Oracion Ta Yuda cu Algu?

NA UN momento dado, casi tur hende ta sinti e necesidad di haci oracion. De facto, hende di casi tur denominacion religioso ta haci oracion di curason. Por ehempel, miles di biaha pa dia, un budista por ripití e oracion: “Mi ta pone mi fe den Amida Buddha.”

En bista dje problemanan cu ta reina rond mundu, ta razonabel pa puntra: Kico hende ta spera di logra cu oracion? Tur e oracionnan aki ta yuda cu algu?

Pakico Hende Ta Haci Oracion?

Hopi hende di Oriente ta resa na nan antepasadonan i n’e diosnan di Sinto of Tao. Nan ta haci esei cu e speransa di pasa nan examen na scol cu éxito, di haña bon cosecha of di prevení malesa. Budistanan ta spera cu nan esfuersonan lo trece bendicion. Hindúnan ta masha deboto den nan oracionnan na nan dios i diosanan faborito pa haña conocimentu, rikesa i proteccion.

Algun católico ta spera di yuda humanidad dor di dedicá nan bida como mònik of soeur den monasterio of combentonan cerá, i haci oracion henter dia. Miyones di católico ta busca fabor di Maria dor di haci oracion for di cabes, kisas cu yudansa di rosario. Den paisnan oriental, hopi hende ta usa ‘wiel di oracion.’ Protestantnan ta ripití e palabranan dje Oracion di Nos Tata, aunke tambe kisas nan ta expresá nan sintimentunan na Dios spontáneamente. Hopi hudiu ta biaha distancianan grandi pa haci  oracion n’e Muraya Occidental na Jerusalem, cu e speransa di haña un restoracion dje tempel i un era nobo di pas i prosperidad.

Aunke miyones di hende ta dedicá nan mes na oracion, e problemanan di pobresa, adiccion, famia kibrá, crímen i guera ta sigui asotá sociedad humano. Tin e posibilidad cu tur e hendenan aki no ta haciendo oracion den e manera corecto? Den tur esei, tin un persona cu ègt ta tende oracion?

Tin Un Cu Ta Tende Oracion?

Oracion no ta yuda mashá si e no ta ser tendé. Ora un hende ta haci oracion, ta pasobra e ta kere cu un persona den e region spiritual invisibel ta tend’é. Sin embargo, no ta simpel ondanan di zonido ta transmití oracion. Hopi hende ta kere cu un persona por asta lesa e pensamentunan di hende cu ta haci oracion. Ken esei lo ta?

Con exactamente pensamentu ta originá den e miles di miyones di neuron cu ta forma e capa exterior di nos celebro, ta un misterio pa investigadónan. Pero ta razonabel cu Esun cu a diseñá celebro por lesa pensamentu asina. Esun ei no ta ningun otro sino nos Creador, Jehova Dios. (Salmo 83:18; Revelacion 4:11) Oracion mester ta dirigí na dje. Pero Jehova ta presta atencion na tur e oracionnan ei?

E Ta Tende Tur Oracion?

Rey David di Israel di antigwedad tabata un homber di oracion. Como un salmista inspirá pa Dios, el a canta: “O Tendedor di oracion, hende di tur carni lo acudí asta na bo.” (Salmo 65:2) Jehova ta capas pa comprendé oracionnan expresá den cualkier dje miles di idiomanan cu humanidad ta papia. E echo cu ningun mente humano por procesá asina tantu informacion no ta nificá cu Dios no por presta atencion na tur esnan cu ta haci oracion na dje na un manera cu e ta aceptá.

Tog, Jesucristo, un homber di oracion tambe, a revelá cu no ta tur oracion ta agradá Dios. Ripará kico Jesus a bisa tocante e custumber popular dje tempu ei di ripití oracion for di cabes. Segun e Jerusalem Bible católico, el a declará: “Den bo oracionnan, no papia pa papia manera e paganonan, pasobra nan ta kere cu dor di usa hopi palabra nan lo ser tendé.” (Mateo 6:7) Nos no por spera cu Jehova ta scucha oracion cu no ta expresá nos berdadero sintimentunan.

Un proverbio di Bijbel ta indicá pakico algun oracion no ta agradá Dios. “Esun cu ta apartá su orea for di tende e ley—asta su oracion ta un cos detestabel.” (Proverbionan 28:9) Un otro proverbio ta bisa: “Jehova ta leu for di hende malbado, pero ta tende oracion di hende hustu.” (Proverbionan 15:29) Na un tempu ora e lidernan di Huda di antigwedad tabata carga gran culpa, Jehova a declará: “Ora boso habri boso plant’i man, mi ta sconde mi wowonan for di boso. Maske boso ta haci hopi oracion, mi no ta scucha; cu dramamentu di sanger boso mannan mes a yena.”—Isaías 1:1, 15.

Apostel Pedro a mencioná algu mas cu lo por haci oracion inaceptabel pa Dios. Pedro a skirbi: “Boso, esposonan, sigui biba di igual manera cu [boso esposa] segun conocimentu, asignando onor na nan manera na un wea mas swak, esun femenino, siendo cu boso tambe ta heredero cu nan dje fabor inmerecí di bida, pa boso oracionnan no ser strobá.” (1 Pedro 3:7) E oracionnan di un homber cu a ignorá conseho asina lo no yega mas leu cu plafon!

Ta bisto cu hende tin cu cumpli cu cierto rekisitonan pa Dios tende nan oracion. Sin embargo, hopi hende cu ta haci oracion ta mustra masha poco interes pa haci loke Dios ta rekerí di nan. P’e motibu ei tur e oracionnan sincero ei no a resultá den un mihó mundu.

Kico anto Dios ta rekerí p’e tende nos oracionnan? E contesta tin di haber cu net e motibu pakico nos ta haci oracion. En realidad, si nos kier sa si oracion ta yuda cu algu, nos tin cu comprendé su propósito. Pakico Jehova a haci posibel pa nos papia cuné?

[Rekonosementu pa Potrèt na página 3]

G.P.O., Jerusalem