Motivá pa Sirbi

KICO lo a motivá 24 pareha casá i den pleno flor di nan bida, pa bandoná nan famia, amigunan i ambiente familiar pa cuminsá cu e trabou di misionero den paisnan stranhero? Pakico nan lo ta contentu pa bai lugánan manera Papua Nueva Guinea i Taiwan, i tambe paisnan africano i di Latinoamérica? Por ta amor pa aventura? No. Mas bien, ta berdadero amor pa Dios i pa próhimo ta motivá nan.—Mateo 22:37-39.

Ken e hendenan aki ta? Nan ta e graduadonan dje di 109 klas dje Scol Bíblico di Galad di Watchtower. Diasabra dia 9 di september 2000, un total di 5.198 persona a reuní n’e Centro Educacional di Watchtower—situá na Patterson, New York—i na localidadnan cercano pa scucha conseho amoroso cu lo por yuda e graduadonan ser misioneronan exitoso.

Stephen Lett, miembro dje Comité di Siñansa di e Cuerpo Gobernante di Testigonan Jehova, tabata presidente dje programa. El a basa su remarkenan di introduccion riba Mateo 5:13 cu ta bisa: “Boso ta e salu dje tera.” Ruman Lett a splica cu e palabranan di Jesus sigur ta aplicá na e studiantenan cu tabata graduando. Por ehempel, salu ta duna cos smak. Asina e misioneronan tambe, dor di nan trabou di predicá eficas, ta manera salu den sentido figurativo.

Animacion di Despedida

Despues ruman Lett a introducí algun sirbidó di Jehova di hopi tempu kendenan a duna discursonan bíblico corticu pero di peso. E promé orador tabata John Wischuk, kende ta sirbi den Departamento di Redaccion. Su tema, “E Salmo Mas Corticu Ta Promové e Spiritu di Misionero,” tabata basá riba Salmo 117. Awe tin un necesidad mundial pa duna testimonio tocante Jehova i su Reino na tur “nacion” i “tribu.” El a animá e studiantenan pa cumpli cu loke Salmo 117 ta bisa dor di urgi otro hende pa “Alabá Jah.”

Siguientemente e presidente a introducí Guy Pierce, miembro dje Cuerpo Gobernante. El a papia riba e tema “Sea Flexibel, Pero tog Firme.” E Palabra di Dios ta sólido. Bijbel ta yama Jehova Dios e Baranca na Deuteronomio 32:4, pero tog su Palabra ta permití flexibilidad ya cu el a ser skirbí pa tur grupo di idioma i cultura—sí, pa henter humanidad. Ruman Pierce a amonestá e studiantenan pa predicá e Palabra di Dios, permitiendo su mensahe toca curason i concenshi di hende. (2 Corintionan 4:2) “Para firme pa principionan recto, pero sea flexibel. No menospreciá hende den boso asignacion pasobra nan cultura ta diferente,” ruman Pierce a spierta nan.

Karl Adams, un dje instructornan di Galad, kende tin casi 53 aña ta sirbi n’e sede mundial, a papia riba e tema interesante “Na Unda Lo Boso Bai  Despues di Aki?” Ta cierto cu e 24 parehanan a ricibí asignacion pa traha como misionero den 20 diferente pais rond mundu, pero ruman Adams a plantia e pregunta: Una bes bo ta einan i a mira e lugá, kico awor? Nos ta bibando den un mundu cu un spiritu intrankil. Hende kier bai lugánan nobo i haci cosnan nobo den un intento pa agradá nan mes. Di otro banda, e studiantenan a ricibí un asignacion for di Jehova pa bai caminda e kier pa nan ta pa nan cuida su “carnénan” inegoistamente. Nan no mester ta manera esnan den antiguo Israel cu debí na egoismo a perde un bon chens di ser usá dor di Jehova pa bendicioná henter humanidad. Mas bien, nan tin cu imitá Jesucristo, kende semper a haci e boluntad di su Tata inegoistamente i kende tabata obediente bou di tur circunstancia cu el a confrontá.—Juan 8:29; 10:16.

“Atesorá e Cosnan Profundo di Dios” tabata e tema di Wallace Liverance, secretario di Scol di Galad. Bes tras bes, e Scritura ta referí n’e Palabra di Dios cu términonan di rikesa, hoya balioso, metal precioso i cosnan di hopi balor i cu ta masha buscá. Proverbionan 2:1-5 ta mustra cu pa haña “e conocimentu mes di Dios,” nos tin cu busk’é manera pa “tesoro scondí.” E orador a animá e studiantenan pa sigui  coba den e cosnan profundo di Dios miéntras nan ta sirbi den nan asignacionnan nobo. Ruman Liverance a razoná: “Esaki ta útil, pasobra e ta edificá fe i confiansa den Jehova i lo fortificá boso determinacion pa pega na boso asignacion. Lo e yuda boso papia cu conviccion i pa ta un maestro mas eficas ora boso ta splica Dios su propósito na otro hende.”

Usando e marco di circunstancia di un klas, un otro instructor dje Scol di Galad a repasá e manera cu Jehova a bendicioná e studiantenan den sirbishi di veld atrabes di e último cincu lunanan. Lawrence Bowen a señalá n’e palabranan di apostel Pablo na Echonan 20:20 cu a papia di su ministerio público na Efeso, i a enfatisá cu Pablo a probechá di tur oportunidad pa duna testimonio. Experencia dje studiantenan a ilustrá cu, mescos cu apostel Pablo, esnan den nos tempu cu ta ser motivá pa amor pa Dios i pa próhimo nunca no ta nenga di papia e berdad i permití e poder dje Palabra di Dios obra den otro hende. Esaki ta resultá den Jehova su bendicion abundante.

Bos di Experencia Ta Papia

Durante nan periodo di scol, e studiantenan dje klas aki di Galad a beneficiá foral dor cu nan por a asociá cu miembronan di Comiténan di Sucursal di 23 pais, kendenan tambe tabata n’e Centro Educacional di Patterson pa un entrenamentu special. Leon Weaver i Merton Campbell dje Departamento di Sirbishi a entrevistá vários miembro di Comité di Sucursal, di cua algun tambe a gradua di Galad. Tende e misioneronan cu experencia aki tabata un animacion p’e studiantenan i nan famia i amigunan.

E conseho pa yuda e klas di graduado adaptá na nan asignacionnan den estranheria a incluí remarkenan manera esakinan: “Sea positivo. Si bo haña bo cu algu hopi straño of cu bo no por comprendé, no entregá. Dependé riba Jehova”; “siña ser felis cu loke tin, i confia cu Jehova lo percurá pa bo haña e necesidadnan di bida.” Otro comentarionan a enfocá riba con pa yuda e studiantenan mantené goso den nan asignacion. Un par dje expresionnan tabata: “No compará e lugá na cua bo a ser asigná cu esun for di cua bo a bini”; “siña e idioma local i papi’é bon pa bo por comunicá cu hende”; “siña conocé e custumbernan i cultura dje pueblo, pasobra esaki lo yuda bo pega na bo asignacion.” E comentarionan ei tabata di gran animacion p’e misioneronan nobo.

Despues dje entrevistanan, David Splane, un ex-misionero cu a gradua for dje di 42 klas di Galad i cu ta sirbi awor como un miembro dje Cuerpo Gobernante di Testigonan di Jehova, a desaroyá e discurso principal cu e tema cu a capta atencion di hende: “Studiante of Graduado—Cua?” El a puntra e klas cu tabata graduando: “Con boso ta bai mira boso mes ora boso bai na boso asignacion di misionero? Como graduadonan cu sa tur cos tocante e trabou di misionero of como studiantenan cu ainda tin hopi di siña?” Ruman Splane a indicá cu e graduado sabí ta considerá su mes un studiante. E misioneronan mester tin e punto di bista cu tur hende cu nan topa den nan asignacion di misionero tin e potencial pa siña nan algu. (Filipensenan 2:3) E studiantenan a ser animá pa cooperá estrechamente cu nan compañeronan misionero, e oficina di sucursal i e congregacion local. “Boso a pasa boso examen final, pero boso ta keda studiante. Laga tur hende sa cu boso ta einan pa siña,” ruman Splane a urgi.

Despues di e discurso aki, e studiantenan a haña nan diploma, i a anunciá nan asignacionnan n’e auditorio. E studiantenan cu tabata graduando a experenciá un momento emocionante ora cu despues di esei, un representante dje klas a lesa un resolucion cu a mencioná e determinacion dje graduadonan pa laga loke nan a siña for dje Palabra di Dios impulsá nan na actonan mas grandi di sirbishi sagrado.

Sin duda, tur hende cu a asistí tabata di acuerdo cu e conseho ricibí a fortificá determinacion dje graduadonan pa mustra amor pa Dios i pa próhimo. Tambe el a haci nan mas determiná cu nunca pa duna yudansa spiritual na hende den nan asignacion di misionero.

[Kuadro na página 25]

ESTADÍSTICANAN DJE KLAS

Cantidad di pais representá: 10

Cantidad di pais na cua a asigná nan: 20

Cantidad di alumno: 48

Edad promedio: 33,7

Promedio di aña den e berdad: 16,2

Promedio di aña den e ministerio di tempu completo: 12,5

[Plachi na página 26]

E di 109 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.