Buscando Hende Merecedor na Kenya

KENYA ta un pais di gran splendor den naturalesa. Mondinan berde, yanuranan inmenso, desiertonan mashá cayente i montañanan tapá cu sneu ta embeyesé e pais encantador aki. E ta e lugá di biba di mas cu un miyon gnu i di e rinócero cu ta den peliger di extincion. Tambe lo bo por mira tounan grandi di giraf ta crusa e sabananan.

Tambe tin masha hopi para, for di águilanan poderoso leu den laira te na un cantidad grandi di paranan colorido cu ta producí zonido bunita cu nan melodianan alegre. I ken lo por pasa e olefante i leonnan por haltu? E bista i zonidonan di Kenya ta inolvidabel.

Sin embargo, tin un otro zonido cu ta ser scuchá tur caminda den e pais bunita aki. Esaki ta e zonido di miles di bos cu ta anunciá un mensahe di speransa. (Isaías 52:7) Nan bosnan ta yega cerca hende for di mas cu 40 tribu i lenga. Den e sentido aki, Kenya ta tambe un pais di splendor spiritual.

Mayoria hende di Kenya tin inclinacion religioso i ta dispuesto pa papia tocante asuntunan spiritual. Tog no ta fácil pa haña hende pa papia cuné, ya cu Kenya, mescos cu hopi otro pais, ta pasando dor di cambio.

Situacion económico difícil a obligá hopi hende pa ahustá nan moda di biba. Hende muher cu tradicionalmente a traha na cas, awor ta haña nan mes ta traha den oficina of ta bende fruta, berdura, piscá i macutu di flegtu, cant’i caminda. Hende homber ta traha oranan largu cu ta laga nan keda agotá, purbando di percurá pa nan famia. Asta mucha, cu nan brasanan chikitu yen di paki di pinda hasá i webu herebé, ta cana riba caya ta bende nan mercancia. Como consecuencia tin poco hende na cas durante dia. E situacion aki a pone cu proclamadónan dje bon nobo di Reino mester a haci ahustenan necesario.

Nan a recomendá congregacionnan di Testigonan di Jehova pa enfocá mas riba hende cu ta for di nan cas, cumpliendo cu nan actividadnan diario, i tambe riba amigunan, famianan, hende di negoshi i coleganan di trabou. I e rumannan a reaccioná bon, papiando cu hende tur caminda cu nan por a haña nan. (Mateo 10:11) E esfuerso aki pa haci mas a duna bon resultado? Sigur cu sí! Considerá algun ehempel.

 Famia—Nos Próhimo Mas Cerca

Nairobi, e capital di Kenya, tin mas o ménos tres miyon habitante. Un mayor di ehército pensioná cu tabata biba na e parti oost di e capital no tabatin ley cu Testigonan di Jehova en general, aunke, pa su gran decepcion, su mes yu homber tabata un Testigo. Un februari e oficial pensioná a biaha 160 kilometer pa bai cas di su yu homber cu ta biba na Nakuku, un pueblo den Rift Valley. Durante e bishita, e yu a dun’é un regalo, e buki Conocimentu cu Ta Hiba na Bida Eterno. * E tata a aceptá e buki i a bai.

Ora el a yega cas bek, e ex-oficial a duna su casá e buki, kende a cuminsá lesa esaki, sin sa cu ta Testigonan di Jehova a publik’é. Poco-poco berdad di Bijbel a cuminsá conmové su curason, i el a cuminsá compartí e informacion cu su esposo. Pa curiosidad, e tambe a cuminsá lesa e buki. Ora nan a descubrí ken ta e publicadó dje buki, nan a concluí cu loke hende a bisa nan tocante Testigonan di Jehova no ta berdad. Nan a tuma contacto cu Testigonan local, i a cuminsá studia Bijbel cu nan. For di nan lesamentu personal di e buki, nan a comprendé cu no ta pas pa un cristian usa ni bende tabaco. (Mateo 22:39; 2 Corintionan 7:1) Sin vacilá, nan a destruí tur e sigarianan den nan negoshi. Despues di algun luna nan a cualificá pa bira publicadónan no-bautisá, i no a dura hopi cu nan a bautisá na un congreso di distrito.

Sushi Ta Producí un Tesoro

Den algun parti di e distrito dje capital, tin pueblitonan plamá aki-aya cu ta acomodá cientos di miles di hende. Aki bo ta haña masha hopi rei di cas trahá di lodo, palu, pida-pida metal i di zim. Ora no tin hopi trabou den e industria i fábricanan, hende ta improvisá. Obreronan Jua kali (“solo feros” na idioma swahili) ta traha den solo, combirtiendo tayer bieu di auto den sandalia of bleki cu hende no ta usa mas den lampi di kerosin. Otronan ta pasa dor di monton di sushi i barí di sushi en busca di papel, bleki i botter pa reciclahe.

Sushi por producí un tesoro? Sí! Un ruman homber ta corda: “Un homber fuerte, slòns i cu un aspecto brutu, cargando un sacu di plestik grandi yen di korant i revista bieu, a cana subi e tereno di nos Salon di Asamblea. Despues di bisa mi cu su nomber ta William, el a puntra: ‘Bo tin e último edicionnan di E Toren di Vigilancia?’ Mi a sinti un tiki incómodo, debí cu mi no tabata sa kico su intencion ta. Ora mi a mustr’é cincu ehemplar dje revista, el a wak nan un pa un i a bisa: ‘Mi ta bai cu nan tur.’ Sorprendí, mi a bai mi habitacion bek i a bolbe cu e buki Bo por biba pa semper den Paradijs riba tera. * Mi a mustr’é e plachi di Paradijs i a splik’é cu nos ta duna studio di Bijbel grátis. Anto mi a sugerí: ‘William, pakico bo no ta bin bek mañan pa nos cuminsá studia?’ Esei ta exactamente loke el a haci!

Riba un diadomingo el a bin su promé reunion. Mi tabata dunando e discurso público e dia ei. Ora William a drenta, el a tira un bista lihé riba e auditorio, a mira mi riba plataforma, i a sali na careda for di salon. Mi a puntr’é despues di con el a haci esei. El a contestá cu timides: ‘E hendenan tabata muchu limpi. I mi a bira nervioso.’

Segun cu William tabata progresá den su studio, berdad di Bijbel a cuminsá transformá su  bida. El a baña, corta su cabei, bisti paña limpi i nèchi, i pronto e tabata regular na reunion. Ora e buki Conocimentu cu Ta Hiba na Bida Eterno a sali, nos a cuminsá studia for di dje. Entretantu, el a duna dos parti den e Scol di Ministerio Teocrático i a bira un publicadó no-bautisá. Mi tabata masha emocioná pa ricibié como mi ruman spiritual ora el a bautisá na e dia special di asamblea.”

Na unda William a mira e balor dje revista E Toren di Vigilancia pa promé bes? “Mi a topa algun edicion entre e papelnan bieu den sushi.” Sí, el a haña un tesoro den un forma inusual!

Testificacion na Trabou

Nos ta semper alerto pa oportunidadnan pa duna testimonio informal na nos trabou? James, un anciano den un congregacion na Nairobi, a conocé e berdad di Bijbel dje manera ei. Na su turno, el a bira ábil den usa e método aki pa alcansá otro hende. Por ehempel, na un ocasion, James a mira un colega di trabou drenta oficina cu un badge cu e palabranan “Jesus Ta Salba.” Imitando e evangelisadó Felipe, James a puntra e colega: “Bo ta comprendé eigenlijk kico e palabranan ei ta nificá?” (Echonan 8:30) E pregunta ei a habri caminda pa un excelente combersacion. El a cuminsá un studio di Bijbel i despues e homber a bautisá. James tabatin éxito cu otro hende? Laga e mes splica:

“Ami cu Tom tabata traha pa e mésun compania. Hopi bes nos tabata huntu den e bus di transport di trabou. Un mainta, pa casualidad nos tabata sintá banda di otro. Mi tabata lesa un di nos bukinan, i mi a haci sigur di tene e buki di tal manera cu Tom por a wak e bon. Manera mi a spera, mi a logra gara su atencion, i cu gustu a fi’é mi buki. El a keda masha impresioná cu loke el a lesa i a bai di acuerdo pa studia Bijbel. Awor e cu su casá ta sirbidónan bautisá di Jehova.”

James ta sigui conta: “Cu frecuencia nos tin combersacionnan masha interesante durante pausa di merdia na nos compania. Esei a sosodé den tantu e caso di Ephraim como esun di Walter. Nan tur dos tabata sa cu mi ta un Testigo. Ephraim tabata interesá pa sa di con tabatin asina tantu oposicion contra Testigonan di Jehova. Walter tabatin pregunta tocante e diferencia entre e Testigonan i otro religionnan. Nan tur dos a keda satisfecho cu e contestanan bíblico cu mi a duna i a bai di acuerdo pa studia. Ephraim a progresá masha lihé. Cu tempu, tantu e como su esposa a dedicá nan bida na Jehova. Awor e ta sirbi como un anciano, i su esposa ta un pionero regular. Di otro banda, Walter a haña oposicion asina fuerte cu el a benta su buki di studio afó. Ta dor cu mi a sigui persistí el a bolbe cuminsá studia. Awor e tambe ta disfrutá dje privilegio di sirbi como un anciano.” Na tur, 11 persona a bira cristian berdadero dor cu James a probechá dje oportunidad di duna testimonio informal na su trabou.

Un Resultado Increibel

Den un pueblito cant’i lago Victoria, famia i amigunan a reuní pa un entiero. Entre esnan cu tabata presente tabatin un Testigo di edad. El a acercá un maestra di scol cu yama Dolly i a splik’é en cuanto e condicion dje mortonan i Jehova su propósito di kita morto pa semper. Ora el a ripará con bon Dolly a reaccioná, e ruman homber a sigur’é: “Ora bo bai bo stad bek, un di nos misioneronan lo bishitá bo pa siña bo Bijbel.”

 Dolly ta biba den e di tres stad mas grandi di Kenya. Na e tempu ei tabatin cuater Testigo misionero so ta sirbi ei. Eigenlijk e ruman homber di edad no a notificá ningun di e misioneronan pa bishitá Dolly. E tabatin gewoon un confiansa completo cu esei lo sosodé. I esei ta net loke a sosodé! Den un periodo di tempu corticu, un ruman muher misionero a topa Dolly i a cuminsá studia cuné. Awor Dolly ta bautisá, su yu muher mas chikitu ta inscribí den e Scol di Ministerio Teocrático, i su dos yu hombernan tambe ta bautisá. Asta e tabatin e goso di asistí na e Scol di Sirbishi di Pionero.

Atendiendo e Aumento

E énfasis cu nan a pone riba testimonio informal a permití cu miles di hende mas por a tende e bon nobo na Kenya. Mas cu 15.000 publicadó ta activo awor den e trabou importantísimo aki, i mas cu 41.000 a asistí na e Memorial di Cristo su morto aña pasá. Rond Kenya, asistencia na reunion ta hopi bes dòbel e cantidad di publicadónan di Reino. Esaki a crea un necesidad pa mas Salon di Reino.

Nan ta construyendo Salonnan di Reino tantu den stadnan principal como den áreanan remoto. Un di e lugánan aki ta un stad isolá di Samburu mas o ménos 320 kilometer nortoost di Nairobi. Na 1934 nan a yama e stad aki Maralal, cu kier men “briyante” na idioma samburu, dor cu e promé dak di zim cu nan a usa einan tabata briya den solo. Despues di sesentidos aña nan a construí un otro edificio cu dak di zim na Maralal. Esaki tambe ta “briya” dor cu e ta e lugá local di adoracion berdadero.

E 15 publicadónan a haci un tremendo esfuerso pa construí e promé Salon di Reino den e parti remoto aki di Kenya. Nan fondonan tabata limitá, pues e rumannan mester a dependé riba material local. Nan a traha e murayanan dje santu corá muhá cu awa i a pak e bon meimei dje palunan stret. Despues nan a haci e murayanan fini i a pleister nan cu un mescla di sushi di baca i shinishi, dunand’e un acabado firme cu ta dura pa años.

Pa haña e palunan pa e edificio, e rumannan a ricibí un permit pa kap palu. Pero e mondi mas cerca tabata mas o ménos 10 kilometer leu. E ruman hombernan i e ruman muhernan mester a cana bai e mondi, kap e palunan, kita e taki cu blachinan i carga e palunan trece n’e sitio di construccion. Un biaha, biniendo for di e mondi, polis a para e rumannan i a bisa nan cu nan permit ta inválido. Polis a bisa un pionero special cu e ta ser arestá pasobra el a kap palu. Un ruman muher local, bon conocí den e comunidad i pa polis, a bisa polis: “Si boso arestá nos ruman, boso tin cu arestá nos tur, ya cu nos tur a kap e palunan!” E ora ei e agente policial a laga nan tur bai.

Tabatin bestia salbahe den e mondi, kier men cu cana ei banda tabatin su peliger. Un dia un ruman muher a kap un palu basha abou. Ora e palu a yega suela, el a mira un bestia bula core bai. N’e punta di color maron-oraño cu el a mira pasa bai el a pensa cu tabata gewoon un impala, pero mas despues el a mira na e marca di e patanan cu tabata trata di un leon! Apesar di peligernan asina, e rumannan a completá e salon, i e ta pará como un fuente di alabansa “briyante” na Jehova.

Dia 1 di februari 1963, tabata masha significativo den e historia teocrático di Kenya. Riba e dia ei e promé oficina di sucursal a habri, djis un espacio di 7,4 meter cuadrá. Dia 25 di october 1997, nan tabatin un otro logro significativo den historia teocrático di Kenya: dedicacion dje compleho nobo di Betel di 7.800 meter cuadrá! E proyecto completá tabata un gran culminacion di tres aña di trabou duru i dedicá. Boluntarionan for di 25 diferente nacion a transformá e tereno di 3,2 hectar yen di lodo cu yerba, den un bunita hardin cu lugá pa e sucursal nobo, cu ta acomodá 80 miembro di e famia di Betel.

Nos tin tur motibu pa alegrá den loke Jehova a haci pa su pueblo. Danki ta bai na dje pa a conmové e curason di su sirbidónan pa haci mas i intensificá e búskeda di hende merecedor na Kenya, i asina haci Kenya un pais di splendor spiritual.

[Nota]