio pa esnan cu a ripará e cambionan cu mi a haci. Mi a bautisá, i awor mi ta felis.” Kico a duna e yoncuman aki e fortalesa pa vence su debilidadnan carnal? El a recobrá su fortalesa spiritual dor di un studio di Bijbel personal i regular.
20. Con un hóben por resistí e atakenan di Satanas?
20 Hóbennan cristian, boso ta bou di atake awe! Si bo kier resistí e atakenan di Satanas, bo tin cu tuma alimento spiritual regularmente. E salmista, evidentemente un hóben tambe, a comprendé esaki. El a gradicí Jehova pa a percurá su Palabra di manera cu ‘un hóben por limpia su caminda.’—Salmo 119:9.
Unda Cu Dios Guia Nos, Nos Lo Bai
21, 22. Pakico nos no mester concluí cu e caminda dje berdad ta muchu difícil?
21 Jehova a guia e nacion di Israel saca for di Egipto pa drenta e Tera Primintí. E ruta cu el a scoge por a parce innecesariamente trabahoso for di un perspectiva humano. En bes di tuma un ruta aparentemente mas fácil i mas directo cantu di laman Mediteráneo, Jehova a guia su pueblo riba un ruta difícil den desierto. Sin embargo, esaki en realidad tabata un bondad di parti di Dios. Aunke e ruta cantu di laman tabata mas corticu, lo el a pone e israelitanan crusa e tera dje filisteonan hostil. Dor di scoge un otro ruta, Jehova a spar su pueblo di un confrontacion cu e filisteonan na cuminsamentu di nan biahe.
22 Mescos tambe, e caminda riba cua Jehova ta guia nos awe tin bes por parce difícil. Tur siman nos tin un programa yen di actividad cristian, incluso reunionnan di congregacion, studio personal i sirbishi di veld. Un otro caminda por parce mas fácil. Pero ta solamente si nos sigui e guia di Dios nos lo yega e destino cu nos ta trahando asina duru pa alcansá. P’esei, laga nos sigui tuma instruccion vital for di Jehova i permanecé riba “e caminda di rectitud” pa semper!—Salmo 27:11.
Bo Por Splica?
• Pakico specialmente nos tin cu asistí na reunion cristian cu regularidad?
• Kico mayornan por haci pa yuda nan yunan presta atencion na reunion?
• Kico ta encerá ser un bon scuchadó?
• Kico por yuda nos comentá na reunion?
[Preguntanan di Estudio]
[Plachi na página 16, 17]
Asistencia na reunion cristian ta yuda nos tene e dia di Jehova na mente
[Plachinan na página 18]
Tin vários manera pa alabá Jehova na reunion cristian