Pakico Bo Mester Haci Oracion?

“BOSO ta pidi sí, i tog boso no ta ricibí, pasobra boso ta pidi pa un mal propósito . . . Hala cerca Dios, i lo e hala cerca boso.” (Santiago 4:3, 8) E palabranan ei di Jesus su disipel Santiago por yuda nos bon pa considerá nos motibunan pakico nos ta haci oracion.

Oracion no ta djis un medio pa bisa Dios loke nos mester. Den su famoso Sermon Riba Ceru, Jesus a bisa: “Boso Tata sa kico boso mester asta promé cu boso pidié.” Tog, Jesus a bisa tambe: “Sigui pidi, i lo duna na boso.” (Mateo 6:8; 7:7) Pues Jehova kier pa nos bis’é loke nos ta sinti cu nos tin mester. Pero oracion ta enbolbé hopi mas cu esei.

Berdadero amigu no ta comunicá cu otro solamente ora nan tin mester di algu. Nan ta interesá den otro, i nan amistad ta crece ora nan ta expresá nan sintimentunan. Mescos tambe, e propósito di oracion ta hopi mas cu djis pidi p’e necesidadnan di bida. E ta duna nos oportunidad pa fortalecé nos relacion cu Jehova dor di expresá nos debocion di curason na dje.

Sí, Dios a duna nos e privilegio di oracion pa asina nos por hala cerca dje. Esaki por sosodé solamente ora nos ta expresá nos propio sintimentunan na Dios en bes di recitá oracion for di cabes. Ta ki un deleite pa papia cu  Jehova den oracion! Ademas, un proverbio di Bijbel ta bisa: “Oracion dje rectonan ta un placer p’e.”—Proverbionan 15:8.

“En cuanto ami, halando cerca Dios ta bon pa mi,” e salmista Asaf a canta. (Salmo 73:28) Pero pa hala cerca Dios, nos tin cu haci mas cu oracion so. Ripará con e siguiente relato ta indicá esaki:

“Un cierto di [Jesus] su disipelnan a bis’é: ‘Señor, siña nos haci oracion.’” Jesus a contest’é: “Ora boso haci oracion, bisa: ‘Tata, laga bo nomber sea santificá. Laga bo reino bini.’” (Lucas 11:1, 2) Nos oracionnan por tin nificacion sin cu nos siña promé kico ta e nomber di Dios i con lo e ser santificá? I nos por haci oracion na armonia cu e palabranan aki di Jesus si nos no ta comprendé kico ta e Reino di Dios? Ta ora nos examiná Bijbel cuidadosamente, nos por haña un comprendimentu dje asuntunan aki. E conocimentu cu nos a gana e ora ei lo yuda nos conocé Dios i comprendé su camindanan. Ademas, dor di conocé Jehova Dios, nos lo sinti nos mas cerca dje i mas dedicá na dje. En buelta, esaki lo yuda nos papia cuné mas libremente den oracion.

Oracion Por Resolvé Problema

Ora nos desaroyá un relacion íntimo cu Jehova, esei lo yuda nos resolvé problema. Ripará con esaki tabata e caso den cada un dje siguiente circunstancianan. Nan ta ilustrá cu esnan cu ta haci oracion tabata capas pa fortalecé nan relacion cu Jehova.

Na Brazil, un señora cu yama Maria tabata haci oracion na Dios pa yudansa. E tabata kier a rebelá contra normanan di conducta establecí, en parte debí n’e hipocresia cu el a mira den sociedad. Maria a asta bandoná su casá, yunan i cas. Tambe el a cuminsá usa droga. Pero ora e no a haña felicidad, el a habri su curason na Dios i a haci oracion pa yudansa.

No a tarda muchu cu dos Testigo di Jehova a bishitá Maria i a laga un edicion di E Toren di Vigilancia cu tabata contené informacion riba e balor di aceptá guia divino. Esei a toca su curason, i el a cuminsá studia Bijbel cu e Testigonan e mésun dia ei. Esaki finalmente a hiba n’e restoracion di su bida di famia. Segun cu el a siña tocante Jehova, e kier a expresá su amor p’e. Maria a bisa: “Mi a drecha mi bida. Na principio mi casá i mi famia a oponé mi studio di Bijbel. Pero ora nan a mira e cambionan cu mi tabata haci, nan a cuminsá animá mi.” Despues, Maria a dedicá su bida n’e Tendedor di oracion pa por sirbié.

Aunke José tabatin un bunita casá i un negoshi floreciente na Bolivia, e no tabata felis. Un afèr a pone su casá bandon’é. E tabata bebe di mas i a sinti cu e no tabata bal nada. José ta bisa: “Mi a cuminsá haci oracion cu henter mi curason i puntra Dios kico mi mester haci pa agrad’é. Pronto Testigonan di Jehova a bishitá mi lugá di negoshi i ofrecé studio di Bijbel grátis na cas, pero mi a core cu nan. Esaki a sosodé tres bes. Cada bes cu mi a resa pidi yudansa, ata nan atrobe. Finalmente, mi a dicidí cu lo mi scucha e siguiente biaha. Mi a lesa Bijbel completo i mi tabatin hopi pregunta, pero semper nan tabatin contesta cu a satisfacé mi. Siña tocante Jehova a duna mi un propósito nobo den bida, i mi amigunan entre e Testigonan tabata ehempelnan masha animador pa mi! Mi a laga mi enamorada i mi compañeronan cu ken mi tabata bebe. No a tarda muchu cu mi tabata bek cu mi casá i yunan. Mi a bautisá na cuminsamentu di 1999.”

Na Italia, Tamara su matrimonio tabata den problema. P’esei el a resa pidi pa sabiduria. Como cu el a ser maltratá i sacá for di su famia cu 14 aña, el a desaroyá un actitud agresivo. Tamara ta bisa: “Mi a haña un Bijbel i a cuminsá les’é. Un anochi, mi a lesa cu ‘haña sabiduria ta manera haña tesoro scondí.’ Mi a resa pidi p’e sabiduria ei. (Proverbionan 2:1-6) E siguiente mainta, Testigonan di Jehova a bishitá mi. Mi a cuminsá studia Bijbel cu nan, pero a tuma mi algun tempu pa pone loke mi a siña na práctica. Finalmente, mi a dicidí di  sigui e curso di bida cristian i a ser bautisá. Awor, huntu cu mi esposo, mi ta yuda otronan saca beneficio for di Dios su sabiduria.”

Beatriz tabata pertenecé n’e alta sociedad di Carácas, Venezuela. Sin embargo, dado momento e tabata divorciá i angustiá. Un biaha, sintiendo su mes desesperá el a haci oracion pa oranan largu. E siguiente mainta, bel di porta a zona. Disgustá, el wak dor dje ‘kijkglas’ i a mira dos hende cu tas. El a haci manera e no ta na cas, pero promé cu e pareha a bai, nan a hinca un pamfleta bou dje porta. Su tema tabata: “Conocé Bo Bijbel.” Nan bishita por tabatin di haber cu su oracionnan e anochi anterior? El a yama nan bek. Pronto e tabata studia Bijbel i despues a bautisá. Felis por fin, Beatriz ta siña otro hende awor tocante con pa haña felicidad.

Carmen a haci oracion relacioná cu su lucha cu pobresa. E tabatin dies yu i un casá buraché cu yama Rafael. “Mi a purba gana placa cu labamentu di paña,” Carmen a bisa. Pero Rafael su custumber di bebementu a bira pió. “Tabata despues cu nos a cuminsá studia Bijbel cu Testigonan di Jehova cu mi esposo a cuminsá cambia. Nos a siña dje promesa di Reino—cu pronto Jehova lo eliminá pobresa i opresion for di riba tera. Mi oracionnan na Dios finalmente a ser contestá!” Siña tocante Jehova su camindanan a yuda Rafael stop di bebe, i el a bisti “e personalidad nobo.” (Efesionan 4:24) E cu su famia por a mehorá nan calidad di bida. Rafael ta bisa: “Nos por laga di ta ricu, i nos no tin nos mes cas, pero sí nos tin e necesidadnan di bida i nos ta felis.”

Ora Tur Oracion Lo Ser Contestá

Oracion a yuda e hendenan aki cu algu? Sigur cu sí! I bo a ripará cu den mayoria caso nan oracion a ser contestá ora un persona dje congregacion cristian a yuda nan hala cerca Jehova Dios dor di studia Bijbel?—Echonan 9:11.

Pues, anto, nos tin bon motibu pa haci oracion. Ta falta masha poco pa e oracion p’e Reino di Dios bini i pa su boluntad sosodé na tera ser contestá. (Mateo 6:10) Despues cu Dios haci e planeta aki limpi di esnan cu ta opon’é, “tera siguramente lo ta yená cu e conocimentu di Jehova.” (Isaías 11:9) E tempu ei tur esnan cu ta stima Jehova lo disfrutá di “e glorioso libertad dje yunan di Dios”—i sin duda nan oracionnan lo ta contestá.—Romanonan 8:18-21.

[Plachi na página 7]

Abo sa pakico nos mester haci oracion?