Bo Sa Con pa Warda?

BO POR imaginá cuantu tempu hende ta pasa tur aña ta warda so? Nan ta warda den rij den tienda of na pomp di gasolin. Nan ta warda pa ser sirbí den restaurant. Nan ta warda pa dokter of dentista wak nan. Nan ta warda riba bus of trein. Sí, un cantidad sorprendente di tempu den bida di un persona ta bai na warda pa cos sosodé. Segun un cálculo, alemannan so ta perde 4,7 mil miyon ora pa aña wardando den tráfico pegá! Un persona a calculá cu esaki ta igual cu e cantidad total di añanan di bida cu nan ta verwagt di mas o ménos 7.000 hende.

Warda por ta masha frustrante. Ta parce cu e dianan aki no tin suficiente tempu pa haci tur cos, i pensa riba e otro cosnan ei cu nos tin cu haci por haci wardamentu bira un prueba pisá. Autor Alexander Rose a yega di bisa: “Mitar dje agonia di biba ta warda.”

Estadista mericano Benjamin Franklin a reconocé cu wardamentu por ta costoso tambe. Mas cu 250 aña pasá, el a comentá: “Tempu ta oro.” Ta p’esei negoshinan ta busca maneranan pa evitá tardansa innecesario durante ora di trabou. Mas mercancia producí den ménos tempu por nificá mas ganashi. Negoshinan cu tin contacto directo cu público ta ofrecé servicio rápido: ‘fast food,’ ‘drive-thru’ di banco, i cosnan por estilo, pasobra nan sa cu agradá e cliente ta encerá reducí e tempu cu nan mester warda.

Desperdiciando Nos Bida

Ralph Waldo Emerson, poëta mericano di siglo 19, un biaha a keha: “Esta un gran parti di bida humano ta bai perdí na warda!” Mas recientemente, autor Lance Morrow a keha tocante con laf i físicamente incómodo wardamentu ta. Pero despues el a papia dje “miseria mas sutil di warda.” Kico esei ta? “E echo cu bo sa cu bo recurso mas balioso, tempu, un fraccion di  bo bida, ta ser hortá, ta bai perdí irecuperablemente.” Tristu, pero berdad. Tempu perdí pasobra bo tin cu warda, ta perdí pa semper.

Claro cu si bida no tabata asina corticu, wardamentu lo no tabata un preocupacion dje grandi ei. Pero bida ta corticu. Miles di aña pasá e salmista bíblico a comentá: “Riba nan mes e dianan di nos añanan ta setenta aña; i si debí na poder special nan ta ochenta aña, sin embargo nan insistencia ta den afan penoso i cosnan perhudicial; pasobra e tin cu pasa bai lihé, i nos ta bula bai.” (Salmo 90:10) Unda cu nos ta biba i ken cu nos ta, nos bida—e dianan, oranan i minuutnan cu tin nos dilanti ora nos nace—ta limitá. Pero tog nos no por evitá situacionnan caminda nos ta haña nos mes forsá na desperdiciá algun dje tempu precioso ei wardando riba sucesonan of riba hende.

Siña Con pa Warda Riba Algu

Mayoria di nos a yega di ta den auto cu un shofer cu constant ta purba pasa e vehículo su dilanti. Hopi bes no tin ningun motibu di importancia, e shofer no tin un cita urgente. Tog, e no por wanta cu ta un otro shofer ta dicta con lihé e tin cu core. Su falta di pacenshi ta revelá cu e no a siña warda. Siña? Sí, sa con pa warda ta un les cu nos tin cu siña. Niun hende no ta nace cu e abilidad di sa con pa warda. Babynan ta exigí atencion inmediato ora nan tin hamber of ora nan ta sinti nan incómodo. Ta ora nan bira mas grandi numa nan ta comprendé cu tin biaha nan tin cu warda pa haña loke nan kier. P’esei, como cu wardamentu ta un parti inevitabel di bida, un persona cu sa con pa warda cu pacenshi ora ta necesario, ta mustra cu e ta un persona maduro.

Claro cu tin situacionnan urgente caminda ta di comprendé cu hende ta bira impaciente. Un esposo hóben cu ta rùsh hiba su casá hospital pasobra nan baby ta bai nace, di mes lo ta impaciente si e hañ’é cu tardansa. E angelnan cu a urgi Lot pa bandoná Sódoma, no tabata prepará pa warda miéntras cu Lot a tarda. Destruccion tabata cerca, i e bida di Lot cu su famia tabata den wega. (Génesis 19:15, 16) Sin embargo, den mayoria caso bida no ta den wega ora hende ta haña nan obligá na warda. Den e casonan ei, cos lo por ta hopi mas agradabel si tur hende siña tene pacenshi, asta si mester warda pasobra un hende ta ineficiente of no ta interesá. Ademas, lo ta mas fácil pa mustra pacenshi si tur hende siña usa e tempu cu nan tin cu warda den un manera probechoso. E cuadro na página 5 tin algun sugerencia pa haci wardamentu no solamente soportabel sino asta probechoso.

Nos no por pasa por haltu dje echo cu un spiritu impaciente kisas ta revelá un actitud orguyoso, un sintimentu cu bo ta muchu importante pa nan laga bo warda. Pa ken cu tin un actitud asina, ta bale la pena p’e considerá e siguiente palabranan di Bijbel: “Mihó ta un hende cu tin pacenshi cu un hende cu tin spiritu soberbe.” (Eclesiástes 7:8) Soberbia, of orguyo, ta un defecto serio di personalidad, i e proverbio bíblico ta bisa: “Tur hende cu ta orguyoso di curason ta algu repugnante pa Jehova.” (Proverbionan 16:5) P’esei siña tene pacenshi—esta siña con pa warda—kisas ta rekerí pa nos haci un bon examinacion di nos mes i di nos relacion cu hende rond di nos.

Pacenshi Lo Ser Recompensá

Normalmente ta mas fácil pa nos warda si nos ta convencí cu loke nos ta warda riba dje ta bal e tardansa i cu di berdad lo e bini cu tempu. Relacioná cu esaki, ta bon pa refleccioná riba e echo cu tur adoradó sincero di Dios ta wardando riba cumplimentu di su promesanan magnífico hañá den Bijbel. Por ehempel, un salmo bou di inspiracion divino, ta bisa nos: “E hustunan mes lo poseé e tera, i nan lo biba pa semper riba dje.” Apostel Juan a ripití e promesa aki ora el a bisa: “Esun cu haci e boluntad di Dios ta permanecé pa semper.” (Salmo 37:29; 1 Juan 2:17) Claramente anto, si nos por a biba pa semper, wardamentu lo no ta un problema grandi. Pero awor akí nos no ta bibando pa semper. Ta asta realístico pa papia tocante bida eterno?

Promé cu bo contestá, pensa riba e echo cu Dios a crea nos promé mayornan cu e prospecto  di biba pa semper. Tabata pasobra nan a peca cu nan a perde e prospecto ei tantu pa nan mes como pa nan yunan, incluso nos. Sin embargo, mesora despues cu nan a peca, Dios a anunciá su propósito di kita e efectonan di nan desobedencia. El a primintí binida di un “simia” cu a resultá di ta Jesucristo.—Génesis 3:15; Romanonan 5:18.

Ta nos mester dicidí si nos individualmente lo beneficiá dje cumplimentu di su promesanan of no. Pa beneficiá di esei lo rekerí pacenshi. Afin di yuda nos siña tene e clase di pacenshi aki, Bijbel ta animá nos pa meditá riba e ehempel di un cunukero. E ta sembra su simia i e no tin otro opcion sino di warda cu pacenshi—haciendo loke e por pa protehá su plantacion—te ora ta tempu di cosecha. E ora ei su pacenshi ta ser recompensá, i e ta mira e fruta di su labor. (Santiago 5:7) Apostel Pablo ta mencioná un otro ehempel di pacenshi. E ta recordá nos di homber i muhernan fiel di pasado. Nan a spera ansiosamente e realisacion di Dios su propósitonan, pero nan tabatin cu warda riba Dios su tempu señalá. Pablo a animá nos pa imitá e personanan aki, “cu mediante fe i pacenshi ta heredá e promesanan.”—Hebreonan 6:11, 12.

Sí, wardamentu ta un echo inevitabel di bida. Pero e no tin nodi ta un fuente constante di agonia. Pa esnan cu ta warda riba e realisacion dje promesanan di Dios, e por ta un fuente di goso. Nan por yena e tempu cu nan ta warda dor di cultivá un relacion cerá cu Dios i haci obranan cu ta demostrá nan fe. I mediante oracion, studio i meditacion, nan por cultivá un confiansa inkebrantabel cu tur loke Dios a primintí lo sosodé na su debido tempu.

[Kuadro/Plachi na página 5]

REDUCÍ E AGONIA DI WARDA!

Planea di antemano! Si bo sa cu lo bo tin cu warda, sea prepará pa lesa, skirbi, brei, hak, of haci algun otro actividad útil.

Usa e tempu pa meditá, algu cu ta mas i mas difícil pa haci den nos mundu cu ta move na paso rápido.

Tene algu di lesa banda di telefon pa ora nan pone bo warda; den cincu of dies minuut, bo por lesa vários página.

Ora bo ta warda den un grupo, usa e oportunidad, si ta apropiado, pa combersá cu otro hende i compartí pensamentunan edificante cu nan.

Pone un bloknoot of algu di lesa den bo auto pa ora bo tin cu warda inesperadamente.

Cera bo wowo, relahá of haci oracion.

WARDAMENTU EXITOSO TA PRINCIPALMENTE UN ASUNTU DI BO ACTITUD I DI PENSA DI ANTEMANO.