Kico Nos Patrimonio Precioso Ta Nificá pa Bo?

“Bin, boso cu a ser bendicioná dor di mi Tata, heredá e reino prepará pa boso for dje fundamentu di mundu.”—MATEO 25:34.

1. Ki clase di cosnan hende a ricibí como herencia?

TUR hende tin cos cu nan a heredá. Esaki nos ta yama un herencia of patrimonio. Pa algun hende e herencia ta encerá un estilo di bida cu comodidad material. Pa otronan e ta un bida di pobresa. Den algun caso, generacionnan di pasado, debí na loke nan a experenciá of tende, a pasa un herencia di odio intenso contra un otro grupo étnico. Sin embargo, nos tur tin un cos en comun. Nos tur a ricibí dje promé homber Adam, un herencia di picá. E herencia ei cu tempu ta hiba na morto.—Eclesiástes 9:2, 10; Romanonan 5:12.

2, 3. Originalmente Jehova a haci ki herencia posibel p’e desendencia di Adam cu Eva, i di con nan no a hañ’é?

² Jehova, como un amoroso Tata celestial, a ofrecé humanidad originalmente un herencia completamente distinto: bida eterno perfecto den Paradijs. Jehova Dios a duna nos promé mayornan, Adam cu Eva, un comienso perfecto, sin picá. El a duna humanidad planeta Tera como regalo. (Salmo 115:16) El a percurá e hofi di Eden como un muestra di loke henter e planeta lo por a bira i a pone dilanti nos promé mayornan un asignacion maraviyoso i fasinante. Nan mester a producí yu, cuida e tera i tur su variacion di mata cu bestia, i extendé e Paradijs rond e planeta. (Génesis 1:28; 2:8, 9, 15) Nan yunan lo a participá den esaki. Esta un herencia maraviyoso pa pasa pa nan yunan!

³ Sin embargo, pa disfrutá di tur esaki Adam cu Eva i nan desendencia lo mester tabatin un bon relacion cu Dios. Nan a debe Jehova amor i obedencia, pero Adam cu Eva no a apreciá loke Dios a duna nan i nan a desobedecé su mandamentu. Nan a perde nan cas paradísico i e prospectonan glorioso cu Dios a pone nan dilanti. P’esei, nan no por a pasa esakinan pa nan desendencia.—Génesis 2:16, 17; 3:1-24.

4. Con nos por obtené e herencia cu Adam a perde?

⁴ Misericordiosamente, Jehova a haci percuracion pa asina e desendencia di Adam cu Eva por tabatin e chens di ricibí e herencia cu Adam a perde. Con? Na Dios su tempu señalá, su propio Yu Jesucristo, a entregá su bida humano perfecto na fabor dje desendencia di Adam. Dje manera aki Cristo a cumpra nan tur. Sin embargo, nan no ta haña e herencia automáticamente. Nan tin mester di un posicion aprobá cerca Dios, i nan por haña esei dor di ehercé fe den e balor di expiá picá di Jesus su sacrificio i dor di demostrá e fe ei mediante obedencia. (Juan 3:16, 36; 1 Timoteo 2:5, 6; Hebreonan 2:9; 5:9) Bo curso di bida ta demostrá aprecio pa e percuracion ei?

Un Herencia Cu Abraham A Pasa pa Su Desendencia

5. Con Abraham a mustra aprecio pa su relacion cu Jehova?

⁵ Segun cu Jehova a efectuá su propósito pa tera, el a trata cu Abraham den un manera special. El a manda e homber fiel ei bandoná su pais i bai na un tera cu Dios mes lo mustr’é. Abraham a obedecé di buena gana. Despues cu Abraham a yega einan, Jehova a bisa cu ta  Abraham su desendencia, no Abraham mes, lo a ricibí e tera como herencia. (Génesis 12:1, 2, 7) Con Abraham a reaccioná? E tabata dispuesto pa sirbi Jehova unda cu Dios a manda i con cu el a manda, pa asina su desendencia por a ricibí nan herencia. Pa 100 aña Abraham a sirbi Jehova den un tera cu no tabata di dje, te na su morto. (Génesis 12:4; 25:8-10) Abo lo a haci esei? Jehova a bisa cu Abraham tabata su “amigu.”—Isaías 41:8.

6. (a) Kico Abraham a demostrá dor cu e tabata dispuesto pa sacrificá su yu? (b) Ki herencia precioso Abraham por a pasa pa su desendencia?

⁶ Abraham a warda hopi aña pa haña un yu, Isaac, cu el a stima masha hopi. Evidentemente ora cu e mucha a crece bira yoncuman, Jehova a manda Abraham pa coge e hóben i ofrec’é como un sacrificio. Abraham no tabata sa cu e tabata a punto di demostrá loke Dios mes lo haci dunando su Yu como rescate; tog, el a obedecé i tabata cerca di ofrecé Isaac como sacrificio ora cu e angel di Jehova a par’é. (Génesis 22:9-14) Jehova a bisa caba cu su promesanan na Abraham lo a cumpli mediante Isaac. Pues, ta bisto cu Abraham tabatin fe cu, si ta necesario, Dios lo por a lanta Isaac for di morto, maske nunca promé algu asina no a sosodé. (Génesis 17:15-18; Hebreonan 11:17-19) Como cu Abraham no a retené ni sikiera su yu, Jehova a declará: “Pa medio di bo simia tur nacion di tera sigur lo bendicioná nan mes.” (Génesis 22:15-18) Esaki a indicá cu e Simia mencioná na Génesis 3:15, esta, e libertador Mesiánico, lo a bini via e liña di desendencia di Abraham. Esta un herencia precioso pa pasa pa bo desendencia!

7. Con Abraham, Isaac i Jacob a mustra aprecio pa nan herencia?

⁷ Abraham no tabata sa e importancia di loke Jehova tabata haci e tempu ei; ni su yu Isaac ni su nietu Jacob, kendenan a bira “herederonan cuné dje mésun promesa.” Pero nan tur tabatin confiansa den Jehova. Nan no a pega nan mes na ningun stad cu tabata reino den e pais, pasobra nan tabata spera algu mihó: “e stad cu tin berdadero fundeshi, di cua stad Dios ta e constructor i trahador.” (Hebreonan 11:8-10, 13-16) Sin embargo, no ta tur desendiente di Abraham a apreciá e gran balor dje herencia cu a bira disponibel mediante Abraham.

Algun Cu A Despreciá e Herencia

8. Con Esau a mustra cu e no a apreciá e gran balor di su herencia?

⁸ Esau, e yu homber mayó di Isaac, no a apreciá su derecho di primogénito. E no a apreciá cosnan sagrado. P’esei un dia cu Esau tabatin hamber, el a bende su derecho di primogénito na su ruman homber Jacob. Pa kico? A cambio di un cuminda di bonchi stobá cu pan! (Génesis 25:29-34; Hebreonan 12:14-17) E nacion via cua Dios su promesanan  na Abraham lo a cumpli a bini di Jacob, kende su nomber Dios a cambia pa Israel. Ki oportunidadnan e herencia en particular ei a habri p’e nacion?

9. Ki liberacion e desendencia di Jacob, of Israel, a experenciá debí na nan herencia spiritual?

⁹ Durante un periodo di hamber, Jacob cu su famia a muda pa Egipto. Ei nan a multiplicá i a bira masha hopi mes, pero tambe nan a bira catibu. Sin embargo, Jehova no a lubidá su pacto cu Abraham. Na Dios su tempu señalá, el a libra e yunan di Israel for di sclabitud i a notificá nan cu lo e bai hiba nan na “un tera cu ta abundá cu lechi i miel,” e tera cu el a primintí Abraham.—Éxodo 3:7, 8; Génesis 15:18-21.

10. Ki otro desaroyonan extraordinario a tuma lugá na ceru di Sinaí en coneccion cu e herencia dje yunan di Israel?

¹⁰ Ora e yunan di Israel tabata riba caminda pa e Tera Primintí, Jehova a reuní nan na ceru di Sinaí. Ei el a bisa nan: “Si boso obedecé mi bos estrictamente i berdaderamente warda mi pacto, e ora ei boso siguramente lo bira mi propiedad special for di tur otro pueblo, pasobra henter e tera ta pertenecé na mi. I boso mes lo bira pa mi un reino di sacerdote i un nacion santu.” (Éxodo 19:5, 6) Despues cu e pueblo boluntariamente i unánimamente a bai di acuerdo cu esaki, Jehova a duna nan su Ley, algu cu e no a haci cu ningun otro pueblo.—Salmo 147:19, 20.

11. Cua tabata algun dje cosnan precioso cu e patrimonio spiritual dje yunan di Israel a encerá?

¹¹ Esta un patrimonio spiritual e nacion nobo ei tabatin! Nan a adorá e único Dios berdadero. El a libra nan for di Egipto i nan tabata testigo ocular di sucesonan impresionante ora cu a duna nan e Ley na ceru di Sinaí. Nan patrimonio a bira mas ricu ainda segun cu nan a ricibí mediante e profetanan mas ‘declaracion sagrado di Dios.’ (Romanonan 3:1, 2) Jehova a designá nan como su testigonan. (Isaías 43:10-12) E Simia Mesiánico lo a aparecé den nan nacion. E Ley a señalá na dje, i lo a identifik’é i yuda nan comprendé cuantu nan tin mester di dje. (Galationan 3:19, 24) Ademas, nan lo a haña e oportunidad di sirbi huntu cu e Simia Mesiánico ei como un reino di sacerdote i un nacion santu.—Romanonan 9:4, 5.

12. Maske e israelitanan a drenta e Tera Primintí, kico nan no a experenciá? Di con?

¹² Di acuerdo cu su promesa, Jehova a hiba e israelitanan n’e Tera Primintí. Pero manera apostel Pablo a splica despues, debí na nan falta di fe, e tera ei no a resultá di ta un berdadero “lugá di descanso.” Como pueblo, nan no a drenta den “e descanso di Dios” pasobra nan no a percibí ni obra na armonia cu e propósito di Dios su propio dia di descanso cu a cuminsá despues dje creacion di Adam cu Eva.—Hebreonan 4:3-10.

13. Kico e nacion di Israel a perde dor cu nan no a apreciá nan patrimonio spiritual?

¹³ Israel natural lo por a suministrá e cantidad completo di esnan cu lo a participá cu e Mesías den su Reino celestial como un reino di sacerdote i un nacion santu. Pero nan no a apreciá nan patrimonio precioso. Ta un resto so di israelita natural a aceptá e Mesías ora el a bini. Como resultado, ta un cantidad chikitu so a ser incluí den e reino profetisá di sacerdote. A kita e Reino for di Israel natural i a dun’é “na un nacion cu ta producí su frutanan.” (Mateo 21:43) Cua nacion esei ta?

Un Herencia den Shelu

14, 15. (a) Despues di Jesus su morto, con e nacionnan a cuminsá bendicioná nan mes pa medio dje “simia” di Abraham? (b) Kico miembronan di “e Israel di Dios” ta ricibí como herencia?

¹⁴ E nacion na cua e Reino a ser duná ta “e Israel di Dios,” Israel spiritual, cu ta consistí di 144.000 siguidó di Jesucristo engendrá pa spiritu. (Galationan 6:16; Revelacion 5:9, 10; 14:1-3) Algun dje 144.000 tabata hudiu natural, pero mayoria tabata for di nacionnan no-hudiu. Dje manera ei loke Jehova a primintí Abraham, esta cu pa medio di su “simia” tur nacion lo ser bendicioná, a cuminsá cumpli. (Echonan 3:25, 26; Galationan 3:8, 9)  Den e cumplimentu inicial ei, Jehova Dios a ungi hende dje nacionnan cu spiritu santu i a adoptá nan como yu spiritual, rumannan di Jesucristo. Pues, nan tambe a bira un parti secundario di e “simia” ei.—Galationan 3:28, 29.

¹⁵ Promé cu Jesus a muri, el a introducí na prospectivo miembronan hudiu dje nacion nobo ei e pacto nobo cu lo a bira válido mediante su propio sanger. A base di nan fe den e sacrificio válido ei, esnan tumá den e pacto lo ser hací “perfecto pa semper.” (Hebreonan 10:14-18) Nan por a ser “declará hustu” i nan picánan pordoná. (1 Corintionan 6:11) Pues den e sentido ei, nan ta manera Adam tabata promé cu el a peca. Sin embargo, nan lo no biba den un paradijs terenal. Jesus a bisa cu lo el a bai prepará un lugá pa nan den shelu. (Juan 14:2, 3) Nan ta renunciá nan prospectonan terenal pa nan por tin un ‘herencia reservá pa nan den shelu.’ (1 Pedro 1:4) Kico nan ta haci einan? Jesus a splica: “Mi ta cera un pacto cu boso . . . pa un reino.”—Lucas 22:29.

16. Ki asignacion maraviyoso di sirbishi ta warda cristiannan ungí?

¹⁶ For di shelu, esnan cu lo goberná huntu cu Cristo, entre otro cosnan, lo yuda eliminá for di riba tera tur rastro di rebelion contra Jehova su soberania. (Revelacion 2:26, 27) Como un parti secundario dje simia spiritual di Abraham, nan lo participá den trece e bendicion di bida perfecto na hende di tur nacion. (Romanonan 8:17-21) Esta un herencia precioso nan tin!—Efesionan 1:16-18.

17. Ki aspecto di nan patrimonio cristiannan ungí ta disfrutá di dje miéntras nan ta riba tera ainda?

¹⁷ Pero no ta henter e patrimonio di Jesus su siguidónan ungí ta den futuro. Den un manera cu niun otro hende tabata por, Jesus a yuda nan conocé Jehova, e único Dios berdadero. (Mateo 11:27; Juan 17:3, 26) Cu palabra i ehempel, Jesus a siña nan kico kier men ‘confia Jehova’ i kico obedecé Jehova ta encerá. (Hebreonan 2:13; 5:7-9) Jesus a confia nan cu conocimentu dje berdad relacioná cu e propósito di Dios i a sigurá nan cu spiritu santu lo guia nan na un comprendimentu mas completo di esei. (Juan 14:24-26) El a imprimí den nan mente i curason e importancia dje Reino di Dios. (Mateo 6:10, 33) Tambe Jesus a confia nan cu e asignacion di duna testimonio i haci disipel di hende na Jerusalem, Hudea, Samaria i na e parti mas leu di tera.—Mateo 24:14; 28:19, 20; Echonan 1:8.

Un Patrimonio Precioso pa un Multitud Grandi

18. Den ki manera e promesa di Jehova cu tur nacion lo bendicioná nan mes pa medio dje “simia” di Abraham ta cumpliendo awe?

¹⁸ Ta probabel cu e cantidad completo di Israel spiritual, e “trupa chikitu” ei di herederonan di Reino, ta scogí caba. (Lucas 12:32) Ya pa décadanan caba Jehova a dirigí atencion na e recogementu di un multitud grandi di otro hende for di tur nacion. Pues, Jehova su promesa na Abraham cu pa medio di su “simia” tur nacion lo bendicioná nan mes ta ser cumplí den un gran manera. Cu goso esnan bendicioná aki tambe ta rindi sirbishi sagrado na Jehova i ta reconocé cu nan salbacion ta dependé di fe den e Lamchi di Dios, Jesucristo. (Revelacion 7:9, 10) Abo a aceptá Jehova su invitacion bondadoso pa ta parti dje grupo felis ei?

19. E hendenan dje nacionnan cu ta ser bendicioná awor ta anticipá ki patrimonio?

¹⁹ Ki patrimonio precioso Jehova ta ofrecé esnan cu no ta parti dje trupa chikitu? No, e no ta un herencia den shelu. E ta e patrimonio cu Adam lo por a pasa pa su desendencia: e prospecto di bida eterno perfecto den un paradijs cu gradualmente lo abarcá henter e planeta. Esei lo ta un mundu den cua “lo no tin morto mas, ni lo no tin lamento ni sclamacion ni dolor mas.” (Revelacion 21:4) Pues, ta na abo e Palabra inspirá di Dios ta bisa: “Confia den Jehova i haci bon; biba riba tera, i trata cu fieldad. Tambe haña deleite exkisito den Jehova, i lo e duna bo e peticionnan di bo curason. I solamente un poco tempu mas, i e malbado lo  no t’ei mas . . . Pero e mansunan mes lo poseé e tera, i berdaderamente nan lo haña nan deleite exkisito den e abundancia di pas. E hustunan mes lo poseé e tera, i nan lo biba pa semper riba dje.”—Salmo 37:3, 4, 10, 11, 29.

20. Den ki manera e “otro carnénan” ta disfrutá di gran parti dje patrimonio spiritual dje cristiannan ungí?

²⁰ E “otro carnénan” di Jesus tin un herencia den e dominio terenal dje Reino celestial. (Juan 10:16a) Aunke nan lo no ta den shelu, gran parti dje patrimonio spiritual cu e ungínan ta disfrutá di dje ta ser pasá pa nan. E otro carnénan a haña un comprendimentu dje promesanan precioso cu tin den e Palabra di Dios pa medio dje cuerpo colectivo di ungí, “e esclabo fiel i discreto.” (Mateo 24:45-47; 25:34) Anto huntu, e ungínan i otro carnénan ta conocé i adorá e único Dios berdadero, Jehova. (Juan 17:20, 21) Huntu nan ta gradicí Dios pa e balor di expiá picá di Jesus su sacrificio. Nan ta sirbi huntu como un solo tou bou di un solo Wardador, Jesucristo. (Juan 10:16b) Nan tur ta forma parti di un solo hermandad mundial i amoroso. Nan ta compartí huntu e privilegio di ta Testigonan di Jehova i di su Reino. Sí, si bo ta un sirbidó di Jehova dedicá i bautisá, bo patrimonio spiritual ta encerá tur esaki.

21, 22. Con nos tur por demostrá cu nos ta atesorá nos patrimonio spiritual?

²¹ Con precioso e patrimonio spiritual aki ta  pa bo? Bo ta apreci’é lo suficiente pa laga e hacimentu dje boluntad di Dios ser e cos mas importante den bo bida? Como evidencia di esei, bo ta haci caso dje conseho di su Palabra i di su organisacion pa asistí cu regularidad na tur reunion dje congregacion cristian? (Hebreonan 10:24, 25) E patrimonio ei ta asina balioso pa bo cu bo ta sigui sirbi Dios apesar di dificultad? Bo aprecio p’e patrimonio aki ta suficiente fuerte pa fortificá bo pa resistí cualkier tentacion pa sigui un rumbo cu lo por hiba bo na perd’é?

²² Laga nos tur atesorá e patrimonio spiritual cu Dios a duna nos. Miéntras cu nos ta mantené nos bista fihá firmemente riba e futuro Paradijs, laga nos participá plenamente den e privilegionan spiritual cu Jehova ta duna nos awor. Dor di ègt edificá nos bida rond di nos relacion cu Jehova, nos ta duna prueba convincente con precioso nos realmente ta considerá e patrimonio cu Dios a duna nos. Laga nos ta entre esnan cu ta declará: “Lo mi halsa bo, o mi Dios e Rey, i lo mi bendicioná bo nomber te na tempu indefiní, asta pa semper.”—Salmo 145:1.

Con Lo Bo Splica?

• Si Adam a keda leal na Dios, ki patrimonio lo el a pasa pa nos?

• Con Abraham su desendencia a trata e herencia cu tabata disponibel pa nan?

• Kico e patrimonio di Cristo su siguidónan ungí ta encerá?

• Kico ta e patrimonio dje multitud grandi, i con nan por demostrá cu nan realmente ta apreci’é?

[Preguntanan di Estudio]

[Plachinan na página 20]

E desendencia di Abraham a ricibí e promesa di un herencia precioso

[Plachinan na página 23]

Abo ta apreciá bo patrimonio spiritual?