E Palabra “Cristian” Ta Perdiendo Su Nificacion?

KICO kier men ser un cristian? Con lo bo contestá e pregunta ei? Nan a scoge algun hende aki aya di diferente pais, i a puntra nan net esei, i esakinan tabata algun di nan contestanan:

“Sigui Jesus i imit’é.”

“Ser un bon hende i compartí cu otro hende.”

“Aceptá Cristo como Señor i Salbador.”

“Bai misa, resa rosario i ricibí Santa Comunion.”

“Mi no ta kere cu bo mester bai misa pa bo ta un cristian.”

Asta diccionarionan ta confundí hende cu tur tipo di definicion. De echo, un di nan tin dies entrada bou dje palabra “cristian,” for di “cu ta kere of ta pertenecé na e religion di Jesucristo,” te na “un hende decente of cu bon manera.” No ta straño cu hopi hende tin dificultad pa splica kico kier men ser un cristian.

Un Tendencia di Liberalisacion

Awendia, bou di esnan cu ta yama nan mes cristian, asta bou di esnan cu ta sinta huntu riba e mésun banki di misa, bo por haña un gran variedad di punto di bista riba temanan manera cu si Bijbel ta inspirá dor di Dios, e teoria di evolucion, metementu di iglesia den política, i compartimentu di bo fe cu otronan. Hopi bes, cuestionnan moral riba temanan manera aborto, homosexualidad i parehanan cu ta biba huntu sin casa ta para bira foco di controversia. E tendencia bisto ta di liberalisá.

Por ehempel, tribunal di un iglesia protestant a vota recientemente pa sostené e derecho di un iglesia “di eligí un anciano cu ta laga sa públicamente cu e ta homosexual pa forma parti di su hunta di directiva,” segun e revista Christian Century ta informá. Algun teólogo a asta expresá e punto di bista cu fe den Jesus no ta crucial pa salbacion. Nan ta kere cu hudiu, moslim i otronan “por tin e mésun chens di drenta shelu [cu cristiannan],” segun un reportahe den The New York Times.

Purba imaginá bo un marxista ta boga pa capitalismo of un demócrata ta promové dictadura, of un defensor di medio ambiente ta apoyá rosamentu di mondi. Lo bo bisa: “E hende ei no por ta un berdadero marxista, demócrata of defensor di medio ambiente,” i lo bo tin rason. Tog, ora bo considerá e variedad di punto di bista cu tin bou di esnan cu ta yama nan mes cristian awe, bo ta topa creencianan cu ta totalmente contrali na otro i cu hopi bes ta contradicí loke e Fundador di cristianismo, Jesucristo, a siña. Kico esei ta mustra tocante nan tipo di cristianismo?—1 Corintionan 1:10.

Manera nos lo mira, e ansha pa cambia siñansanan cristian pa nan pas cu e spiritu di nos época tin un historia largu. Kico Dios i Jesucristo ta pensa di cambionan asina? Iglesianan cu ta apoyá siñansanan cu no ta fundá riba cristianismo tin derecho di yama nan mes cristian? Nos lo considerá e preguntanan aki den e siguiente artículo.