Bo Ta un Cristian “Plenamente Desaroyá”?

“ORA mi tabata baby, mi tabata papia manera baby, pensa manera baby, razoná manera baby.” Esei ta palabranan di apostel Pablo. Sí, un tempu nos tur tabata baby cu no por a haci nada. Sin embargo, nos no a keda asina pa semper. Pablo a remarcá: “Awor cu mi a bira homber, mi a eliminá e característicanan di baby.”—1 Corintionan 13:11.

Den un manera similar, tur cristian ta cuminsá como baby spiritual. Pero cu tempu, nan tur por “alcansá unidad den e fe i den e conocimentu exacto dje Yu di Dios, te na un homber maduro, te n’e midí di estatura cu ta pertenecé n’e plenitud di e Cristo.” (Efesionan 4:13) Promé Corintionan 14:20 ta exhortá nos: “Rumannan, no bira mucha chikitu den e facultad di comprendimentu, . . . Bira plenamente desaroyá den e facultad di comprendimentu.”

E presencia di cristiannan maduro, plenamente desaroyá, ta un bendicion p’e pueblo di Dios awe, foral dor cu tin asina tantu hende nobo. Cristiannan plenamente desaroyá ta duna stabilidad na un congregacion. Nan tin un impacto positivo riba e ambiente of actitud dominante dje congregacion na cua nan ta asistí.

Maske crecementu físico ta mas o ménos automático, crecementu spiritual ta bini solamente cu tempu i esfuerso. No ta straño anto, cu den tempu di Pablo, algun cristian no a “sigui padilanti na madures,” aunke nan tabata sirbi Dios pa hopi aña. (Hebreonan 5:12; 6:1) Kico di  abo? Sea cu bo a sirbi Dios pa hopi aña of pa solamente un periodo di tempu relativamente corticu, lo ta bon pa bo examiná bo mes onestamente. (2 Corintionan 13:5) Bo ta entre esnan cu di berdad por ser yamá cristian maduro of plenamente desaroyá? Si esei no ta e caso, con bo por bira un cristian asina?

“Plenamente Desaroyá den e Facultad di Comprendimentu”

Ta fácil pa un baby spiritual ser “tirá p’aki i p’aya manera dor di olanan i hibá di aki p’aya dor di tur bientu di siñansa pa medio di triki di hende, pa medio di astucia den inventá eror.” P’esei Pablo a urgi: “Laga nos mediante amor crece den tur cos te na esun cu ta cabes, Cristo.” (Efesionan 4:14, 15) Con un hende por logra esei? Hebreonan 5:14 ta bisa: “Cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí tantu loke ta bon como loke ta malu.”

Ripará cu hende maduro tin nan facultadnan perceptivo entrená mediante uso, of experencia den aplicá principionan di Bijbel. Ta obvio anto cu hende no ta madurá di anochi pa mainta; ta tuma tempu pa crece spiritualmente. Tog, bo por haci hopi pa facilitá bo crecementu dor di haci studio personal, foral den e cosnan profundo dje Palabra di Dios. Último tempu E Toren di Vigilancia a trata vários tema profundo. Hende maduro no ta evitá e artículonan ei pasobra nan ta contené cosnan “difícil pa comprendé.” (2 Pedro 3:16) Mas bien, ansiosamente nan ta come di e cuminda sólido ei!

Predicadó i Maestronan Celoso

Jesus a instruí su disipelnan: “Bai pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) Participacion celoso den e trabou di predicá tambe por stimulá bo crecementu spiritual. Pakico no haci esfuerso pa bo tin un pleno participacion segun cu bo circunstancia ta permití?—Mateo 13:23.

Tin bes cu preshon di bida ta hacié difícil pa saca tempu pa predicá. Sin embargo, dor di “haci esfuerso vigoroso” como un predicadó, bo ta demostrá cuantu importancia bo ta duna n’e “bon nobo.” (Lucas 13:24; Romanonan 1:16) I asina bo por ser considerá como un “ehempel pa esnan fiel.”—1 Timoteo 4:12.

Wardadónan di Integridad

Crece na madures ta encerá tambe haci esfuerso pa mantené bo integridad. Segun e registro di Salmo 26:1, David a declará: “Husga mi, o Jehova, pasobra mi a cana den mi propio integridad.” Integridad ta puresa moral, algu completo. Sin embargo, e no kier men perfeccion. David mes a cometé vários picá serio. Pero debí cu el a aceptá reprendementu i a corigí su caminda, el a demostrá cu ainda su curason tabatin amor berdadero pa Jehova Dios. (Salmo 26:2, 3, 6, 8, 11) Integridad ta encerá debocion completo di curason. David a bisa su yu Sálomon: “Conocé e Dios di bo tata i sirbié cu un curason completo.”—1 Crónicanan 28:9.

Mantené integridad ta encerá ‘no ser parti dje mundu,’ kedando pafó di política dje nacionnan i nan gueranan. (Juan 17:16) Tambe bo tin cu abstené di prácticanan corupto manera, fornicacion, adulterio i uso di droga. (Galationan 5:19-21) Pero mantené integridad ta nificá mas cu evitá e cosnan ei. Sálomon a spierta: “Muskita morto ta loke ta haci zeta  di trahadó di ungwento hole stinki i bomba. Asina un poco bobedad ta haci cu hende cu ta precioso pa sabiduria i gloria.” (Eclesiástes 10:1) Sí, asta “un poco bobedad,” manera chiste inapropiado of flirtmentu cu e sexo opuesto por ruina e reputacion di un persona cu ta “precioso pa sabiduria.” (Job 31:1) P’esei, demostrá bo madures dor di haci esfuerso pa henter bo conducta ta ehemplar, evitando asta e “aparencia di maldad.”—1 Tesalonicensenan 5:22, King James Version.

Esnan Leal

Un cristian plenamente desaroyá ta leal tambe. Manera nos por lesa na Efesionan 4:24, apostel Pablo a urgi e cristiannan: “Bisti e personalidad nobo cu a ser creá segun e boluntad di Dios den berdadero husticia i lealtad.” Den e Scritura Griego, e palabra den e idioma original pa “lealtad” ta carga e pensamentu di santidad, husticia i respet profundo. Un persona leal ta deboto, religioso; cuidadosamente e ta cumpli cu tur su debernan pa cu Dios.

Cua ta algun manera den cua lo bo por desaroyá e clase di lealtad ei? Unu lo ta dor di cooperá cu bo ancianonan di congregacion. (Hebreonan 13:17) Reconociendo cu Jesus ta e Cabes nombrá dje congregacion cristian, cristiannan maduro ta leal na esnan nombrá “pa pastoreá e congregacion di Dios.” (Echonan 20:28) Lo ta ki inapropiado pa cuestioná of debilitá e autoridad di ancianonan nombrá! Tambe bo mester tin un sentido di lealtad pa cu “e esclabo fiel i discreto” i e agencianan cu e ta usa pa distribuí ‘alimento spiritual n’e debido tempu.’ (Mateo 24:45) Sea lihé pa lesa i aplicá e informacion cu tin den E Toren di Vigilancia i e otro publicacionnan cu ta compañ’é.

Mustra Amor Mediante Bo Accionnan

Pablo a skirbi e cristiannan na Tesalónica: “E amor di un i tur di boso ta aumentá pa otro.” (2 Tesalonicensenan 1:3) Crece den amor ta un aspecto masha importante di crecementu spiritual. Jesus a bisa, manera ta pará skirbí na Juan 13:35: “Dor di esaki tur lo sa cu boso ta mi disipelnan, si boso tin amor entre boso.” E amor fraternal ei no ta ser caracterisá dor di simpel emocion of sintimentu. Vine’s Expository Dictionary of Old and New Testament Words ta remarcá: “Ta solamente n’e actonan cu amor ta impulsá, bo por conoc’é.” Sí, den e aspecto aki bo ta purba alcansá madures dor di pone amor den accion!

Por ehempel, na Romanonan 15:7, nos ta lesa: “Ricibí otro cu gustu.” Un manera pa mustra amor ta dor di cumindá—calurosamente i cu smak—bo compañeronan creyente i esnan nobo na reunionnan di congregacion! Siña conocé nan personalmente. Mustra “interes personal” den otronan. (Filipensenan 2:4) Kisas bo por asta mustra hospitalidad i invitá vários ruman na bo cas. (Echonan 16:14, 15) Tin biaha imperfeccion di otronan por test e profundidad di bo amor, pero segun cu bo ta siña ‘soportá nan den amor,’ bo ta demostrá cu bo ta birando plenamente desaroyá.—Efesionan 4:2.

Usa Bo Pertenencianan pa Promové Adoracion Puru

Den tempu di antigwedad, no ta henter e pueblo di Dios a cumpli cu nan responsabilidad di mantené e tempel di Jehova. P’esei Dios a manda profetanan manera Ageo i Malakías, pa lanta Su pueblo pa actua den e aspecto aki. (Ageo 1:2-6; Malakías 3:10) Awe, cu goso cristiannan maduro ta usa nan pertenencianan pa apoyá e adoracion di Jehova. Imitá e personanan ei dor di sigui e principio na 1 Corintionan  16:1 i 2, i riba un base regular, “pone algu un banda” pa contribuí n’e congregacion i n’e obra mundial di Testigonan di Jehova. E Palabra di Dios ta primintí: “Esun cu ta sembra abundantemente lo cosechá abundantemente tambe.”—2 Corintionan 9:6.

No pasa por haltu di otro pertenencia cu bo tin, manera por ehempel tempu i energia. Purba ‘cumpra tempu’ for di actividadnan ménos importante. (Efesionan 5:15, 16; Filipensenan 1:10) Siña usa bo tempu den un manera mas eficiente. Dor di haci esei kisas oportunidad ta habri pa bo participá den proyectonan pa mantené Salon di Reino i den otro actividadnan cu ta promové adoracion di Jehova. Usa bo pertenencianan den e manera aki lo duna mas evidencia cu bo ta birando un cristian plenamente desaroyá.

Sigui Padilanti na Madures

Homber i muhernan cu ta gusta studia i ta bon informá, cu ta predicadónan celoso, cu tin integridad firme, cu ta leal i amoroso i cu ta dispuesto pa duna sosten físico i material n’e obra di Reino, ta realmente un gran bendicion. Nada straño anto cu apostel Pablo a exhortá: “Awor cu nos a bandoná e doctrina primario tocante e Cristo, laga nos sigui padilanti na madures”!—Hebreonan 6:1.

Abo ta un cristian maduro, plenamente desaroyá? Of ainda bo ta un baby spiritual den algun aspecto? (Hebreonan 5:13) Den tur dos caso, sea decididu pa dedicá bo mes na studio personal, na predicá i na mustra amor na bo rumannan. Aceptá cu gustu cualkier conseho of disiplina cu esnan maduro ta duna bo. (Proverbionan 8:33) Carga bo responsabilidad cristian completo. Cu tempu i esfuerso, bo tambe por “logra alcansá unidad den e fe i den e conocimentu exacto dje Yu di Dios, te na un homber maduro, te n’e midí di estatura cu ta pertenecé n’e plenitud di e Cristo.”—Efesionan 4:13.

[Komentario na página 27]

Cristiannan plenamente desaroyá ta duna stabilidad na un congregacion. Nan tin un impacto positivo riba e ambiente of actitud dominante dje congregacion

[Plachinan na página 29]

Esnan maduro ta contribuí n’e spiritu dje congregacion dor di mustra interes den otronan