Pakico Bo Ta Sirbi Dios?

Un rey temeroso di Dios un biaha a duna su yu homber e conseho aki: “Conocé e Dios di bo tata i sirbié cu un curason completo i cu un alma gososo.” (1 Crónicanan 28:9) Ta claro cu Jehova kier pa su sirbidónan sirbié cu un curason gradicidu i apreciativo.

COMO Testigo di Jehova, nos ta admití unbes cu ora nos a ricibí pa promé biaha un splicacion dje promesanan bíblico, nos curason a yena cu gratitud. Tur dia nos a siña un cos nobo tocante Dios su propósito. Mas nos a siña tocante Jehova, mas fuerte nos deseo a bira pa sirbié “cu un curason completo i cu un alma gososo.”

Hopi persona cu a bira Testigo di Jehova ta sigui sirbi Jehova yen di goso durante henter nan bida. Sin embargo, tin cristian ta cuminsá bon, pero cu tempu nan ta perde bista dje motibunan fuerte cu ta motivá nos pa sirbi Dios. Esei a pasa cu bo? Si ta asina, no desesperá. Si bo a perde bo goso, bo por hañ’é bek. Con?

Considerá Bo Bendicionnan

Promé, meditá riba e bendicionnan diario cu bo ta ricibí di Dios. Pensa riba e bon regalonan di Jehova: su hopi obranan di creacion—accesibel pa tur hende sin importá nan posicion social of económico—su percuracionnan natural di cos di come i di bebe, e grado di bon salú cu bo tin, bo conocimentu di berdad bíblico, i principalmente, su Yu como regalo. Morto di su Yu a prepará e caminda pa abo sirbi Dios cu un concenshi limpi. (Juan 3:16; Santiago 1:17) Mas bo meditá riba Dios su bondad, mas bo aprecio p’e lo crece. E ora ei bo curason lo impulsá bo pa sirbié como danki pa tur loke el a haci. Sin duda lo bo cuminsá sinti atrobe manera e salmista cu a skirbi: “Hopi cos bo mes a haci, o Jehova mi Dios, asta bo obranan maraviyoso i bo pensamentunan pa cu nos; no tin ningun cu por ser compará cu bo. . . . Nan a bira mas numeroso di loke mi por relatá.”—Salmo 40:5.

David, un homber kende su bida sigur no tabata sin problema, a skirbi e palabranan aki. Como yoncuman, David a pasa gran parti di su tempu como fugitivo, miéntras cu rey Saul i su wardaespaldanan tabata busk’é pa mata. (1 Samuel 23:7, 8, 19-23) Ademas David tabatin cu lucha contra debilidadnan personal. El a admití esaki den Salmo 40: “Calamidadnan a rondoná mi te cu no por a conta nan. Mas di mi erornan a alcansá mi di loke mi por a mira; nan a bira mas hopi cu e cabeinan riba mi cabes.” (Salmo 40:12) Sí, David tabatin problema, pero e no a laga nan hogu’é completamente. El a enfocá riba e maneranan cu Jehova tabata bendicion’é, apesar di su problemanan, i el a descubrí cu e bendicionnan ei a surpasá su calamidadnan.

Ora bo ta sinti bo inundá cu problemanan personal of cu e sintimentu di ta inadecuá, ta bon pa bo para ketu i considerá bo bendicionnan, mescos cu David a haci. Indudablemente, ta aprecio pa e bendicionnan ei a impulsá bo pa dedicá bo mes na Jehova; tal pensamentunan por yuda bo tambe pa renobá e goso perdí i yuda bo sirbi Dios cu un curason apreciativo.

 Reunionnan di Congregacion Por Yuda

Ademas di meditá den privá riba e bondad di Jehova, nos tin cu asociá cu compañeronan cristian. Ta un animacion pa reuní regularmente cu hende homber, hende muher i hóbennan cu ta stima Dios i cu ta decididu pa sirbié. Nan ehempel por stimulá nos na actividad di henter alma den Jehova su sirbishi. Nos presencia na Salon di Reino por animá nan tambe.

Ta berdad sí cu ora nos yega cas despues di un dia pisá na trabou of ora nos ta desanimá debí na un problema of debilidad, kisas no ta fácil pa pensa riba baimentu di reunion na Salon di Reino. Na ocasionnan asina, kisas nos lo mester ta firme cu nos mes, ‘golpiando nos curpa,’ na moda di papia, pa asina nos por obedecé e mandamentu pa reuní huntu cu compañeronan cristian.—1 Corintionan 9:26, 27; Hebreonan 10:23-25.

Si esei bira necesario, nos mester concluí cu nos no ta ègt stima Jehova? Absolutamente cu no. Cristiannan maduro di pasado kende nan amor pa Dios tabata indiscutibel, mester a haci esfuerso vigoroso pa haci Dios su boluntad. (Lucas 13:24) Apostel Pablo tabata un cristian asina. Asin’akí el a describí su sintimentunan abiertamente: “Mi sa cu den mi, esta, den mi carni, no ta biba nada bon; pasobra e facultad di deseá ta presente cu mi, pero e facultad di obra loke ta excelente no ta presente. Pasobra e bon cu mi ta deseá mi no ta haci, pero e malu cu mi no ta deseá ta loke mi ta practicá.” (Romanonan 7:18, 19) Anto el a bisa e corintionan: “Awor, si mi ta declarando e bon nobo, esei no ta motibu pa mi broma, pasobra necesidad ta poné riba mi. . . . Si mi haci esaki di buena gana, mi tin un recompensa; pero si mi hacié contra mi boluntad, di tur manera mi tin un mayordomia confiá na mi.”—1 Corintionan 9:16, 17.

Pablo, mescos cu hopi di nos, tabatin tendencianan pecaminoso cu a stroba su deseo di haci loke ta corecto. Sin embargo, el a lucha fuerte contra e tendencianan ei, i mayoria biaha e tabatin éxito. Claro cu Pablo no a logra esaki riba su mes forsa. El a skirbi: “Pa tur cos mi tin e forsa den birtud di esun cu ta duna mi poder.” (Filipensenan 4:13) Jehova, esun cu a duna Pablo poder, lo duna bo tambe poder pa haci loke ta corecto si bo pidié su yudansa. (Filipensenan 4:6, 7) Pues, “hiba un lucha duru pa e fe,” i Jehova lo bendicioná bo.—Hudas 3.

Bo no tin nodi hiba e lucha aki bo so. Den congregacion di Testigonan di Jehova tin ancianonan cristian maduro, kende nan mes ta perseverando den e ‘lucha pa e fe,’ cu ta para cla pa yuda bo. Si bo acercá un anciano pa yudansa, lo e haci esfuerso pa “papia di un manera consolador” cu bo. (1 Tesalonicensenan 5:14) Su meta lo ta pa ser “manera un lugá di sconde for di bientu i un lugá di sconde for dje tempestad di awaceru.”—Isaías 32:2.

“Dios ta amor,” i e kier pa su sirbidónan sirbié pa amor. (1 Juan 4:8) Si mester renobá bo amor pa Dios, dal e pasonan apropiado pa haci esei, manera a ser describí ariba. Lo bo keda contentu di a hacié.