Nos Ta e Clase Cu Tin Fe

Anunciando e Reino di Dios Riba e Islanan di Fidji

JESUCRISTO a yega di mencioná dos caminda. Unu ta hanchu i ta hiba na morto. E otro ta pertá pero ta hiba na bida. (Mateo 7:13, 14) Pa permití hende scoge e caminda corecto, Jehova Dios a determiná cu mester predicá e bon nobo dje Reino rond mundu. (Mateo 24:14) Como resultado, hende rond mundu ta scuchando e mensahe di Reino, i algun di nan ta scoge bida dor di bira “e clase cu tin fe cu ta conserbá e alma bibu.” (Hebreonan 10:39) Nos ta invitá bo pa lesa con algun hende na Fidji i otro islanan cercano den parti zuid di océano Pacífico, a scoge pa bida.

Nan a Confia den Jehova

Tempu cu el a tende e mensahe di Reino pa promé bes na 1964, Mere tabata un mucha muher cu ta bai scol ainda. Dor cu e tabata isolá riba un isla remoto, e tabatin poco contacto cu Testigonan di Jehova. Tog, cu tempu el a logra gana conocimentu exacto di Bijbel. Pa e tempu ei e tabata casá cu un homber cu tabata hefe dje clan (grupo di famia) di su pueblo. E echo cu Mere a scoge pa biba segun principionan bíblico, a resultá den trato cruel di parti di su casá i su famianan i desprecio dje otro hendenan dje pueblo. Tog el a bautisá na 1991.

Poco tempu despues, Mere su casá Josua a tuma un actitud mas tolerante, i asta el a cuminsá sinta acerca ora Mere tabata tene consideracion bíblico cu nan yunan. Josua a stop di asistí na Iglesia Metodista. Pero como hefe di clan, ainda e tabata presidí reunionnan semanal dje pueblo. Den bista dje hendenan dje pueblo, Josua tabata desleal, pasobra Iglesia Metodista tabata un parti integral di bida di pueblo na Fidji. P’esei, e pastor local a urgi Josua pa bolbe na su religion di ántes.

Cu curashi Josua a declará cu e i su famia a scoge caba, i cu nan tabata determiná pa adorá Jehova Dios “cu spiritu i cu berdad.” (Juan 4:24) Na e siguiente reunion di pueblo, e hefe máximo a dicta cu Josua i su famia ta ser expulsá for dje pueblo. Nan a haña shete dia pa bandoná e isla, nan cas, nan tereno, nan cultivo, sí, henter nan moda di biba.

Rumannan spiritual riba un otro isla a sali na yudansa di Josua cu su famia, dunando nan un lugá pa nan keda i tereno pa nan planta. Awor Josua i su yu mayor ta bautisá, i un otro ta sirbi como publicadó no-bautisá dje bon nobo. Poco tempu pasá Mere a inscribí como pionero regular (un proclamadó di Reino di tempu completo). Nan a bai atras den posicion i den cos material dor di a scoge pa sirbi Jehova, pero mescos cu apostel Pablo, nan ta considerá tur esei como nada compará cu loke nan a obtené.—Filipensenan 3:8.

Un Escoho Relacioná cu Concenshi

Scoge pa sigui un concenshi bíblicamente entrená ta rekerí fe i curashi. Definitivamente esaki tabata e caso cerca Suraang, un muher hóben recien bautisá cu ta biba na Tarawa, un dje islanan di Kiribati. Suraang a pidi p’e ser exonerá for di un cierto parti di su trabou como verpleegster na un hospital. Su peticion no a cai den bon tera, i como resultado nan a mand’é bai traha na un centro médico chikitu riba un isla isolá, caminda e no por a haña contacto cu otro hende di su mes fe.

 Riba e isla ei ta normal pa tur hende cu caba di yega haci un ofrenda na e “spiritu”dje localidad. E pueblo ta kere cu si bo no hacié, lo e hiba na morto como resultado. Dor cu Suraang a nenga di laga nan efectuá e acto di idolatria aki pa e i esnan cu a bini cuné, e hendenan dje pueblo a para warda mira ki ora e spiritu ofendí lo chok’é mata. Ora nada no a pasa Suraang ni esnan cu a bini cuné, hopi oportunidad a habri p’e pa duna un excelente testimonio.

Pero Suraang su pruebanan no a caba. Algun dje hombernan hóben dje isla ei ta considerá seducí mucha muher cu bishitá e isla como un reto. Pero Suraang a resistí nan avancenan romántico i a mantené su integridad na Dios. De echo, e por a sirbi como pionero regular, apesar cu e tabata riba warda como verpleegster 24 ora pa dia.

Promé cu un fiesta na Suraang su onor, ora e tabata prepará pa bai for dje isla, e ancianonan dje pueblo a bisa cu e tabata e promé berdadero misionero cu a bishitá nan. Dor di su posicion firme na fabor di principionan bíblico, otro hendenan riba e isla ei a reaccioná faborablemente na e mensahe di Reino.

Retonan Físico

E isolacion cu algun pueblo ta aden, ta nificá cu Jehova su pueblo mester haci un gran esfuerso pa participá den e ministerio i asistí na reunionnan cristian. Considerá e caso di cuater Testigo bautisá, un ruman homber i tres ruman muher, cu ta pasa oranan largu biahando pa bai i bini for dje reunionnan. Durante nan caminata nan mester crusa riu tres bes, pa bai i pa bini. Ora awa ta haltu, e ruman homber ta landa crusa promé, lastrando un wea di cushiná grandi cu nan tas, buki i paña di reunion aden. Despues e ta landa bai bek pa yuda e tres ruman muhernan.

Un otro grupito, cu ta asistí na reunionnan riba e remoto isla Nonouti na Kiribati, ta enfrentá retonan diferente. E cas caminda nan ta reuní por carga shete pa ocho hende so. E sobrá hendenan cu asistí ta sinta pafó i loer dor dje ‘murayanan’ di ‘kippengaas.’ E lugá di reunion ta den pleno bista dje otro hendenan dje pueblo cu ta bai i bini di nan misanan impresionante. Claro cu sirbidónan di Jehova ta realisá cu loke realmente ta deseabel for di punto di bista di Dios ta hende, i no edificio. (Ageo 2:7) E único ruman muher bautisá riba e isla ta di edad avansá, i e no por cana hopi. Pero un muher hóben, un publicadó no-bautisá, ta yud’é bai den sirbishi dor di push’é den un garoshi. Esta un aprecio nan ta mustra p’e berdad!

E mas cu 2.100 publicadónan cu ta sirbi na Fidji i Kiribati ta determiná pa sigui anunciá e bon nobo dje Reino di Dios. I nan ta confia cu hopi hende mas ainda lo bira “e clase cu tin fe cu ta conserbá e alma bibu.”

[Mapa na página 8]

(Pa e teksto den su formato kompleto, wak e publikashon)

Australia

Fidji