Bo Ta Kere den Loke Bo No Por Mira?

ORA un persona bisa: ‘Mi ta kere solamente den loke mi por mira,’ e no kier men e literalmente. Eigenlijk, nos tur ta kere den cosnan cu nos no por mira.

Por ehempel, kisas na scol bo a yega di haci un experimento pa proba existencia di campo magnético. E experimento lo por ta lo siguiente: Tira algun sas di heru riba un blachi di papel. Despues pone e blachi riba e magneet. Si sagudí e papel un tiki, como si fuera ta trata di  magia, e sas di heru ta hala bai huntu n’e puntanan dje magneet i nan ta forma e patronchi dje campo magnético. Ora bo a hacié, bo por a mira e campo magnético mes? No, pero su efecto riba e sas di heru sí tabata bisto, dunando bo un prueba convincente cu e forsa di magneet ta existí.

Tin otro cosnan cu nos no ta mira, pero cu nos ta aceptá sin mas. Ora nos ta wak un pintura bunita of ta admirá un escultura fini, nos no ta duda dje existencia di un pintor of escultor. Pues, ora nos ta contemplá un waterval of ta wak un bahada di solo, esei no mester move nos pa por lo ménos considerá e posibilidad cu nan ta obra di un Gran Artista of Escultor?

Di Con Algun Hende No Ta Kere

Ta un ironia cu algun hende a stop di kere den Dios pa motibu di loke iglesia a siña nan. Esaki tabata e caso di un homber norwechi kende a ser siñá cu Dios ta kima hende malbado den fiernu di candela. E homber ègt no por a comprendé ki clase di Dios lo a tormentá hende dje manera ei, pues el a bira ateista.

Sin embargo, despues e homber a bai di acuerdo pa investigá Bijbel cu yudansa di un Testigo di Jehova. El a keda asombrá di sa cu Bijbel no ta siña cu Dios ta torturá e malbadonan den fiernu di candela. Bijbel ta compará morto cu soño. Den graf nos no ta sinti dolor; nos no ta conciente di nada en absoluto. (Eclesiástes 9:5, 10) Tambe e homber a siña cu hende cu Dios husga como malbado incoregibel lo keda den nan graf pa semper. (Mateo 12:31, 32) Na Dios su debido tempu, e resto dje mortonan lo ta resucitá cu e prospecto di haña bida eterno bou di condicionnan paradísico. (Juan 5:28, 29; 17:3) E splicacion aki tabata razonabel. E tabata na armonia cu e declaracion di Bijbel cu “Dios ta amor.” (1 Juan 4:8) E homber sincero aki a sigui su studio dje Palabra di Dios i, cu tempu, el a bin stima e Dios di Bijbel.

Otronan ta nenga e existencia di un Creador amoroso debí n’e echo cu tin asina tantu sufrimentu i inhusticia. Nan ta di acuerdo cu un homber sueco cu un biaha a mustra na shelu i a puntra: “Con por ta cu aya riba tin un Dios todopoderoso i generoso den tur sentido, miéntras cu aki bou nos tin asina tantu corupcion i maldad?” Dor cu ningun hende no por a contestá su pregunta, e tambe a bira ateista. Despues el a cuminsá studia Bijbel cu Testigonan di Jehova. El a haña sa cu e Palabra di Dios ta percurá contesta satisfaciente pa e pregunta di tur  tempu: Pakico Dios ta permití maldad? *

E homber sincero aki a haña sa cu existencia di maldad riba su mes no ta un prueba cu Dios no ta existí. Pa ilustrá esei: Kisas un hende ta diseñá un cuchú pa corta carni. Un cliente kisas ta cumpra e cuchú p’e us’é, no pa corta carni, sino pa cometé asesinato. E echo cu a haci maluso dje cuchú di ningun manera no ta refutá e existencia di esun cu a trah’é. Mescos, e echo cu hende no a usa e tera na armonia cu e propósito cu tabata intencioná p’e, no ta nificá cu e no tabatin un Creador.

Bijbel ta siña cu Dios su obra ta perfecto. Cuné “no tin inhusticia; hustu i recto e ta.” (Deuteronomio 32:4) Dios ta duna hende bon regalo, pero hende a malusá algun dje regalonan, causando sufrimentu incalculabel. (Santiago 1:17) Sin embargo, Dios lo trece un fin na sufrimentu. Despues di esei, “e mansunan mes lo poseé e tera, . . . i nan lo biba pa semper riba dje.”—Salmo 37:11, 29.

Sufrimentu di su próhimo a conmové e homber sueco mencioná anteriormente. Eigenlijk, su preocupacion amoroso pa otro hende ta confirmá e existencia di Dios. Con asina?

Pa mayoria hende, e único alternativa pa no kere den Dios ta kere den evolucion. Evolucionistanan ta siña “sobrebibencia di esun mas fuerte,” esta, cu tantu hende como bestia ta competí cu nan sorto pa sobrebibí. Esun mas fuerte ta biba; esun mas swak ta muri. Segun nan, esei ta e areglo natural di cosnan. Pero si ta “natural” cu esnan swak tin cu muri pa traha lugá pa esnan fuerte, con nos por splica e echo cu algun hende fuerte, manera por ehempel e homber sueco, ta ser conmoví ora nan mira nan próhimo ta sufri?

Siña Conocé Dios

Dor cu Dios no tin curpa di hende, nos no por mir’é. Tog, Dios kier pa nos conoc’é. Un manera cu nos por siña conoc’é ta dor di observá su obranan extraordinario—e “pintura” i “esculturanan” di creacion. Na Romanonan 1:20, Bijbel ta declará: “[Dios] su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad.” Sí, mescos cu studia un pintura of un escultura por yuda bo conocé e personalidad dje artista a fondo, meditá riba Dios su obranan maraviyoso por yuda bo conocé su personalidad mas mihó.

Claro cu nos no por contestá tur pregunta di bida cu ta preocupá nos dor di solamente wak Dios su obranan di creacion. Pero sí nos por haña contesta pa e preguntanan ei dor di investigá e Palabra di Dios, Bijbel. Tabata dor di lesa Bijbel cu un mente habrí cu e dos hombernan mencioná anteriormente a yega n’e conclusion cu Dios ta existí i cu e ta interesá den loke ta sosodé cu nos.

[Nota]

[Rekonosementu pa Potrèt na página 28]

J. Hester and P. Scowen (AZ State Univ.), NASA