E Evangelionan—E Debate Ta Sigui

E relatonan di Evangelio dje nacementu di Jesucristo ta berdad?

El a duna e Sermon Riba Ceru?

Di berdad Jesus a resucitá?

Realmente el a bisa: “Ami ta e caminda i e berdad i e bida”?—JUAN 14:6.

MAS o ménos 80 erudito a considerá e asuntunan aki na e Seminario di Jesus, cu desde 1985 a ser tené dos bes pa aña. E grupo di erudito aki a contestá tal preguntanan na un manera inusual. Participantenan na e seminario a vota riba cada cos cu Jesus supuestamente a bisa den e Evangelionan. Un voto corá ta indicá e opinion cu e declaracion en berdad ta di Jesus mes. Un voto ros ta nificá  cu e declaracion ta parce algu cu Jesus por a bisa. Un voto shinishi ta mustra cu e ideanan por ta casi mescos cu esnan di Jesus, pero cu e declaracion no a originá di dje. Un voto pretu ta totalmente negativo, loke ta nificá cu tal declaracion a sali for di tradicion di mas despues.

Siguiendo e método aki, e participantenan na e Seminario di Jesus a rechasá tur e cuater puntonan den forma di pregunta na principio di e artículo aki. De facto, pa 82 porciento di loke Jesus lo a bisa den e Evangelionan nan a vota pretu. Segun nan, solamente 16 porciento di loke ta relatá tocante Jesus den e Evangelionan i otro skirbimentu ta parce di ta auténtico.

Tal crítica contra e Evangelionan no ta nada nobo. Na 1774 tabatin un atake riba e Evangelionan ora un manuscrito di 1400 página di Hermann Reimarus, un profesor di idioma oriental na Hamburg, Alemania, a keda publicá despues di su morto. Eiden, Reimarus a presentá dudanan profundo tocante e autenticidad histórico di e Evangelionan. Su conclusionnan tabata basá riba un análisis lingwístico i aparente contradiccion hañá den e cuater relatonan di Evangelio di Jesus su bida. Desde e tempu ei, críticonan hopi bes a expresá duda tocante e autenticidad dje Evangelionan, te na cierto grado debilitando asina confiansa di e público den e scrituranan aki.

E característica comun di e eruditonan ei ta cu nan ta mira e relatonan di Evangelio como ficcion religioso transmití dor di diferente persona. Preguntanan cu normalmente e eruditonan cu ta duda sa lanta ta: Ta nan creencianan kisas a pone e skirbidónan di e cuater Evangelionan florea loke a pasa di berdad? Ta e division entre gruponan di interes den e comunidad cristian di promé a pone nan adaptá i agregá na Jesus su relato? Cua partinan dje Evangelionan tin mas chens di ta basá riba e berdad en bes di mito trahá?

Hende cu a lanta den un sociedad ateista of seglar ta kere cu Bijbel, incluso e Evangelionan, ta un buki yen di leyenda i mito. E historia di dramamentu di sanger, opresion, desunion i e conducta malbado di cristiandad tin otronan di shok. E personanan ei no ta mira pakico nan lo mester presta atencion na scrituranan cu cristiandad ta considerá sagrado. Nan ta haña cu e obranan cu a producí un religion hipócrita no por ta nada mas cu cuentanan sin balor.

Kico abo ta pensa? Bo mester laga algun erudito cu ta cuestioná e autenticidad histórico di e Evangelionan lanta e mésun dudanan den bo mente? Ora bo tende declaracionnan tocante e supuesto mitonan cu e skirbidónan di Evangelio a traha, lo bo mester laga esaki sagudí bo confiansa den loke nan a skirbi? Bo mester laga e registro malbado di cristiandad pone bo cuestioná e autenticidad di e Evangelionan? Nos ta invitá bo pa examiná algun echo.

[Plachi na página 4]

E Evangelionan ta contené echo of fábula?

[Rekonosementu]

Jesus Canando Riba Laman/ The Doré Bible Illustrations/Dover Publications

[Rekonosementu pa Potrèt na página 3]

Fondo, páginanan 3-5 i 8: Cortesia di e Galeria di Arte Freer, Smithsonian Institution, Washington, D.C.