Presta Atencion na Dios Su Palabra Profetico
Presta Atencion na Dios Su Palabra Profetico
“Nos tin e palabra profético hací mas sigur; i boso ta haci bon di presta atencion na dje.”—2 PEDRO 1:19.
1, 2. Ki ehempel di un mesías falsu bo por relatá?
PA SIGLONAN mesíasnan falsu a purba predicí futuro. Den siglo cincu E.C., un homber cu a yama su mes Moises a convencé e hudiunan riba e isla di Creta cu é tabata e mesías i cu lo e libra nan for di opresion. Ora e dia di liberacion a yega, nan a subi tras di dje bai na un lugá haltu cu bista riba laman Mediteráneo. El a bisa nan, cu tur loke nan tabatin cu haci tabata tira nan curpa den laman, i laman lo a habri nan dilanti. Hopi di esnan cu a bula na awa a hoga, i e mesías falsu ei a disparcé for di esena.
2 Den siglo 12, un “mesías” a aparecé na Yemen. E califa, esta e gobernante, a pidié un señal pa wak si berdad e ta e “mesías.” E “mesías” aki a proponé pa e califa laga kita su cabes. El a profetisá cu lo e resucitá mesora i cu esei lo a sirbi como e señal. E califa a bai di acuerdo cu e plan—i esei tabata e fin dje “mesías” ei.
3. Ken ta e berdadero Mesías, i kico su ministerio a proba?
3 Mesíasnan falsu i nan profecianan ta un fracaso total. Pero ora hende ta presta atencion na Dios su palabra profético, hamas nan lo keda desilusioná. E berdadero Mesías, Jesucristo, tabata e cumplimentu bibu di hopi profecia bíblico. Por ehempel, ora Mateo, un dje escritornan di Evangelio, a cita e profecia di Isaías, el a skirbi: “‘O tera di Zabulon i tera di Neftalí, cant’i caminda di laman, na otro banda di Jordan, Galilea dje nacionnan!, e pueblo sintá den scuridad a mira un lus grandi, i en cuanto esnan sintá den un region di sombra di morto, lus a sali riba nan.’ Dje tempu ei padilanti Jesus a cuminsá predicá i bisa: ‘Boso repentí, pasobra e reino di shelu a yega cerca.’” (Mateo 4:15-17; Isaías 9:1, 2) Jesus tabata e “lus grandi” ei, i su ministerio a proba cu ta e tabata e Profeta cu Moises a predicí. Esnan cu nenga di scucha Jesus lo keda eliminá.—Deuteronomio 18:18, 19; Echonan 3:22, 23.
4. Con Jesus a cumpli cu Isaías 53:12?
4 Tambe Jesus a cumpli cu e palabranan profético di Isaías 53:12: “El a drama su alma te na morto mes, i ta cu kibradónan di ley nan a cont’é; i e mes a carga asta e picá di hopi hende, i el a intercedé pa e kibradónan di ley.” Conciente cu pronto lo el a entregá su bida humano como un rescate, Jesus a fortalecé e fe di su disipelnan. (Marco 10:45) El a haci esaki den un manera sobresaliente pa medio dje transfiguracion.
E Transfiguracion Ta Edificá Fe
5. Con lo bo describí e transfiguracion den bo mes palabra?
5 E transfiguracion tabata un suceso profético. Jesus a bisa: “E Yu di hende ta destiná pa bini den e gloria di su Tata cu su angelnan . . . En berdad mi ta bisa boso cu tin algun di esnan cu ta pará aki cu lo no purba morto di ningun manera te cu promé nan mira e Yu di hende bini den su reino.” (Mateo 16:27, 28) Di berdad algun dje apostelnan a mira Jesus bini den su Reino? Mateo 17:1-7 ta declará: “Seis dia despues Jesus a tuma Pedro i Santiago i Juan su ruman cuné i a hiba nan riba un ceru haltu caminda nan tabata nan so. I el a ser transfigurá dilanti nan.” Esta un suceso dramático! “Su cara a briya manera solo, i su bistí exterior a bira briyante manera lus. I, mira! Moises i Elías a aparecé na nan, ta combersá cuné.” Tambe, “un nubia briyante a tapa nan,” i nan a tende e stem di Dios mes bisa: “‘Esaki ta mi Yu, esun stimá, cu mi a aprobá; scuch’é.’ Ora nan a tende esaki, e disipelnan a cai boca abou i a haña masha miedu. Anto Jesus a yega cerca, a mishi cu nan i a bisa: ‘Lanta i no tene miedu.’”
6. (a) Pakico Jesus a yama e transfiguracion un vision? (b) E transfiguracion tabata un bista adelantá di kico?
6 Probablemente, e suceso asombroso aki a tuma lugá riba un lomba di ceru Hermon, caminda Jesus i e tres apostelnan a pasa anochi. Evidentemente e transfiguracion a tuma lugá anochi, loke a hacié asta mas bibu. Un motibu pakico Jesus a yam’é un vision tabata pasobra Moises i Elías, morto pa hopi tempu caba, no tabata literalmente presente. Ta Cristo so tabat’ei en persona. (Mateo 17:8, 9) Un manifestacion asina impresionante a duna Pedro, Santiago i Juan un bista adelantá espectacular di Jesus su presencia glorioso den poder di Reino. Moises i Elías ta haña cumplimentu den Jesus su co-herederonan ungí, i e vision tabata un confirmacion poderoso di su testimonio tocante e Reino i su futuro gobernacion.
7. Con nos por sa cu Pedro tabatin recuerdo bibu dje transfiguracion?
7 E transfiguracion a yuda fortalecé fe dje tres apostelnan cu lo a hunga un papel importante den e congregacion cristian. E briyamentu intenso di Cristo su cara, su pañanan blancu briyante i e stem di Dios mes declarando cu Jesus ta Su Yu stimá na ken nan mester a scucha—tur esaki a cumpli masha eficas cu nan propósito. Pero e apostelnan no tabatin mag di conta ningun hende e vision sino te ora Jesus a resucitá. Como 32 aña despues, ainda e vision aki tabata bibu den Pedro su mente. Ora el a referí na dje i na su nificacion, el a skirbi: “No, no tabata dor di sigui cuentanan falsu mañosamente inventá cu nos a haci boso conocé e poder i presencia di nos Señor Jesucristo, sino tabata dor di a bira testigo ocular di su magnificencia. Pasobra el a ricibí di Dios e Tata onor i gloria, ora palabranan manera esakinan a ser dirigí na dje mediante e gloria magnífico: ‘Esaki ta mi yu, mi stimá, kende mi mes a aprobá.’ Sí, nos a tende e palabranan aki dirigí for di shelu miéntras nos tabata cuné riba e ceru santu.”—2 Pedro 1:16-18.
8. (a) Na kico e declaracion di Dios relacioná cu su Yu a hala atencion? (b) Kico e nubia cu a aparecé den e transfiguracion a indicá?
8 Dios su declaracion, “esaki ta mi Yu, esun stimá, kende mi a aprobá; scuch’é,” tabata di sumo importancia. E declaracion aki ta hala atencion na Jesus como Dios su Rey entronisá, na ken henter creacion mester rindi obedencia. E nubia cu a tapa nan, a indicá cu e vision aki lo a cumpli na moda invisibel. Ta cu wowo di comprendimentu so esnan cu ta reconocé “e señal” di Jesus su presencia invisibel den poder di Reino, lo por dicernié. (Mateo 24:3) De facto, Jesus su instruccion pa no conta ningun hende e vision sino te ora e ser lantá for di morto, ta mustra cu ta te despues di su resureccion lo e ser halsá i glorificá.
9. Pakico e transfiguracion mester fortalecé nos fe?
9 Despues cu Pedro a referí n’e transfiguracion, el a declará: “P’e motibu ei nos tin e palabra profético hací mas sigur; i boso ta haci bon di presta atencion na dje manera na un lampi cu ta briya den un lugá scur, te ora di dia habri i un strea di dia lanta, den boso curason. Pasobra boso sa esaki caba, cu ningun profecia di Scritura ta nace for di ningun interpretacion privá. Pasobra profecia no a ser trecé na ningun tempu pa boluntad di hende, sino cu hende a papia di parti di Dios segun cu nan a ser hibá pa spiritu santu.” (2 Pedro 1:19-21) E transfiguracion ta subrayá cu Dios su palabra profético ta confiabel. Nos mester presta atencion n’e palabra ei i no bai tras di “cuentanan falsu mañosamente inventá” cu no tin ni apoyo ni aprobacion divino. E transfiguracion mester fortalecé nos fe den e palabra profético pasobra e bista adelantá ei den vision di Jesus su gloria i poder di Reino a bira un realidad. Sí, nos tin evidencia inekibocabel cu Cristo ta presente awe como un poderoso Rey celestial.
Con e Strea di Dia Ta Lanta
10. Ken of kico ta e “strea di dia” cu Pedro a mencioná, i pakico bo ta contestá asina?
10 Pedro a skirbi: “Boso ta haci bon di presta atencion na [e palabra profético] manera na un lampi cu ta briya den un lugá scur, te ora di dia habri i un strea di dia lanta.” Ken of kico e “strea di dia” ta? E palabra “strea di dia” ta aparecé un biaha so den Bijbel, i su nificacion ta similar na “strea di mainta.” Revelacion 22:16 ta yama Jesucristo “e briyante strea di mainta.” Den cierto temporada di aña, e tipo di streanan ei ta e últimonan pa subi den oost, net promé cu solo sali. Pues, nan ta anunciá cu un dia nobo ta habri. Pedro a usa e palabra “strea di dia” pa referí na Jesus despues cu El a ricibí poder di Reino. E tempu ei Jesus a lanta den henter universo, incluyendo nos tera! Como e Strea di Dia Mesiánico, e ta anunciá cu un dia of era nobo a habri pa humanidad obediente.
11. (a) Pakico 2 Pedro 1:19 no kier men cu “un strea di dia” ta lanta den hende su curason literal? (b) Con abo lo splica 2 Pedro 1:19?
11 Hopi traduccion di Bijbel ta promové e idea cu e palabranan di apostel Pedro registrá na 2 Pedro 1:19 ta referí na e curason literal di hende. Curason di un adulto ta pisa apénas 250 pa 300 gram. Con Jesucristo, cu awor ta un glorioso criatura spiritual inmortal den shelu, por lanta den e órgano humano chikitu aki? (1 Timoteo 6:16) Claro cu nos curason figurativo sí ta enbolbí den e asuntu aki, pasobra ta cuné nos ta presta atencion na Dios su palabra profético. Pero wak 2 Pedro 1:19 bon i lo bo mira cu e Traduccion di Mundu Nobo ta pone coma pa separá e frase intermedio “te ora di dia habri i un strea di dia lanta” for dje palabranan anterior den e versículo i for dje expresion “den boso curason.” Nos por expresá e versículo aki den e siguiente manera: ‘Nos tin e palabra profético hací mas sigur; i boso ta haci bon di presta atencion na dje manera na un lampi cu ta briya den un lugá scur, esta, den boso curason, te ora di dia habri i un strea di dia lanta.’
12. Den ki condicion curason di hende ta en general, pero kico ta e caso di cristiannan berdadero?
12 Den ki condicion e curason figurativo di humanidad pecaminoso ta en general? Wel, nan curason ta den scuridad spiritual! Pero si nos ta cristiannan berdadero, ta como si fuera nos tin un lampi ta briya den nos curason, cu di otro manera lo tabata scur. Manera e palabranan di Pedro a indicá, ta dor di presta atencion na Dios su palabra profético i iluminador cristiannan genuino lo keda alerto i iluminá te ora un dia nobo habri. Nan lo ta conciente dje echo cu e Strea di Dia a lanta, no den curason carnal humano, sino dilanti henter creacion.
13. (a) Pakico nos por ta sigur cu e Strea di Dia a lanta caba? (b) Pakico cristiannan por soportá e condicionnan difícil cu Jesus a predicí pa nos tempu?
13 E Strea di Dia a lanta caba! Nos por ta sigur di esei dor di presta atencion na e gran profecia di Jesus relacioná cu su presencia. Awe, nos ta experimentando su cumplimentu den sucesonan riba un escala sin precedente manera guera, hamber, temblor i e predicacion mundial dje bon nobo. (Mateo 24:3-14) Aunke e condicionnan difícil cu Jesus a predicí ta afectá nos como cristian tambe, nos por soportá nan cu pas i goso di curason. Pakico? Pasobra nos ta presta atencion na Dios su palabra profético i nos tin fe den su promesanan pa futuro. Nos sa cu nos ta na drempel dje mihó tempu cu a yega di existí pasobra nos ta hopi leu den “e tempu di fin”! (Daniel 12:4) Mundu ta den e estado di desesperacion profetisá na Isaías 60:2: “Mira! scuridad mes lo cubri e tera, i tiniebla diki lo cubri gruponan nacional.” Con un hende por haña su caminda den e scuridad aki? Hende mester presta atencion humildemente na Dios su palabra profético awor, promé cu ta lat. Hende di curason onrado mester acudí na Jehova Dios, e Fuente di bida i lus. (Salmo 36:9; Echonan 17:28) Ta asina so hende por haña berdadero iluminacion i e speransa di disfrutá dje futuro maraviyoso cu Dios tin prepará pa humanidad obediente.—Revelacion 21:1-5.
“E Lus A Bini na Mundu”
14. Kico nos tin cu haci pa nos mira e cumplimentu dje maraviyoso profecianan di Bijbel?
14 E Scritura ta mustra claramente cu Jesucristo ta reinando awor como Rey. Dor cu el a subi na poder na 1914, tin mas profecia maraviyoso pa cumpli. Pa nos mira nan cumplimentu, nos mester mustra cu nos ta hende mansu cu ta ehercé fe den Jesucristo, i repentí di obranan pecaminoso i erornan cu nos a cometé debí na ignorancia. Claro cu esnan cu ta stima scuridad lo no haña bida eterno. Jesus a bisa: “Esaki ta e base pa huicio, cu e lus a bini na mundu, pero hende a stima e scuridad mas bien cu e lus, pasobra nan obranan tabata malu. Pasobra esun cu ta practicá cosnan baho ta odia e lus i no ta bini n’e lus, pa su obranan no sea reprendé. Pero esun cu haci loke ta berdad ta bini n’e lus, pa su obranan ser manifestá como obranan hací na armonia cu Dios.”—Juan 3:19-21.
15. Kico lo pasa si nos neglishá e salbacion cu Dios a haci posibel pa medio di su Yu?
15 Lus spiritual a bini na mundu pa medio di Jesus, i ta vital pa scucha na dje. Pablo a skirbi: “Dios, kende hopi tempu pasá a papia na hopi ocasion i den hopi manera cu nos antepasadonan pa medio dje profetanan, a papia cu nos na fin dje dianan aki pa medio di un Yu, kende el a nombra heredero di tur cos.” (Hebreonan 1:1, 2) Kico lo pasa si nos neglishá e salbacion cu Dios a haci posibel pa medio di su Yu? Pablo a sigui bisa: “Si e palabra papiá mediante angel a resultá di ta firme, i tur ofensa i acto di desobedencia a ricibí castigu na armonia cu husticia, con nos por scapa si nos a neglishá un salbacion di tal grandesa di manera cu el a cuminsá ser papiá mediante nos Señor i tabata confirmá pa nos mediante esnan cu a tend’é, miéntras cu Dios a tuma parti dunando testimonio cu señalnan i tambe cu indicacionnan profético i vários obra poderoso i cu compartimentu di spiritu santu segun su boluntad?” (Hebreonan 2:2-4) Sí, Jesus ta para central den proclamacion dje palabra profético.—Revelacion 19:10.
16. Pakico nos por tin pleno fe den tur Jehova Dios su profecianan?
16 Manera nos a mira caba, Pedro a bisa: “Ningun profecia di Scritura ta nace for di ningun interpretacion privá.” Hende riba nan mes no por producí profecia berdadero, pero sí nos por pone pleno fe den tur Dios su profecianan. Esakinan ta originá cu Jehova Dios mes. Pa medio di spiritu santu el a capacitá su sirbidónan pa comprendé con profecia bíblico ta cumpli. Sí, nos ta gradicidu na Jehova cu nos a mira e cumplimentu di hopi dje profecianan ei desde aña 1914. I nos ta absolutamente sigur cu tur e sobrá profecianan tocante e fin dje mal sistema di cosnan aki lo cumpli. Ta vital pa nos sigui presta atencion na pronósticonan divino segun cu nos ta laga nos lus briya. (Mateo 5:16) Ki gradicidu nos ta cu Jehova ta laga ‘lus briya pa nos den e scuridad diki’ cu ta tapa tera awe!—Isaías 58:10.
17. Pakico nos tin mester di lus spiritual for di Dios?
17 Lus natural ta permití nos mira. Tambe e ta haci posibel pa mata cu ta duna nos un gran variedad di cuminda crece. Bida no ta posibel sin lus natural. Kico di lus spiritual? Lus spiritual ta guia nos i ta mustra nos e futuro manera e Palabra di Dios, Bijbel, ta predicié. (Salmo 119:105) Jehova Dios amorosamente ta ‘manda su lus i su berdad.’ (Salmo 43:3) Nos sigur mester mustra aprecio profundo p’e percuracionnan ei. P’esei laga nos haci nos máximo esfuerso pa absorbá e lus di “e glorioso conocimentu di Dios” pa esei iluminá nos curason figurativo.—2 Corintionan 4:6; Efesionan 1:18.
18. Kico Jehova su Strea di Dia ta cla pa haci awor?
18 E echo cu nos sa cu na 1914, Jesucristo, e Strea di Dia, a lanta den henter universo i a cuminsá cumpli cu e vision di transfiguracion, ta un gran bendicion pa nos! Jehova su Strea di Dia ta presente awor, cla pa efectuá e propósito di Dios den e transfiguracion su cumplimentu mas aleu—“e guera dje gran dia di Dios e Todopoderoso.” (Revelacion 16:14, 16) Despues cu Jehova bari e sistema bieu aki, lo e cumpli cu su promesa di “shelu nobo i un tera nobo” den cua nos por alab’é pa semper como e Soberano Señor di universo i e Dios di berdadero profecia. (2 Pedro 3:13) Te n’e gran dia ei, laga nos sigui cana den lus divino dor di presta atencion na Dios su palabra profético.
Con Lo Bo Contestá?
• Con lo bo describí e transfiguracion di Jesus?
• Den ki manera e transfiguracion ta edificá fe?
• Ken of kico ta Jehova su Strea di Dia, i na ki tempu el a lanta?
• Pakico nos mester presta atencion na Dios su palabra profético?
[Preguntanan di Estudio]
[Plachi na página 13]
Bo por splica e nificacion dje transfiguracion?
[Plachi na página 15]
E Strea di Dia a lanta caba. Abo sa con i na ki tempu?