Un Búskeda Largu A Ser Recompensá

“JEHOVA? Ken ta Jehova?” Silvia di ocho aña di edad a mira e nomber den un Bijbel n’e idioma armenio. E Bijbel tabata un tesoro di famia cu un otro mucha muher chikitu a mustr’é. El a puntra tur caminda, pero niun hende—ni su mayornan, ni su maestronan i ni sikiera e pastornan dje iglesia local na Yerevan, Armenia, caminda e tabata biba—no por a bis’é ken ta Jehova.

Silvia a crece, caba scol i haña trabou, pero ainda e no tabata sa ta ken ta Jehova. Como un hóben adulto, e tabatin cu hui for di Armenia, i despues di algun tempu el a hañ’é na Polonia, bibando den un cuarto chikitu huntu cu otro refugiado. Un di su compañeranan di kamber tabata ricibí bishita riba un base regular. “Ken bo bishitantenan ta?” Silvia a puntra. “Nan ta Testigonan di Jehova cu ta bini pa siña mi Bijbel,” e compañera a contestá.

Silvia su curason a salta di goso ora el e tende e nomber Jehova. Por fin, el a cuminsá siña ta ken ta Jehova i ki un Dios amoroso e ta. Pero no a dura mashá cu e mester a bandoná Polonia. El a busca asilo na Dinamarca, na e otro banda di laman Báltico. El a bai cu djis un par di pertenencia, pero entre nan tabatin literatura bíblico publicá dor di Testigonan di Jehova. Riba e página parti patras di un publicacion, Silvia a haña un lista di adres di oficinanan di sucursal di Sociedad Watch Tower. Esei tabata un di su pertenencianan di mas importante: su cabuya di salbabida cu ta hiba na Jehova!

Na Dinamarca nan a hiba Silvia na un campo pa refugiado, i mesora el a cuminsá busca Testigonan di Jehova. For di su lista di adres, e tabata sa cu e oficina di sucursal di Sociedad Watch Tower na Dinamarca tabata den e stad Holbæk. Pero na unda esei a keda? Silvia a ser transferí cu trein pa un otro campo, i riba caminda pa esei, e trein a pasa dor di Holbæk! Atrobe su curason a salta di goso.

Djis despues di esei, riba un dia cu solo, Silvia a coge trein bai bek Holbæk i a cana for dje stacion di trein te na e oficina di sucursal. E ta corda: “Ora mi a drenta e hardin, mi a cai sinta riba un banki i a bisa mi mes: ‘Esaki sí ta paradijs!’” Nan a ricibié calurosamente n’e sucursal i por fin e por a haña su propio studio di Bijbel.

Pero nan a transfirié vários biaha despues. For di e centronan pa refugiado cu el a bai un tras di otro, Silvia mester a localisá Testigonan di Jehova i reanudá su studio di Bijbel bes tras bes. Apesar di esei, despues di dos aña, el a siña suficiente pa dedicá su bida na Jehova. El a bautisá i djis despues di esei, el a drenta e ministerio di tempu completo. Na 1998, autoridadnan danes a dun’é asilo.

Awor Silvia tin 26 aña di edad i ta sirbi den e lugá cu a hacié corda riba paradijs, e oficina di sucursal di Testigonan di Jehova na Dinamarca. Awor e ta remarcá: “Kico mi por bisa? For di tempu mi tabata mucha chikitu mi tabata busca Jehova. Awor mi a hañ’é. Mi a soña di pasa mi bida den su sirbishi, i ata mi akí na Betel. Mi ta haci oracion pidi Jehova pa esaki por keda mi cas pa hopi aña mas!”